ᓄᓇᕗᒻᒥ ᐸᕐᓇᐃᔩᑦ ᑲᒥᓯᓇᒃᑯᖏᑦ ᓴᕿᑎᑦᑎᕗᑦ ᑎᑎᕋᖅᑕᐅᕌᓂᓵᖅᓯᒪᔪᓂᒃ ᓄᓇᕗᒻᒥ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑎᓂᒃ

ᓄᓇᕗᑦ ᓄᓇᓕᖏᑦ

ᓄᓇᕗᒻᒥ ᐸᕐᓇᐃᔩᑦ ᑲᒥᓯᓇᒃᑯᖏᑦ (ᑲᒥᓯᓇᒃᑯᑦ) ᓴᓇᓯᒪᓕᖅᐳᑦ ᐊᒻᒪᓗ ᐃᓄᓕᒫᓄᑦ ᓴᕿᑎᑦᑎᓯᒪᓕᖅᓱᑎᒃ ᑎᑎᕋᖅᑕᐅᕌᓂᓵᖅᓯᒪᓕᖅᑐᓂᒃ ᓄᓇᕗᒻᒥ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑎᓂᒃ (ᑎᑎᕋᖅᑕᐅᓵᖅᓯᒪᔪᓂᒃ ᐸᕐᓇᐅᑏᑦ). ᑎᑎᕋᖅᑕᐅᓵᖅᓯᒪᔪᑦ ᐸᕐᓇᐅᑏᑦ ᓯᕗᓪᓕᖅᐹᖑᖕᒪᑕ ᐃᓅᖃᑎᒌᒃᑐᓄᑦ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑕᐅᓕᖅᑐᑦ, ᐊᒻᒪᓗ ᑕᐃᒫᒃᓴᐃᓐᓇ ᐊᓯᒥᑎᑐᑦ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑎᑎᑐᑦ, ᐆᒪᔪᓂᕋᖅᑕᐅᕙᒃᐳᖅ ᑎᑎᖃᖏᑦ. ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑏᑦ ᐱᐅᓯᒋᐊᖅᑕᐅᕙᓪᓕᐊᖏᓐᓇᐅᔭᕐᒪᑕ ᐊᒻᒪᓗ ᐊᓯᖑᖅᑎᑕᐅᕙᓪᓕᐊᖏᓐᓇᖅᓱᑎᒃ ᖃᖓᖑᕌᖓᑦ ᐅᔾᔨᖅᑐᑦᑎᐊᕆᐊᖃᕐᓂᕐᒧᑦ ᐱᒻᒪᕆᐅᑎᑕᐅᔪᑦ ᐊᒻᒪᓗ ᓯᕗᓪᓕᐅᑎᑕᐅᖁᔭᐅᔪᑦ ᐃᓄᖕᓄᑦ ᐊᖑᒪᔭᐅᑦᑎᐊᕆᐊᖃᕐᓂᖏᓐᓄᑦ ᐊᒻᒪᓗ ᐃᓱᒪᒋᔭᐅᓕᕌᖓᒥᒃ ᓄᑖᑦ ᖃᐅᔨᒪᔾᔪᑎᒃᓴᐃᑦ ᐊᑐᐃᓐᓇᕈᖅᐸᓪᓕᐊᓕᕌᖓᑕ.

ᓄᓇᕗᒻᒥ ᐸᕐᓇᐃᔨᒃᑯᑦ ᑲᒥᓯᓇᒃᑯᖏᑦ ᓴᓇᓯᒪᓕᕐᒪᑕ ᑎᑎᕋᖅᑕᐅᓵᖅᓯᒪᓕᖅᑐᓂᒃ ᓄᓇᐃᑦ ᐊᑑᑎᒃᓴᖏᓐᓂᑦ ᐸᕐᓇᐅᑎᓂᒃ ᓄᓇᕗᒻᒥ ᓄᓇᒋᔭᐅᔪᒥ. ᑎᑎᕋᖅᑕᐅᓵᖅᓯᒪᔪᑦ ᐸᕐᓇᐅᑏᑦ ᐃᓗᓕᖃᖅᐳᑦ ᑕᑯᑎᑦᑎᔾᔪᑎᒃᓴᓂᒃ ᖃᓄᖅ ᓄᓇᕗᒻᒥ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑏᑦ ᓇᓗᓇᐃᒃᑯᑕᐅᔪᓐᓇᕐᒪᖔᑕ ᐊᒻᒪᓗ ᒪᓕᒐᒃᓴᐅᔪᓐᓇᕐᒪᖔᑕ ᓄᓇᒥᐅᑕᐃᑦ ᐊᑐᖅᑕᐅᔪᓐᓇᕐᓂᖏᓐᓂᑦ ᐊᒻᒪᓗ ᓴᓇᕝᕕᐅᔪᓐᓇᕐᓂᖏᓐᓄᑦ, ᐊᖏᖅᑕᐅᓯᒪᓕᕈᑎᒃ. ᑲᒥᓯᓇᒃᑯᑦ ᐊᑐᓕᕐᒪᑕ ᑎᑎᕋᖅᑕᐅᓵᖅᓯᒪᔪᓂᒃ ᐸᕐᓇᐅᑎᓂᒃ ᐃᓱᒪᒋᔭᐅᖁᓪᓗᒋᑦ ᐅᖃᐅᓯᒃᓴᐅᓂᐊᖅᑐᑦ ᓄᓇᓕᖕᓂ ᐊᒻᒪᓗ ᐊᓯᖏᓐᓄᑦ ᐃᓚᒋᔭᐅᖃᑦᑕᕆᐊᖃᖅᑐᓄᑦ, ᐊᒻᒪᓗ ᐱᔫᒥᓴᐅᑕᐅᓪᓗᑎᒃ ᑐᓴᕐᕕᐅᔪᓐᓇᕐᓂᖏᑦ ᐃᓄᓕᒫᑦ ᐃᑲᔪᕐᓂᐊᕐᒪᑕ ᐸᕐᓇᐅᑎᓄᑦ ᐱᐅᓂᖅᓴᐅᓕᕈᓐᓇᕐᓂᖏᓐᓄᑦ.

ᐸᕐᓇᐃᔩᑦ ᑲᒥᓯᓇᒃᑯᖏᑦ ᐃᓕᓐᓂᐊᖅᑎᑦᑎᓂᐊᕐᒪᑕ ᑲᑎᒪᑎᑦᑎᓗᑎᒃ ᑎᑎᕋᖅᑕᐅᓵᖅᓯᒪᔪᓂ ᐸᕐᓇᐅᑎᓂᒃ, ᑕᒪᐃᓐᓂᑦᑎᐊᖅ ᓄᓇᕗᒻᒥ ᓄᓇᓕᖕᓂ, ᐊᒻᒪᓗᑕᐅᖅ ᐃᓄᖕᓂ ᓄᓇᕕᖕᒥᐅᑕᓂᒃ ᐊᒻᒪᓗ ᐊᓪᓚᓂᒃ ᐊᑕᐹᔅᑲᒥᐅᑕᓂᒃ ᐊᒻᒪᓗ ᒫᓂᑑᐸᐅᑉ ᑕᓂᓱᓕᓐᑯᖏᓐᓂᒃ. ᐊᓯᖏᓐᓂᒃᑕᐅᖅ ᑲᑎᒪᑎᑦᑎᓪᓗᑎᒃ ᐃᓕᓐᓂᐊᖅᑎᑦᑎᓂᐊᕐᒥᔪᑦ ᓴᓈᖃᖅᐸᒃᑐᓂᒃ ᐊᖏᔪᑎᓂᒃ ᐊᒻᒪᓗ ᒐᕙᒪᒃᑯᓐᓂᒃ.

ᐃᓚᒋᔭᐅᖃᑕᐅᒋᑦ ᐸᕐᓇᐅᑎᓄᑦ!

ᐸᕐᓇᐃᔩᑦ ᑲᒥᓯᓇᒃᑯᖏᑦ ᐅᖃᐅᓯᒃᓴᖃᖅᑐᓂᒃ ᖃᐃᑦᑎᖁᔨᑦᑎᐊᖅᐳᑦ ᐱᔾᔪᑕᐅᓪᓗᑎ ᑎᑎᕋᖅᑕᐅᓵᖅᓯᒪᔪᑦ ᐸᕐᓇᐅᑏᑦ ᑕᒪᐃᓐᓂᒃ ᐃᓚᐅᔪᒪᔪᓂᒃ ᐃᓄᖕᓂᒃ ᑎᒥᐅᔪᓂᒡᓗ, ᐊᒻᒪᓗ ᐊᕐᕋᒎᓂᐊᖅᑐᒥ ᑲᑎᖅᓱᐃᕙᓪᓕᐊᓂᐊᖅᑐᑦ ᑐᓴᖅᐸᓪᓕᐊᓂᐊᖅᑕᖏᓐᓂᒃ. ᑎᑎᕋᖅᑕᐅᓵᖅᓯᒪᔪᑦ ᐸᕐᓇᐅᑏᑦ ᐊᒻᒪᓗ ᖃᖓᒃᑯᑦ ᓄᓇᓕᖕᓄᑦ ᐳᓚᕋᓐᓂᐊᕐᒪᖔᑕ ᐊᑐᐃᓐᓇᐅᓂᐊᖅᑐᑦ ᑲᒥᓯᓇᒃᑯᑦ ᖃᕆᑕᐅᔭᒃᑯᑦ ᑕᑯᓂᐊᖅᑕᐅᕝᕕᖓᓐᓂ www.nunavut.ca.

ᑭᖑᓂᐊᒍᑦ ᓄᓇᓕᓕᒫᑦ ᐳᓚᕋᑕᐅᓚᐅᖅᑎᓪᓗᒋᑦ, ᑕᒪᕐᒥᒃ ᑐᓴᖅᑕᐅᓯᒪᓕᖅᑐᑦ ᐃᓄᖕᓂᒃ ᑎᑎᕋᖅᑕᐅᓵᖅᓯᒪᔪᓂᒃ ᐸᕐᓇᐅᑎᓕᕆᓂᕐᒧᑦ ᕿᒥᕐᕈᐊᖅᑕᐅᒋᐊᕐᓂᐊᖅᐳᑦ ᐃᓄᓕᒫᓄᑦ ᓈᓚᒋᐊᖅᑐᖅᓯᒪᓗᑎᒃ, ᑭᖑᓂᐊᒍᓪᓗ ᐋᕿᒋᐊᖅᑕᐅᑦᑎᐊᕈᒫᖅᓱᑎᒃ, ᐊᒻᒪᓗ ᑕᐃᒃᑯᐊ ᐸᕐᓇᐅᑏᑦ ᑐᓂᔭᐅᓂᐊᖅᑐᑦ ᒐᕙᒪᒃᑯᓐᓄᑦ ᐊᖏᖅᑕᐅᔪᒃᓴᒪᐅᑕᐅᓂᕐᒧᑦ. ᐊᖏᖅᑕᐅᓯᒪᓕᕈᑎᒃ, ᑕᒪᕐᒥᒃ ᓴᓇᔪᒪᓂᕐᒧᑦ ᑐᒃᕋᖅᓯᒪᔪᑦ ᒪᓕᖃᑦᑕᕆᐊᖃᕐᓂᐊᓕᕐᓂᐊᖅᑐᖅ ᒪᓕᒐᖏᓐᓂᒃ ᐸᕐᓇᐅᑎᓃᑦᑐᓂᒃ.