ᕿᑭᖅᑕᓂ ᐃᓄᐃᑦ ᐃᓚᐅᖃᑕᐅᕗᑦ ᓄᓇᐅᑉ ᐊᑐᖅᑕᐅᓂᖕᓄᑦ ᓄᓇᕗᒻᒥ ᐸᕐᓇᒃᐸᓪᓕᐊᑎᓪᓗᒋᑦ ᓯᕗᓂᒃᓴᒧᑦ

ᓄᓇᕗᑦ ᓄᓇᓕᖏᑦ

ᐃᖃᓗᐃᑦ, ᓄᓇᕗᑦ (ᔫᓂ 10, 2013) – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᐊᑕᐅᑦᑎᒃᑯᑦ ᓄᓇᕗᑦᒥ ᐸᕐᓇᐃᔨᒃᑯᓪᓗ (ᐸᕐᓇᐃᔩᑦ) ᖁᕕᐊᓱᒃᐳᑦ ᐅᖃᐅᓐᓇᕐᒪᑕ ᕿᑭᖅᑕᓂ ᓄᓇᓕᖏᓐᓂᑦ ᑲᑎᒪᓂᖃᖃᑦᑕᓚᐅᕐᓂᖏᑦ ᐱᔭᕇᖅᓯᒪᓕᕐᒪᑕ.

ᕿᑭᖅᑕᓂᒃᑯᑦ ᐊᖓᔪᖅᑳᖓᑦ ᐅᑲᓕᖅ ᐃᔨᑦᓯᐊᖅ ᐅᖃᓚᐅᖅᑐᖅ, “ᑕᑯᒍᒪᓪᓚᕆᓐᓂᐊᖅᑕᕗᑦ ᓯᕗᓪᓕᖅᐹᖅᓯᐅᑎ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑦ ᐃᓚᒋᓪᓚᑦᑖᕐᓂᐊᕐᒪᒍ ᕿᑭᖅᑕᓂᒃᑯᑦ ᐱᓕᕆᐊᕆᕙᑦᑕᖏᓐᓂᒃ ᐃᓄᐃᑦ ᓄᓇᖁᑎᖏᓐᓂᒃ ᕿᑭᖅᑕᓂᓗ ᓄᓇᐃᑦ ᐊᑐᖅᑕᐅᑦᑎᐊᕋᓗᐊᕐᒪᖔᑕ ᐃᓄᐃᑦ ᐱᒻᒪᕆᐅᒋᔭᖏᓐᓂᒃ ᐱᒍᒪᔭᖏᓐᓂᓪᓗ ᒪᓕᓪᓗᑎᒃ.

“ᓄᓇᕗᑦᒥ ᐸᕐᓇᐃᔩᑦ ᑭᒡᒐᖅᑐᕐᓗᒋᑦ, ᐊᓕᐊᓇᐃᒍᓱᒻᒪᕆᑉᐳᖓ ᐱᐊᓂᒃᓯᓯᒪᓕᕋᑦᑕ ᕿᑭᖅᑕᓂ ᓄᓇᓕᖏᓐᓅᖅᓯᒪᓂᑦᑎᓐᓂᑦ ᑲᑎᖃᑎᒋᓯᒪᓪᓗᑎᒍᑦ ᐊᑎᖃᖃᑕᐅᔪᑦ ᐱᔾᔪᑎᒋᓪᓗᒍ ᓯᕗᓪᓕᖅᐹᖅᓯᐅᑦ ᓄᓇᕗᒻᒧᑦ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎ ᐊᑦᑐᐊᖓᑎᓪᓗᒍ ᕿᑭᖅᑕᓄᑦ. ᐊᑐᓕᖅᑎᑕᐅᓂᖓ ᓄᓇᕗᑦ ᓄᓇᑖᕈᑎᐅᑉ ᐊᖏᕈᑎᖓ ᐱᒻᒪᕆᐅᓂᖅᐹᖑᕗᖅ ᑐᓴᖃᑦᑕᓚᐅᖅᓯᒪᓪᓗᑕ ᕿᑭᖅᑖᓗᒻᒥᐅᓂᑦ ᓄᓇᕕᒻᒥᓗ ᐊᑯᓂᒻᒪᕆ ᑕᕝᕗᖓ ᑎᑭᐅᑎᓇᓱᐊᖅᓯᒪᓪᓗᑕ ᓄᓇᕗᒻᒧᓪᓗ ᐱᔭᐅᒋᐊᖃᓪᓚᑦᑖᖅᓯᒪᑎᓪᓗᓂ ᑐᙵᕕᑦᑎᐊᕙᐅᓂᐊᕐᒪᑦ ᓄᓇᕗᑦ ᓄᓇᖓ ᖃᓄᖅ ᐊᑐᖅᑕᐅᓂᐊᕐᒪᖔᑦ ᐸᕐᓇᐃᓪᓗᓂ,” ᐅᖃᖅᑯᖅ ᐸᕐᓇᐃᔩᑦ ᐃᒃᓯᕙᐅᑕᖓ, ᐹᓪ ᖁᐊᓴ.

ᐸᕐᓇᐃᔩᑦ ᑐᓴᕋᓱᐊᖅᓯᒪᕗᑦ ᐅᖃᕐᕕᐅᖃᑦᑕᕈᒪᓚᐅᖅᖢᑎᒡᓗ ᓄᓇᓕᖕᓂᑦ ᓯᕗᓪᓕᖅᐹᖅᓯᐅᑎ ᓄᓇᕗᑦ ᓄᓇᖏᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑦ ᒥᒃᓵᓄᑦ ᓄᕕᐱᕆ 2012ᒥᓂ. ᑕᓐᓇ ᐱᒻᒪᕆᐅᒻᒪᕆᑦᑐᖅ ᓄᓇᓕᖕᓂ ᑲᑎᒪᒋᐊᖅᑐᖃᑦᑕᕐᓂᖅ ᓄᓇᐃᑦ ᐸᕐᓇᑕᐅᓂᖏᑕ ᒥᒃᓵᓄᑦ ᕿᑭᖅᑖᓗᒻᒥ ᐊᑐᖅᑕᐅᓚᐅᖅᑐᖅ ᓇᓗᓇᐃᖅᓯᕗᖅ ᐸᕐᓇᐃᔩᑦ ᐱᓕᕆᐊᕆᔭᖓᓂᒃ ᓯᕗᓪᓕᖅᐹᖓ ᐱᔭᕇᕐᓂᕆᔭᖓᓂᒃ. ᔫᓂ 2013ᒥ ᐸᕐᓇᐃᔩᑦ ᐱᔭᕇᖅᓯᓚᐅᖅᑯᑦ ᓄᓇᓕᖕᓂᑦ ᑲᑎᒪᒋᐊᖅᑐᖅᑎᑦᑎᓪᓗᑎᒃ ᓄᓇᓕᖕᓄᐊᒃᑲᓐᓂᖃᑦᑕᖅᖢᑎᒡᓗ ᕿᑭᖅᑖᓗᖕᒥ ᑲᔪᓯᓂᐊᕆᓪᓗᑎᒃ ᓄᓇᓕᖕᓂᑦ ᑲᑎᒪᑎᑦᑎᖃᑦᑕᕐᓗᑎᒃ ᑭᕙᓪᓕᕐᒥᒃ ᐅᑐᐱᕆ 2013ᒥ.

ᓄᓇᕗᑦ ᓄᓇᑖᕈᑎᐅᑉ ᐊᖏᕈᑎᖓ ᓄᓇᕗᑦᒥ ᐸᕐᓇᐃᔨᒃᑯᓐᓂᑦ ᐱᙳᖅᑎᑦᑎᓯᒪᕗᖅ ᐱᔭᒃᓴᖃᖅᑎᑦᑎᓪᓗᓂ ᓴᖅᑭᔮᖅᓯᓂᐊᕐᒪᑎᒃ ᐊᑕᐅᓯᕐᒥᒃ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᖕᒥᒃ ᓄᓇᕗᓕᒫᒧᑦ (ᓄᓇᕗᑦ ᐃᓗᐊ).  ᓄᓇᕐᔪᐊᓕᒫᒥᒃ ᑕᐃᒪᓐᓇᐃᑦᑐᖃᓚᐅᖅᓯᒪᙱᓚᖅ ᐱᓕᕆᐊᕆᔭᐅᔪᒥᒃ ᐊᖏᓂᖓ ᐊᔾᔨᐅᖏᓐᓂᖓᓗ ᑕᐅᑐᒃᖢᒍ.

ᐸᕐᓇᐅᑦ ᐊᑐᐊᖅᓯᒐᔭᖅᑯᖅ ᑐᕌᖅᑎᑦᑎᓗᓂᓗ ᓄᓇᒦᙶᖅᑐᑦ ᐊᑐᖅᑕᐅᔪᒃᓴᑦ ᐱᕙᓪᓕᐊᓂᕆᔭᖓᓂᒃ ᓄᓇᕗᑦ ᐃᓗᐊᓂ ᓴᐳᔾᔨᓇᓱᐊᕐᓂᖅ, ᐱᕙᓪᓕᐊᓂᖅ, ᐊᐅᓚᑦᑎᓂᖅ ᓄᓇᐃᑦ, ᐃᒥᖅ ᐃᒪᐃᓪᓗ ᐊᑐᖅᑕᐅᓂᖏᑦ ᓂᕐᔪᑏᓪᓗ ᐃᓱᒪᒋᔭᐅᓗᑎᒃ. ᑖᒃᑯᐊᑦ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᓕᐅᕈᑏᑦ ᓴᖅᑭᔮᖅᑎᑎᒋᐊᕐᓂᐊᖅᑯᑦ ᐃᓄᐃᑦ ᐃᓅᓯᑦᑎᐊᕆᒍᓯᖏᓐᓂᒃ ᓴᐳᒻᒥᓗᓂ, ᐱᔭᕆᐊᖃᖅᐸᑕᓗ, ᐅᑎᖅᑏᓗᑎᒃ ᐊᕙᑎᐅᑉ ᐱᐅᓂᖓᓂᒃ ᓄᓇᕗᑦ ᐃᓗᐊᓂ.

ᑖᓐᓇ ᐱᒻᒪᕆᐅᓂᖓ ᓇᓗᓇᐃᒃᑯᑕᖅ ᓯᕗᓪᓕᐅᔾᔭᐅᓯᒪᕗᖅ ᓯᕗᓕᖅᑎᖃᖅᖢᑎᒃ ᐃᒃᓯᕙᐅᑕᕆᔭᐅᔪᒧᑦ ᐹᓪ ᖁᐊᓴᒧᑦ ᐱᓕᕆᖃᑎᒋᓪᓗᓂᒋᑦ ᖃᐅᔨᒪᔨᑕᐃᑦ. ᑕᒃᑯᐊᑦ ᐱᓕᕆᖃᑎᒌᑦ ᑲᑎᒪᑎᑦᑎᖃᑦᑕᓚᐅᖅᑯᑦ ᐅᓄᖅᑐᓄᑦ ᑲᑎᒪᒋᐊᖅᑐᖅᑐᖃᖃᑦᑕᓚᐅᖅᖢᓂ ᑭᒃᑯᑐᐃᓐᓇᕐᓂᑦ ᐅᖃᐅᓯᒃᓴᐅᔪᑦ ᓄᐊᑕᐅᓯᒪᓪᓗᑎᒃ ᐊᑐᖅᑕᐅᓂᐊᕐᒪᑕ ᓯᕗᓪᓕᖅᐹᖅᓯᐅᑦ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᖕᒥᒃ ᐊᓯᔾᔨᖅᓯᕙᓪᓕᐊᓗᑎᒃ ᐋᖅᑭᒃᓱᐃᓂᒃᑯᑦ. ᐃᓄᐃᑦ ᐃᓚᐅᖃᑕᐅᓂᖏᑦ ᑕᒪᒃᑯᓄᖓ ᑲᑎᒪᓂᕐᓄᑦ ᓴᖅᑭᔮᖅᑎᑦᑎᒍᑕᐅᓂᐊᖅᑯᑦ ᓄᓇᓖᑦ ᐱᒻᒪᕆᐅᑎᑕᖏᑦ ᓄᐃᑕᑎᑕᐅᓂᐊᕐᒪᑦ ᑭᖑᓪᓕᖅᐹᖅᓯᐅᑎᓂᑦ ᓄᓇᐃᑦ ᐊᑐᖅᑕᐅᓂᖏᓐᓂᒃ.

ᓯᕗᓪᓕᖅᐹᖅᓯᐅᑦ ᐸᕐᓇᐅᑦ, ᑐᑭᓯᒋᐊᕈᑏᑦ ᐅᓪᓗᖅᓯᐅᑏᓪᓗ ᐱᔭᒃᓴᐅᕗᑦ ᓄᓇᕗᑦᒥ ᐸᕐᓇᐃᔩᑦ ᐃᑭᐊᖅᑭᕕᖓᓂᒃ, www.nunavut.ca.

ᑐᓴᕆᐊᕐᕕᒃᓴᐃᑦ:

ᐹᓪ ᖁᐊᓴ             
ᐃᒃᓯᕙᐅᑕᖅ
ᓄᓇᕗᑦᒥ ᐸᕐᓇᐃᔩᑦ
(867) 983-4625
pquassa@nunavut.ca;

ᓯᐅᕋᓐ ᐃᖃᓗᐊᒃ
ᐊᐅᓚᑦᑎᔨᒻᒪᕆ
ᓄᓇᕗᑦᒥ ᐸᕐᓇᐃᔩᑦ
(867) 983-4625
sehaloak@nunavut.ca

ᑕᐃᕕᑎ ᔪᐊᓇᓯ
ᐊᖓᔪᖅᑳᖑᑲᐃᓐᓇᖅᑐᖅ ᑐᓴᐅᒪᖃᑦᑕᐅᑎᓕᕆᔨᒃᑯᓐᓄ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(897) 975-8414
djoanasie@qia.ca

 

 

AttachmentSize
2013-06-10_QIA_NPC_Press_Release-ENG.pdf350.27 KB
2013-06-10_QIA_NPC_ress_Release-INUK.pdf138.06 KB