ᑭᖑᓪᓕᕕᓂᕗᑦ
ᐱᕝᕙᓪᓕᐊᓂᕕᓂᖏᑦ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐃᕙᓪᓕᐊᓕᕐᓂᖅ ᓄᓇᕗᒻᒥ
ᓄᕕᐱᕆ 1980−ᖑᑎᓪᓗᒍ, ᐃᓄᓕᕆᔨᑐᖃᒃᑯᑦ ᓴᕿᑦᑎᓚᐅᖅᓯᒪᕗᑦ ᑎᑎᕋᖅᑕᐅᕙᓪᓕᐊᔪᒥᒃ ᓱᓕ ᒥᓂᔅᑕᐃᑦ ᐃᓱᒪᓕᐅᕈᑎᒋᔭᕆᐊᖃᖅᑕᖏᓐᓂᒃ ᑎᑎᖃᓂᒃ ᐱᔾᔪᑎᖃᖅᑐᓂᒃ ᐅᑭᐅᖅᑕᖅᑐᒥ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐃᓂᕐᒧᑦ ᑲᓇᑕᒥ ᓄᓇᑦᓯᐊᕐᒥᓗ ᐃᖃᓇᐃᔭᕐᕕᖕᓄᑦ ᐊᑐᖅᑕᐅᓇᔭᖅᑐᓂ ᔫᑳᓐᒥᐅᓂ ᐊᒻᒪᓗ ᓄᓇᑦᓯᐊᕐᒥᐅᓂᓗ (ᑕᐃᔅᓱᒪᓂ ᐃᓚᒋᔭᐅᓪᓗᓂ ᓱᓕ ᓄᓇᕗᑦ). ᓯᕗᓪᓕᖅᐸᖑᓚᐅᖅᓯᒪᔪᑦ ᑎᑎᕋᖅᑕᐅᓵᖅᓯᒪᓂᖏᑦ ᓇᓗᓇᐃᔭᐃᓯᒪᓚᐅᖅᑐᑦ ᑲᓇᑕᒥ ᐊᐅᓚᑕᐅᔪᓂᒃ ᐸᕐᓇᐅᑎᓕᐊᕆᔭᐅᔪᓂᒃ ᓴᖏᔪᒻᒪᕆᖕᓂ ᐃᑲᔪᖅᓱᐃᓯᒪᔪᓂᒃ ᓴᓇᕕᒡᔪᐊᕐᓂᒃ.
ᑭᖑᓂᐊᓂ ᐃᓕᓐᓂᐊᖅᑎᑕᐅᓚᐅᖅᓱᑎᒃ ᑲᑎᖅᓱᖅᑕᐅᓂᖏᓐᓄᑦ ᐅᖃᐅᓯᒃᓴᒃᑲᓐᓃᑦ ᖃᓄᖅᑐᕈᑕᐅᓂᖏᓐᓄᑦ ᐃᓄᓕᕆᔨᑐᖃᒃᑯᑦ ᐃᓱᒪᓘᑎᒋᓚᐅᖅᑕᖏᓐᓂᒃ, ᐃᓄᓕᕆᔨᑐᖃᒃᑯᑦ ᓴᕿᑦᑎᓕᓚᐅᖅᐳᑦ ᐅᑭᐅᖅᑕᖅᑐᒥ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐃᓂᕐᒧᑦ ᐊᑐᐊᒐᕐᓂᒃ ᔪᓚᐃ 30, 1981-ᒥ. ᑭᒡᒐᖅᑐᐃᔨᖃᖅᓱᑎᒃ ᓄᓇᖃᖄᖅᑐᑦ ᑎᒥᖁᑎᖏᓐᓂᒃ ᐊᒻᒪᓗ ᓄᓇᑦᓯᐊᑉ ᒐᕙᒪᒃᑯᖏᓐᓂᒃ ᐸᕐᓇᐃᓂᕐᒧᑦ ᐋᕿᐅᒪᓂᕆᔭᐅᓂᐊᖅᑐᓂᒃ, ᐊᑐᐊᒐᐃᑦ ᓱᓕ ᐋᖀᐅᒪᓚᐅᖅᐳᑦ ᐃᓄᓕᕆᔨᑐᖃᒃᑯᑦ ᑕᒪᐃᓐᓂᒃ ᐊᐅᓚᑦᑎᔨᐅᓂᐊᕐᓂᖏᓐᓂᒃ ᐊᑐᖅᑕᐅᓂᐊᖅᑐᓂᒃ ᐱᖅᑯᓯᒃᓴᓂᒃ.
ᐃᓄᓕᕆᔨᑐᖃᒃᑯᑦ ᐊᒻᒪᓗ ᓄᓇᑦᓯᐊᑉ ᒐᕙᒪᖏᑦ ᑭᖑᓂᐊᒍᑦ ᐋᔩᖃᑎᒌᒎᓐᓇᖅᓯᓚᐅᖅᑐᑦ ᓄᑖᓂᒃ ᐸᕐᓇᐃᓂᕐᒧᑦ ᐱᖅᑯᓯᕆᔭᐅᔭᕆᐊᖃᖅᑐᓂᒃ, ᒪᓕᒃᑕᐅᓪᓗᑎᒃ ᑕᐃᔅᓱᒪᓂ ᐱᑕᖃᓚᐅᖅᑐᑦ ᐊᕕᒃᑐᖅᑕᐅᓯᒪᓂᖏᑦ ᐊᐅᓚᑦᑎᔨᐅᕕᐅᓂᕐᒧᑦ ᑲᒪᒋᔭᐅᔭᕆᐊᓖᑦ, ᑭᓯᐊᓂ ᓄᓇᑦᓯᐊᑉ ᒐᕙᒪᒃᑯᖏᓐᓄᑦ ᐃᓚᒋᔭᐅᑐᐃᓐᓇᕈᓐᓇᕐᓂᖅ ᓴᕿᑕᐅᕙᓪᓕᐊᓂᖏᓐᓂ, ᐊᖏᖅᑕᐅᔪᓐᓇᕐᓂᖏᓐᓂ ᐊᒻᒪᓗ ᐊᑐᓕᖅᑎᑕᐅᔪᓐᓇᕐᓂᖏᓐᓂ ᐸᕐᓇᐅᑏᑦ. ᐊᓪᓚᐃᑦ ᓄᓇᖃᖄᖅᑐᑦ ᑲᑎᒪᔨᕐᔪᐊᖏᑦ, ᐊᓪᓚᖓᔪᐃᑦ ᑲᑐᔾᔨᖃᑎᒌᖏᑦ ᓄᓇᑦᓯᐊᕐᒥ ᐊᒻᒪᓗ ᑐᓐᖓᕕᒃ ᕕᑐᕇᓴᒃᑯᑦ ᓄᓇᕗᒻᒥ ᐊᔩᖃᑎᒌᒃᑎᐅᓚᐅᕐᒥᔪᑦ ᐃᓚᐅᓂᕐᒥᓂᒃ ᐸᕐᓇᐃᔨᐅᓂᕐᒥᒃ ᒪᕐᕉᖕᓂ ᒐᕙᒪᒃᑯᓐᓂ. ᔪᓚᐃ 28, 1983−ᒥ, ᑕᐃᔅᓱᒪᓂ ᓯᕗᓪᓕᐅᓚᐅᖅᑐᖅ “ᑐᖓᕕᐅᔪᖅ ᐊᖏᕈᑎᓄᑦ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐃᓂᕐᒧᑦ” ᐃᓚᖃᓚᐅᖅᑐᑦ ᒪᑯᓂᖓ:
- ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐃᓂᖅ ᐱᖅᑯᓯᐅᕙᒃᑐᖅ ᐃᓱᒪᓕᐅᕐᓂᕐᒧᑦ ᐱᔾᔪᑎᖃᖅᑐᓂᒃ ᓴᐳᓐᓂᐊᖅᑕᐅᓂᖏᓐᓂᒃ, ᐱᕙᓪᓕᐊᓂᖏᓐᓂ, ᐊᐅᓚᑕᐅᓂᖏᓐᓂᒃ, ᐊᑐᖅᑕᐅᓂᖏᓐᓂᓗ ᓄᓇᐃᑦ ᓄᓇᒥᐃᑕᓪᓗ ᐃᓚᒋᓪᓗᒋᓪᓗ ᓄᓇᒦᓐᓂᖏᑦ ᐃᒪᐃᑦ ᐊᒻᒪᓗ ᑕᕆᐅᖏᑦ.
- ᐊᑐᖅᑕᐅᓂᖏᓐᓂ ᓄᓇᐃᑦ ᐸᕐᓇᐅᑕᐅᕙᓪᓕᐊᓂᖏᓐᓂᒃ, ᐃᓚᖃᕐᒥᔪᑦ ᐊᑐᓕᖅᑎᑕᐅᓂᖏᓐᓂᒃ ᓄᓇᐃᑦ ᐸᕐᓇᐅᑎᓂᒃ, ᐊᒻᒪᓗ ᖃᐅᔨᓴᖅᑕᐅᓂᖏᓐᓂᒃ ᓄᓇᐃᑦ ᐊᑐᖅᑕᐅᓂᖏᓐᓄᑦ ᓈᒻᒪᖏᓕᐅᕈᑕᐅᔪᓂᒃ.
- ᐃᓅᓯᓕᕆᓂᕐᒧᑦ, ᐃᓕᖅᑯᓯᓕᕆᓂᕐᒧᑦ, ᐊᒻᒪᓗ ᑮᓇᐅᔭᓕᐅᕈᑎᖏᓐᓄᑦ ᐃᓚᐅᓂᖏᑦ ᐃᓄᐃᑦ ᓄᓇᓕᖕᓂ ᐱᔾᔪᑕᐅᓂᖅᐹᖑᕙᒃᐳᑦ ᐊᑐᐊᒐᖃᕐᓂᕐᒧᑦ ᓇᓗᓇᐃᔭᐅᑕᐅᓂᐊᖅᑐᓄᑦ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᓄᑦ.
- ᓯᕗᓪᓕᐅᓂᖅᐹᖅ ᐱᔾᔪᑕᐅᔪᖅ ᓄᓇᐃᑦ ᐊᑐᑎᒃᓴᖏᓐᓄᑦ ᐸᕐᓇᐃᓂᖅᓂ ᓄᓇᑦᓯᐊᕐᒥ ᐱᔾᔪᑎᖃᖅᐳᖅ ᓴᐳᓐᓂᐊᖅᑕᐅᔭᕆᐊᖃᕐᓂᖏᑦ ᐊᒻᒪᓗ ᑐᓴᐅᔭᐅᔭᕆᐊᖃᕐᓂᖏᑦ ᒫᓐᓇᐅᔪᒥ ᓯᕗᓂᒃᓴᐅᓂᐊᖅᑐᒥᓗ ᖃᓄᐃᖏᓐᓂᖃᕆᐊᖃᕐᓂᖏᑦ ᐃᓄᖁᑎᒋᔭᐅᖏᓐᓇᖅᑐᑦ ᐊᒻᒪᓗ ᓄᓇᓖᑦ ᓄᓇᑦᓯᐊᕐᒥ, ᐃᓱᒪᒋᓪᓗᑎᒡᓗ ᐃᓚᒋᔭᐅᖃᑕᐅᓂᖏᑦ ᐊᓯᓕᒫᖏᑦ ᑲᓇᒥᐅᑕᐃᑦ. ᐃᓱᒪᒋᔭᐅᓗᐊᕆᐊᖃᖅᑐᑦ ᓴᐳᓐᓂᐊᖅᑕᐅᓯᒪᓂᖏᑦ ᐊᒻᒪᓗ ᑐᓴᐅᔭᐅᕙᓪᓕᐊᓂᖏᑦ ᒫᓐᓇᐅᔪᖅ ᓯᕗᓂᒃᓴᒥᓗ ᖃᓄᐃᓐᓂᖃᕆᐊᖃᖏᓐᓂᖏᑦ ᓄᓇᖃᖄᖅᑐᑐᖃᐃᑦ ᐊᒻᒪᓗ ᓄᓇᖁᑎᖏᓐᓄᑦ ᐃᓚᒋᔭᐅᓂᖏᑦ ᑐᑭᓕᐅᖅᑎᐅᓂᖏᑦ ᒪᓕᒃᑕᐅᓗᑎᒃ.
- ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᓂᖅ ᐅᑭᐅᖅᑕᖅᑐᒦᓐᓂᐊᖅᑐᖅ, ᑕᒪᒃᑭᑦᑎᐊᕐᓗᓂᓗ, ᑕᐃᒫᒃ ᑕᑯᒃᓴᐅᑦᑎᐊᕐᓂᐊᕐᒪᑕ ᐊᕕᒃᑐᖅᓯᒪᓂᖏᓐᓂ ᐊᒻᒪᓗ ᓄᓇᓕᖕᓂ ᐃᓚᐅᓂᖏᑦ ᐊᒻᒪᓗ ᑭᓇᒃᑰᓂᖏᑦ.
ᓄᓇᕗᑦ ᐸᕐᓇᐃᔨᒃᑯᑦ ᑲᒥᓯᓇᑖᖅᐸᓪᓕᐊᓂᕐᒧᑦ ᓅᑉᐸᓪᓕᐊᓂᖏᓐᓂ ᐱᓕᕆᔩᑦ ᐊᐅᓚᑦᑕᐅᓚᐅᖅᑐᑦ ᐊᑖᒍᑦ ᑐᖓᕕᖃᖅᓱᑎᒃ ᐊᖏᕈᑎᓂᒃ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᓄᑦ. ᑕᒪᓐᓇ ᐱᓕᕆᐊᖑᓚᐅᖅᑐᖅ ᓴᕿᑦᑎᔾᔪᑕᐅᓕᓚᐅᖅᐳᖅ ᐸᕐᓇᐃᔭᐅᓂᖏᓐᓂᒃ ᐊᒻᒪᓗ ᐊᖏᖅᑕᐅᓂᖏᓐᓂᒃ ᑕᓪᓗᕈᑎᐅᑉ ᐃᒪᖓᓂ ᐸᕐᓇᐅᑎᓂᒃ ᑎᓯᐱᕆᖑᑎᓪᓗᒍ 1990, ᐊᒻᒪᓗ ᑐᓂᕐᕈᑕᐅᓪᓗᑎᒃ ᑭᕙᓪᓕᕐᒥ ᐊᕕᒃᑐᖅᓯᒪᓂᖓᓐᓂ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑏᑦ, ᓯᑎᐱᕆ 1991-ᖑᑎᓪᓗᒍ. ᑭᕙᓪᓕᕐᒥ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑏᑦ ᐊᖏᖅᑕᐅᓚᐅᖅᓯᒪᔪᑦ ᑲᓇᑕᒧᑦ ᐊᒃᑐᐱᕆ 1994-ᒥ ᐊᒻᒪᓗ ᓄᓇᑦᓯᐊᑉ ᒐᕙᒪᒃᑯᖏᓐᓄᑦ ᒫᔾᔨ 1995−ᖑᑎᓪᓗᒍ.
ᐊᖏᕈᑕᐅᓚᐅᖅᑎᓪᓗᒋᑦ ᐃᓄᓕᒫᑦ ᓂᕈᐊᖅᑎᑕᐅᓂᖏᓐᓂ ᓄᓇᕗᒻᒥ ᓄᓇᑖᕈᑎᓂᒃ ᐊᖏᕈᑎᓂᒃ (ᓄᓇᑖᕈᑎᓂᒃ) ᔪᓚᐃ 9, 1993−ᒥ, ᐱᓕᕆᐊᖏᑦ ᓄᓇᕗᑦ ᐸᕐᓇᐃᔨᒃᑯᑦ ᑲᒥᓯᓇᑖᖅᐸᓪᓕᐊᓂᕐᒧᑦ ᓅᑉᐸᓪᓕᐊᓂᖏᓐᓂ ᐱᓕᕆᔩᑦ ᐱᓕᕆᒋᐊᓕᓚᐅᖅᑐᑦ ᐊᑖᒍᑦ ᑕᐃᔭᐅᓂᕐᒥᒍᑦ ᓄᓇᕗᒻᒥ ᐸᕐᓇᐃᔩᑦ ᑲᑎᒪᔨᖏᓐᓂᒃ. ᓄᓇᕗᑦ ᐸᕐᓇᐃᔨᒃᑯᑦ ᓯᕗᓪᓕᖅᐸᕐᒥᒃ ᐋᕿᒋᐊᖅᓯᓚᐅᖅᑐᑦ ᒪᕐᕉᖕᓂᒃ ᐊᖏᖅᑕᐅᓯᒪᔫᖕᓂᒃ ᐸᕐᓇᐅᑏᖕᓂᒃ, ᐃᓚᖃᕆᐊᖃᓕᕐᓂᖏᓐᓄᑦ ᓄᓇᕗᒻᒥ ᓄᓇᑖᕈᑎᓂᒃ ᐊᖏᕈᑕᐅᓯᒪᔪᓂᒃ. ᑕᐃᒪᐃᓐᓂᖏᓄᑦ, ᐊᖏᖅᑕᐅᓕᓚᐅᖅᐳᑦ ᑕᒪᒃᑮᒃ ᐋᕿᒋᐊᖅᑕᐅᓯᒪᓕᖅᓱᑎᒃ ᑭᕙᓪᓕᕐᒥ ᐊᒻᒪᓗ ᕿᑭᖅᑖᓘᑉ ᐅᐊᖕᓇᖓᓄᑦ (ᑕᓪᓗᕈᑎᐅᑉ ᐃᒪᖓᓂᒃ ᑕᐃᔭᐅᓚᐅᖅᑐᒐᓗᐊᖅ ᓯᕗᓂᐊᒍᑦ) ᐊᕕᒃᑐᖅᓯᒪᓂᖏᓐᓂ ᐸᕐᓇᐅᑏᒃ, ᔫᓂᒥ 2000−ᒥ. ᓄᓇᕗᑦ ᐸᕐᓇᐃᔨᒃᑯᑦ ᐱᓕᕆᕙᒃᑐᑦ ᒪᓕᖕᒪᖔᑕ ᖃᐅᔨᓴᐃᓂᕐᒥᒃ ᓴᓇᔪᖃᕐᓂᐊᖅᑐᓂᒃ ᐊᖏᔫᑎᓂᒃ ᕿᑭᖅᑖᓘᑉ ᐅᐊᖕᓇᖓᓄᑦ ᐊᒻᒪᓗ ᑭᕙᓪᓕᕐᒧᑦ ᐸᕐᓇᐃᖅᕕᐅᓯᒪᔪᓄᑦ.
ᓄᓇᕗᑦ ᐸᕐᓇᐃᔨᒃᑯᑦ ᑲᔪᓯᓯᒪᔪᑦ ᐊᑐᓕᖅᑎᑦᑎᕙᓪᓕᐊᓂᕐᒥᒃ ᓄᓇᑖᕈᑏᑦ ᐃᓗᓕᖏᓐᓂᒃ 11-ᒦᑦᑐᓂᒃ ᒪᓕᒃᑕᐅᓪᓗᑎᒃ ᒪᓕᒐᐃᑦ ᓴᕿᑕᐅᓯᒪᔪᑦ ᐊᑖᓃᑦᑐᑦ ᑳᓐᑐᓛᖑᔪᑦ ᐱᔾᔪᑎᖃᖅᑐᑦ ᐊᑐᓕᖅᑎᑕᐅᓂᖏᓐᓂᒃ ᓄᓇᕗᒻᒥ ᓄᓇᑕᕈᑎᓂᒃ ᐊᖏᕈᑎᓂᒃ (ᑳᓐᑐᓚᖑᔪᐃᑦ). ᑳᓐᑐᓛᖑᔪᓂ ᐃᓱᒪᓇᖅᑐᖅ “ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑏᑦ ᓄᓇᕗᒻᒥ ᓄᑖᕆᔭᐅᓯᒪᔪᒥ ᑲᔪᓯᑎᑕᐅᓂᐊᖅᑐᑦ ᓄᓇᕗᑦ ᐸᕐᓇᐃᔨᒃᑯᖏᓐᓄᑦ, ᐊᕕᒃᑐᖅᓯᒪᓂᐅᔪᑦ ᒪᓕᒃᑕᐅᓗᑎᒃ, ᒪᓕᒃᑕᐅᓗᑎᒡᓗ ᐋᕿᐅᒪᔭᐅᓯᒪᔪᑦ ᐸᕐᓇᐅᑎᐊᓕᐊᖑᓯᒪᔪᑦ ᓄᓇᐃᑦ ᐱᔾᔪᑕᐅᓪᓗᑎᒃ.” ᐊᕐᕋᒍᒐᓴᐅᓕᖅᑐᓂ ᐊᓂᒍᖅᑐᓂ, ᐸᕐᓇᐃᔨᒃᑯᑦ ᐱᓕᕆᓯᒪᓕᖅᐳᑦ ᕿᑎᖅᒥᐅᑦ ᐱᖓᖕᓇᖓᓂ, ᕿᑭᖅᑖᓘᑉ ᓂᒋᐊᓂ, ᐊᒻᒪᓗ ᐊᑯᓐᓂᕐᒥ ᐸᕐᓇᐃᔭᐅᑎᖏᓐᓂ ᓄᓇᕗᒻᒥ. ᐱᓕᕆᓂᖏᓐᓂ ᓴᕿᑦᑎᓚᐅᖅᑐᑦ ᑎᑎᕋᖅᑕᐅᓵᖅᓯᒪᔪᓂᒃ ᐸᕐᓇᐅᑎᖏᓐᓂᒃ ᕿᑎᖅᒥᐅᑦ ᐱᖓᖕᓇᖓᓄᑦ, ᐃᓄᓕᒫᓄᑦ ᑲᑎᒻᒪᐅᑕᐅᓯᒪᓕᖅᓱᑎᒃ ᔫᓐ 1998−ᒥ, ᒪᐃ 2002-ᒥ, ᐊᒻᒪᓗ ᔭᓄᐊᕆ 2005-ᒥ. ᑕᐃᔅᓱᒪᓂ ᐃᓄᓕᒫᑦ ᓈᓚᒋᐊᖅᑐᖅᑕᐅᒐᒥᒃ 2005−ᒥ, ᓄᓇᕗᑦ ᒐᕙᒪᒃᑯᖏᑦ, ᑲᓇᑕᐅᑉ ᒐᕙᒪᑯᖏᑦ ᐊᒻᒪᓗ ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖏᑦ ᐅᖃᓚᐅᖅᓯᒪᔪᑦ ᓄᓇᕗᑦ ᐸᕐᓇᐃᔨᒃᑯᑦ ᐸᕐᓇᐃᔨᐅᖁᔭᐅᓪᓗᑎᒃ ᓄᓇᕗᓕᒫᒧᑦ ᑐᕋᖔᕐᓂᐊᖅᑐᓂᒃ.
