ᐃᓚᖏᑦ ᓄᓇᐃᑦ ᐊᑐᖅᑕᐅᓂᖏᑦ ᓈᒻᒪᐅᑎᖑᕗᑦ, ᐃᓚᖏᓪᓗ ᓈᒻᒪᐅᑎᓲᖑᓇᑎᒃ, ᓲᕐᓗ ᐊᖏᔫᑎᓂᒃ ᓴᓇᕝᕕᓕᐅᕈᒪᓂᖅ/ᐃᖃᓇᐃᔭᕐᕕᒃᓴᓕᐅᕈᒪᓂᖅ ᐊᑦᑕᕐᓇᖅᑐᓂ ᐆᒪᔪᖃᕐᕕᐅᔪᓂ. ᓄᓇᐃᑦ ᐊᑐᑎᖏᓐᓂᒃ ᐸᕐᓇᐃᓂᖅ ᐋᕿᒍᑕᐅᓇᓱᐊᓲᖑᕗᖅ ᓈᒻᒪᖏᓕᐅᕈᑎᓂᕐᒧᑦ ᐊᔾᔨᒌᖏᑦᑐᑎᓂᒃ ᓄᓇᒥᒃ ᐊᑐᕈᒪᔪᓂ, ᓇᓗᓇᐃᔭᖅᑕᐅᓪᓗᑎᒃ ᖃᓄᐃᑦᑐᑦ ᓄᓇᐃᑦ ᖃᓄᐃᑦᑐᓄᑦ ᓈᒻᒪᖕᓂᐊᕐᒪᖔᑕ, ᖃᖓᒃᑰᖓᔭᕆᐊᖃᕐᓂᐊᕐᒪᖔᑕ, ᐊᒻᒪᓗ ᖃᓄᐃᓕᖓᖃᑦᑕᕆᐊᖃᕐᓂᐊᕐᓂᖏᓐᓂᒃ. ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐃᓂᖅ ᐊᑐᑕᐅᕗᖅ ᐊᑯᓂᐅᔪᒧᑦ ᑐᕌᖓᔪᓄᑦ ᐃᓅᓯᓕᕆᓂᕐᒧᑦ, ᐃᓕᖅᑯᓯᕐᒧᑦ, ᑮᓇᐅᔭᓕᐅᕐᓂᕐᒧᑦ, ᐊᒻᒪᓗ ᓄᓇᒥᐅᑕᖃᑦᑎᐊᕆᐊᖃᕐᓂᕐᒧᑦ ᑐᕌᒐᕆᔭᐅᔪᓂᒃ ᐊᒻᒪᓗ ᐱᒻᒪᕆᐅᑎᑕᐅᔪᓂᒃ ᐊᕕᒃᑐᖅᓯᒪᓂᖏᓐᓂ ᐃᓱᒪᒋᔭᐅᔭᕆᐊᖃᓲᖑᕗᑦ ᐃᓱᒪᓕᐅᕈᑕᐅᓂᖏᓐᓂ ᓄᓇᐃᑦ ᐊᑐᖅᑕᐅᓂᐊᕐᓂᖏᓐᓄᑦ ᐸᕐᓇᐅᑎᒃ.ᐃᑦ. ᐸᕐᓇᐅᑏᑦ ᐃᓚᖃᖃᑦᑕᕐᒥᔪᑦ ᓇᓗᓇᐃᒃᑯᑕᕐᓂᒃ ᑎᓕᓯᓯᒪᔾᔪᑎᒃᓴᓂᒡᓗ ᓄᓇᒥᐅᑕᐃᑦ ᐊᑐᖅᑕᐅᔪᓐᓇᕐᓂᖏᓐᓂᒃ ᐊᒻᒪᓗ ᓴᓇᕝᕕᐅᔪᓐᓇᕐᓂᖏᓐᓂᒃ ᓄᓇᕗᑦ ᐃᓗᐊᓂ.

 

ᓄᓇᕗᑦ ᐸᕐᓇᐃᔨᒃᑯᑦ ᓴᓇᕙᒃᑐᑦ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᓂᒃ ᐊᕐᕋᒍᒐᓴᖕᓂ ᑐᑭᓯᓂᐊᖃᑦᑕᖅᓯᒪᓪᓗᑎᒃ ᓯᕗᓂᐊᒍᑦ ᐊᒻᒪᓗ ᖃᐅᔨᓴᕆᐊᖅᓯᒪᖃᑦᑕᖅᓱᑎᒃ ᓄᓇᓕᖕᓂ, ᒐᕙᒪᓂᒃ, ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᐃᖃᓇᐃᔭᕐᕕᒡᔪᐊᓕᖕᓂᒃ, ᐊᒻᒪᓗ ᒐᕙᒪᐅᖏᑦᑐᒥᒃ ᑎᒥᐅᔪᓂᒃ. ᐸᕐᓇᐃᔨᒃᑯᑦ ᐊᖏᖅᓯᒪᓕᖅᑐᑦ ᐸᕐᓇᐅᑎᓂᒃ ᒪᕐᕈᐃᓐᓈᖕᓂᒃ 6−ᖑᔪᓂ ᐸᕐᓇᐃᕕᐅᔭᕆᐊᖃᖅᑐᓂ ᐊᕕᒃᑐᖅᓯᒪᔪᓂ ᓄᓇᕗᒻᒥ. ᐊᑕᐅᓯᖅ ᐸᕐᓇᐅᑎᓕᐊᖑᓂᐊᖅᑐᖅ ᐊᑯᓂᐅᑎᒋᔪᓐᓇᕐᒪᑦ 4-5−ᓂᒃ ᐊᕐᕋᒍᓂᒃ ᓴᓇᔭᐅᕙᓪᓕᐊᓂᖓᓂ. ᐸᕐᓇᐃᑦᑎᐊᕐᓂᖅᓴᐅᔪᒪᓪᓗᑎᒃ, ᐸᕐᓇᐃᔩᑦ ᐱᓕᕆᖔᕐᓂᐊᓕᖅᑐᑦ ᐊᑕᐅᓯᕐᒥᒃ ᐸᕐᓇᐅᑎᓕᐅᓂᕐᒥᒃ ᑕᒪᐃᓐᓄᑦ ᑐᕌᖓᓂᐊᖅᑐᓂᒃ ᓄᓇᕗᓕᒫᒧᑦ ᒪᓕᒃᑕᐅᓗᑎᒃ ᐃᓗᓕᖏᑦ 11.5.1 ᓄᓇᕗᒻᒥ ᓄᓇᑖᕈᑎᓂᒃ ᐊᖏᕈᑎᓂᒃ. ᑕᒪᓐᓇ ᐊᑐᖅᑕᐅᒋᐊᖅᐸᓪᓕᐊᓕᓵᖅᐳᖅ.

ᓄᓇᕗᓕᒫᒥ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑏᑦ ᑲᑎᑎᖅᓯᒪᓂᐊᖅᑐᑦ ᓄᓇᓕᖕᓂ, ᐊᕕᒃᑐᖅᓯᒪᓂᐅᔪᓂ ᐊᒻᒪᓗ ᓄᓇᕗᓕᒫᒥ ᐃᓱᒪᓘᑕᐅᔪᓂᒃ, ᑐᕌᒐᕆᔭᐅᔪᓂᒃ ᐊᒻᒪᓗ ᑎᑭᐅᑎᔭᐅᔪᒪᔪᓂᒃ ᐊᑕᐅᓯᕐᒦᓪᓗᑎᒃ ᐱᓕᕆᐊᒃᓴᐅᓂᐊᖅᑐᓂᒃ, ᓇᓗᓇᐃᒃᑯᑕᕆᔭᐅᓗᑎᒃ ᓄᓇᐃᑦ ᐊᑐᖅᑕᐅᓂᖏᓐᓄᑦ ᓄᓇᕗᒻᒥ. ᐸᕐᓇᐃᔩᑦ ᐱᔭᕆᖅᓯᕙᓪᓕᐊᓂᐊᖅᑐᑦ ᑖᔅᓱᒥᖓ ᐊᖏᔪᒥᒃ ᐸᕐᓇᐅᑎᒥᒃ ᐱᕙᓪᓕᐊᕋᐅᔭᕐᓗᒍ ᐊᕕᒃᑐᖅᓯᒪᓗᒍ. ᓯᕗᓪᓕᕐᒥ ᐱᓕᕆᐊᒃᓴᓂᒃ ᓇᓗᓇᐃᔭᐃᓂᐊᖅᑐᑦ ᓄᓇᓕᖕᓂᒃ, ᐊᕕᒃᑐᖅᓯᒪᓂᐅᔪᓂᒃ, ᓄᓇᕗᓕᒫᒥᓗ ᑐᕌᒐᕆᔭᐅᔪᓂᒃ, ᐊᑐᖅᑕᐅᓗᑎᒃ ᐱᑕᖃᕇᖅᑐᑦ ᖃᐅᔨᒪᔭᐅᔪᒃᓴᐃᑦ, ᓄᑖᕈᕆᐊᖅᑕᐅᓗᑎᒃ ᐱᑕᖃᕇᖅᑐᑦ ᐸᕐᓇᐅᑏᑦ, ᐊᒻᒪᓗ ᑕᒪᐃᓐᓂᒃ ᓇᓗᓇᐃᖅᑎᖅᑕᐅᓗᑎᒃ ᓄᓇᐃᑦ ᐊᑐᑎᒃᓴᖏᑦ ᓄᓇᕗᓕᒫᒥ. ᐊᒻᒪᓗ ᑕᐃᒪ, ᐱᔭᕆᐊᑐᓂᖅᓴᐃᑦ ᐃᓱᒪᓘᑕᐅᔪᑦ ᐋᕿᐅᒪᕙᓪᓕᐊᓂᖏᓐᓂ, ᐸᕐᓇᐃᔨᒃᑯᑦ ᐋᕿᒋᐊᕆᓂᐊᖅᑐᑦ ᓄᓇᕗᓕᒫᒨᖓᔪᓂᒃ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᓂᒃ, ᐊᑐᓕᖅᑎᑕᐅᕙᓪᓕᐊᓗᑎᒃ ᓄᑖᑦ ᑎᓕᔭᐅᓯᒪᔪᑦ.  ᑕᒡᕘᓇ, ᓄᓇᕗᒧᑦ ᐸᕐᓇᐅᑏᑦ ᐊᑐᑎᖃᑦᑎᐊᕈᓐᓇᕐᓂᐊᖅᑐᑦ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐊᐅᓚᑦᑎᓂᕐᒧᑦ ᕿᓚᒻᒥᐅᓂᖅᓴᓂ ᐊᕐᕋᒍᓂ. ᐃᓗᓇᖓ ᑕᒪᓐᓇ ᐊᑐᖅᑕᐅᒋᐊᖅᓯᒪᔪᖅ ᑲᔪᓯᓂᐊᖅᑐᒃᓴᐅᕗᖅ ᐱᓕᕆᐊᖑᓂᖓ ᐊᕐᕋᒍᒐᓴᐅᓂᐊᖅᑐᓄᑦ.

ᓄᓇᕗᓕᒫᒧᑦ ᐸᕐᓇᐅᑏᑦ ᐊᖏᖅᑕᐅᓯᒪᔭᕆᐊᖃᕐᓂᐊᖅᑐᑦ ᑐᓐᖓᕕᒃᑯᓐᓄᑦ, ᐊᕕᒃᑐᖅᓯᒪᓂᐅᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᓄᓇᕗᑦ ᒐᕙᒪᒃᑯᖏᓐᓄᑦ, ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ. ᐊᖏᖅᑕᐅᕌᓂᒃᐸᑕ, ᑕᐃᒃᑯᐊ ᑭᓯᐊᓂ ᐱᓕᕆᐊᒃᓴᐃᑦ ᒪᓕᒃᑐᑦ ᐸᕐᓇᐅᑎᓂᒃ ᑲᔪᓯᔪᓐᓇᖅᓯᔪᒫᖅᑐᑦ. ᓄᓇᕗᓕᒫᒧᑦ ᐸᕐᓇᐅᑏᑦ ᕿᒥᕐᕈᐊᖅᑕᐅᓚᐅᖃᑦᑕᕐᓂᐊᖅᑐᑦ ᖃᖓᑐᐃᓐᓇᕐᓗ ᐋᕿᒋᐊᖅᑕᐅᔪᓐᓇᖃᑦᑕᕐᓂᐊᖅᓱᑎᒃ.