ᓴᓇᕙᓪᓕᐊᓂᖅ ᓄᓇᕗᒻᒥ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᓂᒃ
ᓄᓇᕗᒻᒥ ᓄᓇᑖᕈᑏᑦ ᐃᓗᓕᖃᕐᒪᑕ ᒪᓕᒐᕐᓂᒃ ᑲᒥᓯᓇᒃᑯᑦ ᓴᕿᑦᑎᔭᕆᐊᖃᕐᓂᖏᓐᓂᒃ ᓄᓇᕗᒻᒧᑦ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᓂᒃ. ᓄᓇᕗᒻᒥ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑏᑦ ᐊᑐᕐᓂᐊᖅᑐᑦ ᐊᐅᓚᑦᑎᓂᕐᒧᑦ ᓄᓇᓂᒃ ᐱᖓᓱᓂᒃ ᐳᖅᑐᓂᓕᖕᓂ − ᓄᓇᓂᒃ ᓄᓇᓕ ᐊᕙᓗᐊᓂ, ᐊᕕᒃᑐᖅᓯᒪᓂᐅᔪᓂ ᑕᒪᐃᓐᓂᓗ ᓄᓇᕗᓕᒫᒧᑦ. ᐱᓕᕆᓂᐊᖅᑐᒍᑦ ᓴᓇᕙᓪᓕᐊᓂᖅ ᐸᕐᓇᐅᑎᓂᒃ ᐅᖃᖃᑎᒋᓗᒋᑦ ᓄᓇᓖᑦ ᖃᐅᔨᔭᖅᑐᕐᓗᒋᑦ ᑐᕌᒑᕆᔪᒪᔭᖏᑦ ᐊᒻᒪᓗ ᐃᓱᒪᓘᑎᒋᔭᖏᑦ ᐱᔾᔪᑎᖃᖅᑎᓪᓗᒋᑦ ᓄᓇᓂᒃ ᓯᓚᑖᓂ ᕼᐊᒻᒪᓚᑦᑯᑦ ᐱᖁᑎᖏᓐᓂᒃ ᓄᓇᓂᒃ. ᐅᖃᖃᑎᒋᕙᒃᑕᕗᑦ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖃᐅᔨᔪᒪᓪᓗᒋᑦ ᑐᕌᒐᕆᔭᖏᑦ ᐊᒻᒪᓗ ᐃᓱᒪᓘᑎᒋᔭᖏᑦ ᐱᒻᒪᕆᐅᖕᒪᑕ ᓇᓂᑐᐃᓐᓇᖅ ᑕᒪᐃᓐᓂ ᐊᕕᒃᑐᖅᓯᒪᓂᐅᔪᓂ. ᐊᒻᒪᑦᑕᐅᖅ, ᐅᖃᖃᑎᒋᕙᖕᒥᔭᕗᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ ᖃᐅᔨᔪᒪᓪᓗᒋᑦ ᓇᓪᓕᖏᑦ ᑐᕌᒐᕆᔭᐅᔪᑦ ᐊᒻᒪᓗ ᐃᓱᒪᓘᑕᐅᔪᑦ ᐊᔾᔨᒌᖕᒪᖔᑕ ᑕᒪᐃᓐᓂ ᓄᓇᕗᓪᓕᒫᒥ. ᐃᓄᓕᒫᕐᓂᒃ ᐱᔾᔪᔾᔨᔨᐅᓪᓗᑎᒃ, ᑕᐃᒫᒃᓴᐃᓐᓇᖅ ᐅᖃᖃᑎᖃᓲᖑᖕᒥᔪᒍᑦ ᒐᕙᒪᒃᑯᓐᓂᒃ, ᐃᖃᓇᐃᔭᕐᕕᒡᔪᐊᓕᖕᓂᒃ (ᓴᓇᔨᓂᒃ) ᐊᒻᒪᓗ ᐊᓯᖏᓐᓂᒃ ᐃᓚᒋᔭᐅᔭᕆᐊᖃᖅᑐᓂᒃ ᑎᒥᐅᔪᓂᒃ.
- ᓄᓇᕗᒻᒥ ᐃᓱᒪᓘᑕᐅᔪᓐᓇᕐᒪᑦ ᐱᑕᖃᑦᑎᐊᕆᐊᖃᕐᓂᖏᑦ ᐃᓄᖕᓄᑦ ᐃᑲᔫᓯᐊᒃᓴᐃᑦ ᓴᓇᔪᖃᕐᓂᐊᖅᐸᑦ ᐊᖏᔪᒥᒃ.
- ᐊᕕᒃᑐᖅᓯᒪᓂᐅᔪᒥ ᐃᓱᒪᓘᑕᐅᔪᓐᓇᖅᑐᖅ ᓴᐳᓐᓂᐊᖅᑕᐅᓯᒪᑦᑎᐊᕆᐊᖃᕐᓂᖏᑦ ᓯᓈ.
- ᓄᓇᓕᖕᒥᐅᓂ ᐃᓱᒪᓘᑕᐅᔪᓐᓇᖅᑐᖅ ᓴᐳᓐᓂᐊᖅᑕᐅᓯᒪᑦᑎᐊᕆᐊᖃᕐᓂᖏᑦ ᐃᒪᐃᑦ ᐃᒥᖅᑕᕐᕕᐅᓲᑦ ᕼᐊᒻᒪᓚᑦᑯᑦ ᓯᓚᑖᓂᒃ ᐱᔭᐅᖃᑦᑕᖅᑐᑦ.
ᓄᓇᐃᑦ ᐊᑐᖅᑕᐅᓂᕆᓂᐊᖅᑕᖏᓐᓄᑦ ᐸᕐᓇᐅᑏᑦ ᐊᑯᓂᐊᓗᒃ ᓴᓇᔭᐅᓇᓱᐊᓲᖑᖕᒪᑕ. ᐊᒥᓱᒻᒪᕆᐊᓗᖕᓄᑦ ᐃᓄᖕᓄᑦ ᐅᖃᕆᐊᖃᓲᖑᒐᑕ, ᐊᒻᒪᓗ ᐊᖏᔪᒻᒪᕆᖕᒥᒃ ᑐᑭᓯᓂᐊᖅᓯᒪᖃᑦᑕᕆᐊᖃᖅᓱᑕ ᑐᑭᓯᐅᒪᔪᒪᓪᓗᒋᑦ ᐊᔾᔨᒌᖏᑦᑐᑎᑦ ᓄᓇᐃᑦ ᐊᑐᖅᑕᐅᖁᔭᐅᓂᖏᑦ, ᐃᓱᒪᓘᑕᐅᔪᓪᓗ ᑐᑭᓯᔭᕆᐊᖃᖅᓱᒋᑦ ᐊᒻᒪᓗ ᓇᓂᓯᔭᕆᐊᖃᖅᓱᑕ ᖃᓄᖅᑐᕈᑕᐅᓂᐊᖅᑐᓂᒃ ᑕᒪᒃᑯᓄᖓ ᐃᓱᒪᓘᑕᐅᔪᓄᑦ. ᓄᓇᕗᑦ ᓄᓇᖓ ᐊᖏᔪᐊᓘᖕᒪᑦ, ᑕᐃᒪᐃᓐᓂᖓᓄᓪᓗ ᐅᑕᕿᔭᕆᐊᖃᓱᖑᕗᑦ ᑭᓯᐊᓂ ᓇᓗᓇᐃᔭᖅᑕᐅᓯᒪᑦᑎᐊᖅᑐᓂᒃ ᐸᕐᓇᐅᑏᑦ ᐃᓂᖅᑕᐅᑦᑎᐊᖅᐸᑕ ᑕᒪᐃᓐᓂ ᓄᓇᕗᑦ ᐊᕕᒃᑐᖅᓯᒪᓂᖏᓐᓂ, ᐊᑯᓂᐊᓘᕈᓐᓇᕐᒪᑦ − ᐃᓚᖏᓐᓂᓗᓐᓃᑦ 8−ᓂᒃ ᐊᕐᕋᒍᓂᒃ ᐊᑯᓂᐅᑎᒋᓯᒪᕗᑦ. ᓄᓇᕗᑦ −ᓂᒃ ᐊᕐᕋᒍᓂᒃ ᐅᑕᕿᒃᑲᓐᓂᕈᓐᓇᐃᓪᓕᖕᒪᑦ. ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑏᑦ ᐱᑕᖃᖏᑉᐸᑕ, ᐅᖃᐅᔾᔪᖅᑕᐅᔾᔪᑎᒃᓴᖃᖏᓚᑦ ᐊᖏᔪᑎᓂᒃ ᓴᓇᔪᒪᔪᑦ ᓄᓇᒥ ᐊᒻᒪᓗ ᒐᕙᒪᒃᑯᓐᓂᒃ, ᓇᓗᓇᐃᖅᓯᓇᔭᖅᑐᓂᒃ ᖃᓄᖅ ᓄᓇᓕᖕᒥᐅᑦ ᐊᐅᓚᑕᐅᖁᔨᖕᒪᖔᑕ ᓄᓇᒥᓂᒃ.
ᑕᒪᕐᒥᒃ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑏᑦ ᐃᓂᖅᓯᒪᓂᐊᖅᐸᑕ ᑕᒪᕐᒥᒃ ᓄᓇᕗᒧᑦ ᓱᒃᑲᔪᒥᒃ, ᐸᕐᓇᐃᔨᒃᑯᑦ ᐱᓕᕆᕙᓪᓕᐊᔭᕆᐊᖃᕐᓂᐊᖅᐳᑦ ᐊᕕᒃᑐᖅᓯᒪᔪᓂᒃ ᐱᕙᓪᓕᐊᓗᑎᒃ. ᐃᓚᖏᑦ ᐃᓱᒪᓘᑕᐅᔪᑦ ᐊᔪᕐᓇᖏᑦᑐᑯᓘᓂᐊᖅᑐᑦ ᐋᖀᒃᑕᐅᔪᓐᓇᕐᓂᖏᓐᓄᑦ. ᐃᓚᖏᑦ ᐊᕕᒃᑐᖅᓯᒪᓂᐅᔪᓂ ᑐᕌᒐᕆᔭᐅᔪᑦ ᑐᑭᓯᓇᑦᑎᐊᕐᓂᐊᕐᒥᔪᑦ. ᓯᕗᓪᓕᖅᐹᒥᒃ ᐱᒋᐊᓕᓵᖏᓐᓇᑦᑕ. ᐊᖏᖅᑕᐅᓯᒪᔪᖅᑕᖃᓕᐊᓂᒃᑐᖅ ᐸᕐᓇᐅᑎᓂᒃ ᕿᑭᖅᑖᓘᑉ ᐅᐊᖕᓇᖓᓄᑦ, ᑭᕙᓪᓕᕐᒧᑦ, ᑎᑎᕋᖅᑕᐅᓵᖅᓯᒪᔪᑦ ᐸᕐᓇᐅᑏᑦ ᕿᑎᖅᒥᐅᑦ ᐱᖓᖕᓇᖓᓄᑦ ᐊᒻᒪᓗ ᐃᓂᖅᓯᒪᓕᖅᓱᑎᒃ ᐸᕐᓇᐃᓂᕐᒧᑦ ᐱᓕᕆᐊᖑᔪᑦ ᕿᑭᖅᑖᓘᑉ ᓂᒋᐊᓄᑦ. ᑕᒪᕐᒥᒃ ᑕᒪᒃᑯᐊ ᐱᓕᕆᐊᖑᔪᑦ ᓄᑖᕈᖅᑎᖅᑕᐅᓯᒪᓕᖅᑐᑦ ᐃᓕᔭᐅᓯᒪᓪᓗᑎᒡᓗ ᓄᓇᕗᒻᒧᑦ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᒃᓴᓄᑦ. ᑐᑭᓯᐊᑦᑎᐊᕈᒪᒐᑭᑦ ᑐᕌᒐᕆᔭᐅᔪᑦ ᐊᒻᒪᓗ ᓂᕈᑐᔪᑦ ᑕᒪᐃᓐᓄᑦ ᖃᓄᐃᓕᐅᕈᑕᐅᖁᔭᐅᔪᑦ ᓄᓇᕗᒻᒦᑐᓄᑦ, ᒪᓕᒃᓗᒋᑦ ᖃᐅᔨᔭᐅᕙᓪᓕᐊᓯᒪᔪᑦ ᐱᕙᓪᓕᐊᔾᔪᑕᐅᓂᐊᕐᒪᑕ ᓄᓇᓕᖕᒥᐅᑦ ᐋᕿᐅᒪᖁᔭᖏᑦ ᓴᕿᑕᐅᓂᐊᕐᓂᖏᓐᓄᑦ ᐊᔪᕐᓇᕈᓐᓃᑐᐊᖅᐸᑦ. ᑕᐃᒪᐃᓕᐅᕌᓂᒍᓐᓇᖅᑐᒍᑦ ᐊᒥᓲᖏᑦᑐᓂ ᐊᕐᕋᒍᓂ. ᑕᐃᒃᑯᐊ ᓂᕈᑐᔪᑦ ᓄᓇᕗᓕᒫᒨᖑᔪᑦ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑏᑦ ᐊᖏᖅᑕᐅᒃᐸᑕ ᑲᔪᓯᑐᐃᓐᓇᕐᓂᐊᖅᑐᒍᑦ ᐱᓕᕆᖃᑎᖃᕐᓂᕐᒥᒃ ᐱᖓᓱᓂᒃ ᐳᖅᑐᓂᓕᖕᓂᒃ ᓄᓇᓕᖕᓂᒃ, ᓄᓇᕗᓕᒫᒥ, ᐊᕕᒃᑐᖅᓯᒪᓂᐅᔪᓂ, ᐊᒻᒪᓗ ᓄᓇᓕᖕᓂ, ᐱᔭᕇᖅᑕᐅᖁᓪᓗᒋ ᓇᓗᓇᐃᖅᑕᐅᓯᒪᓂᖅᓴᐃᑦ ᐊᒃᓱᕈᕐᓇᖅᑐᓄᑦ ᐃᓱᒪᓘᑖᐅᔪᓄᑦ, ᖃᓄᖅ ᐊᖏᕈᑎᑖᕋᓱᐊᕐᓂᕐᒥᒃ ᐊᐅᓚᑦᑎᓂᕐᒧᑦ ᐃᓱᒪᓘᑕᐅᔪᓂᒃ ᐊᒃᓱᕈᕐᓇᕐᓂᖅᓴᐅᓂᐊᓕᖅᑎᓪᓗᒋᑦ. ᐊᒻᒪᓗ ᐱᔭᕇᖅᐸᓪᓕᐊᓕᖅᑎᓪᓗᑕ ᖃᐅᔨᓴᕆᐊᑦᑎᐊᒃᑲᓐᓂᕐᓗᑕ ᐊᒻᒪᓗ ᑐᑭᓯᓂᐊᕐᕕᖃᑦᑎᐊᒃᑲᓐᓂᕐᓗᑕ, ᓇᓂᓯᒍᑦᑕᓗ ᖃᓄᖅᑐᕈᑎᒃᓴᓂᒃ ᐱᔭᕆᐊᑐᓂᖏᓐᓄᑦ ᐃᓱᒪᓘᑖᐅᔪᓄᑦ, ᐋᕿᒋᐊᖅᑕᐅᔪᒫᖅᐳᑦ ᐸᕐᓇᐅᑏᑦ ᐃᓚᖃᓕᕐᓂᐊᕐᒪᑕ ᐃᓕᑦᑎᓯᒪᔭᑦᑎᓐᓂᒃ, ᐃᓚᔭᐅᕙᓪᓕᐊᕋᐅᔭᐃᓐᓇᕐᓗᑎᒃ.
ᓴᓇᕙᓪᓕᐊᓂᖅ ᓄᓇᕗᒻᒥ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᓂᒃ ᐃᒡᓗᕕᒐᓕᐅᖅᑐᔭᕐᓇᕐᒪᑦ.
- ᓯᕗᓪᓕᖅᐹᒥ ᓂᕈᐊᕆᐊᖃᖅᐳᒍᑦ ᓈᒻᒪᒃᑐᒥᒃ ᐊᐳᒻᒥᒃ. ᑕᒪᒃᑯᐊ ᑕᒡᕙ ᓂᕈᑐᔫᕗᑦ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᒃᓴᐃᑦ, ᐊᑐᒐᕆᔭᐅᓂᐊᖅᑐᑦ, ᑎᑭᐅᒪᔭᐅᔪᒪᓂᐊᖅᑐᑦ ᐊᒻᒪᓗ ᑐᕌᒐᕆᔭᐅᔪᑦ ᓄᓇᕗᒻᒥ ᓄᓇᑖᕐᕕᐅᓯᒪᔪᒥ.
- ᐊᒻᒪᓗ ᐃᓱᒪᓕᐅᓕᕐᒥᓗᑕ ᖃᓄᖅ ᐊᖏᑎᒋᓂᐊᕐᒪᖔᑦ ᐃᒡᓗᕕᒐᒃᓴᖅ. ᑕᒡᕘᓇ ᓇᓗᓇᐃᖅᑎᕆᕗᑦ ᓄᓇᐃᑦ ᐊᑐᖅᑕᐅᔪᓐᓇᕐᓂᖏᓐᓄᑦ ᐃᓱᒪᓘᑕᐅᔪᑦ ᐊᒻᒪᓗ ᑐᕌᒐᕆᔭᐅᔪᑦ ᐊᕕᒃᑐᖅᓯᒪᓂᐅᔪᓂ ᓄᓇᓕᖕᓂᓗ. ᐊᐳᑏᑦ ᑭᑉᐸᕆᒃᑐᐃᑦ ᐊᒡᒍᖅᑕᐅᓯᒪᔪᑦ ᑭᒡᒐᖅᑐᐃᕗᑦ ᐃᓱᒪᓘᑕᐅᔪᓂᒃ ᐊᒻᒪᓗ ᑐᕌᒐᕆᔭᐅᔪᒪᔪᓂᒃ. ᐊᖏᓂᖅᓴᐅᒃᐸᑕ ᐃᒡᓗᕕᒐᖅ, ᐊᖏᓂᖅᓴᐅᔭᕆᐊᖃᖅᐳᑦ ᑭᑉᐹᕆᒃᑐᑎᑦ ᐊᐳᒻᒥᒃ ᐊᒡᒍᖅᓯᒪᔪᑦ, ᐊᑯᓂᐅᓂᖅᓴᕐᓗ ᐃᒡᓗᕕᒐᓕᐅᕆᐊᖃᖅᓱᑎᒃ. ᑕᐃᒫᒃᓴᐃᓐᓇᖅᑕᐅᖅ, ᐊᖏᓂᖅᓴᐅᒍᑎᒃ ᐃᓱᒪᓘᑕᐅᔪᑦ, ᐊᑯᓂᐅᓂᖅᓴᖅ ᖃᓄᖅᑐᕈᑎᒃᓴᖅᓯᐅᕆᐊᖃᖅᐳᒍᑦ, ᐊᑯᓂᐅᓂᖅᓴᕐᓗ ᐱᔭᕇᖅᑕᐅᓇᓱᐊᕆᐊᖃᖅᐳᖅ ᐸᕐᓇᐅᑎᒃᓴᖅ.
- ᐊᓱᐃᓛᒃ ᐅᓗᐊᖅᑕᐅᓕᖅᐳᑦ ᑭᑉᐹᕇᒃᑐᒃᓴᐃᑦ ᐊᕙᓗᐊᓄᐊᖅᑎᖅᑕᐅᓪᓗᑎᒡᓗ. ᓴᓂᕋᓕᐅᖅᑕᐅᓕᖅᐳᖅ ᐊᒻᒪᓗ ᖁᓛ. ᑕᒪᓐᓇ ᑭᒡᒐᖅᑐᐃᔪᖅ ᑕᒪᐃᓐᓂᒃ ᓄᓇᕗᓕᒫᒥ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᓂᒃ. ᐱᒻᒪᕆᐅᕗᖅ ᑕᐃᒪ ᐅᕕᖓᔭᕆᐊᖃᕐᓂᖏᑦ ᑭᑉᐹᕆᒃᑐᐃᑦ ᓈᒻᒪᓈᑦᑎᐊᕐᓗᒋᑦ ᐊᑕᑕᑦᑎᐊᕈᓐᓇᕐᓂᐊᕐᒪᑕ ᑲᑎᓪᓗᑎᒃ. ᐱᒻᒪᕆᐅᒋᕗᖅ ᓂᕈᑐᔪᑦ ᓄᓇᕗᓕᒫᒧᑦ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑏᑦ ᐃᑲᔪᖅᓱᐃᓯᒪᔭᕆᐊᖃᕐᓂᖏᑦ ᐱᒻᒪᕆᐅᓂᖅᐹᓂᒃ ᐃᓱᒪᓘᑕᐅᔪᓂᒃ ᐊᒻᒪᓗ ᑐᕌᒐᕆᔭᐅᔪᓂᒃ ᐊᕕᒃᑐᖅᓯᒪᔪᓂ, ᓄᓇᓕᖕᓂ, ᑕᐃᒫᒃ ᓯᕗᓂᒃᓴᒥ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑏᑦ ᓈᒻᒪᓈᑦᑎᐊᕐᓂᐊᕐᒪᑕ ᓄᓇᕗᓕᒫᒧᑦ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᕐᔪᐊᕐᓄᑦ.
- ᑭᖑᓪᓕᖅᐹᒥ, ᓴᓇᔭᐅᓂᖓ ᐃᒡᓕᒃᓴᖅ ᐊᒻᒪᓗ ᓇᑎᒃᓴᖅ ᑭᒡᒐᖅᑐᐃᓂᖃᕐᒥᔪᖅ ᑭᖑᓪᓕᖅᐹᕐᓂᒃ ᓇᓗᓇᐃᔭᖅᑕᐅᑦᑎᐊᕐᓂᖏᓐᓂᒃ ᓄᓇᕗᓕᒫᒥ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᓂᒃ, ᑕᒪᕐᒥᒃ ᐱᔭᕆᐊᑐᓂᖏᑦ ᐊᕕᒃᑐᖅᓯᒪᓂᐅᔪᓂ ᐊᒻᒪᓗ ᓄᓇᓕᖕᓂ ᐃᓱᒪᓘᑕᐅᔪᑦ ᐋᖀᐅᒪᔭᐅᓂᖏᓐᓂᒃ ᐃᓚᔭᐅᓂᖏᓐᓂᒡᓗ ᓄᓇᕗᓕᒫᒨᖓᔪᒥᒃ ᐸᕐᓇᐅᑎᓄᑦ.
ᓇᐃᓈᕐᓗᒋᑦ ᓂᕈᑐᔪᑦ ᓄᓇᕗᓕᒫᒧᑦ ᐸᕐᓇᐅᑏᑦ ᐃᓚᖃᕐᓂᐊᖅᑐᑦ ᐊᕕᒃᑐᖅᓯᒪᔪᓂᒃ ᓄᓇᓕᖕᓂ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᓄᑦ ᐃᓱᒪᓘᑕᐅᔪᓂᒃ. ᑕᒡᕙᓂᓕ ᒫᓐᓇᐅᔪᖅ ᐊᓯᖔᖏᓐᓂᒃ ᐱᓕᕆᓕᖅᑐᒍᑦ ᑭᖑᕙᕆᐊᖅᑎᑦᑎᓯᒪᔪᓐᓃᕋᑦᑕ ᓄᓇᓕᒫᒨᖓᔪᓂᒃ ᐸᕐᓇᐅᑎᓕᐅᖅᐸᓪᓕᐊᓂᖅ ᐊᕐᕋᒍᒐᓵᓗᖕᓄᑦ, ᐊᒥᓱᑦ ᐸᕐᓇᐃᔨᐅᖃᑕᐅᓲᑦ ᐃᓚᕗᑦ ᐊᔩᖃᑎᒌᓕᖅᑎᓪᓗᒋᑦ ᐱᔭᕆᐊᑐᔪᓂᒃ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᓂᒃ. ᑎᒍᒥᐊᕐᓂᐊᓕᖅᑕᕗᑦ ᐱᓕᕆᐊᕆᐊᓂᒃᓯᒪᔭᕗᑦ ᐸᕐᓇᐃᓂᕐᒧᑦ ᐱᓕᕆᐊᖑᓯᒪᔪᑦ, ᓄᑖᕈᕆᐊᖅᑎᖅᑕᐅᓪᓗᑎᒃ ᐃᓱᒪᓘᑖᐅᔪᑦ ᐊᒻᒪᓗ ᑐᕌᒐᕆᔭᐅᔪᑦ ᐊᒻᒪᓗ ᐊᖏᕈᑕᐅᓯᒪᓂᖏᓐᓂ ᒫᓐᓇᐅᔪᖅ ᐸᕐᓇᒃᓯᒪᓕᖅᑐᑦ ᑐᓂᔭᐅᓂᐊᕐᓂᖏᓐᓄᑦ ᑕᐃᒃᑯᐊ ᐸᕐᓇᐅᑏᑦ ᐊᖏᖅᑕᐅᓂᐊᓕᕐᒪᑕ. ᐱᔭᕆᐊᑐᔫᔪᑦ ᐃᓱᒪᓘᑕᐅᓱᒪᔪᑦ ᐋᕿᒃᑕᐅᕙᓪᓕᐊᓂᖏᓐᓂ, ᐋᕿᒋᐊᖅᑕᐅᕙᖕᓂᐊᕐᒥᔪᑦ, ᓄᑖᕈᕆᐊᖅᑕᐅᕙᒡᓗᑎᒃ ᐊᒻᒪᓗ ᐃᓚᔭᐅᕙᓪᓕᐊᖏᓐᓇᕐᓗᑎᒃ ᓄᓇᕗᓕᒫᕐᒧᑦ ᐸᕐᓇᐅᑎᓄᑦ.
