ᑲᒥᓯᓇᒃᑯᓐᓂᒃ ᐅᓂᒃᑳᕈᑏᑦ

 

ᓄᓇᕗᒻᒥ ᐸᕐᓇᐃᔩᑦ ᑲᒥᓯᓇᒃᑯᖏᑦ ᑎᒥᖑᖅᑎᑕᐅᓯᒪᖕᒪᑕ ᐃᓄᓕᒫᓂᒃ ᑭᒡᒐᖅᑐᐃᔨᐅᓂᕐᒧᑦ ᓴᕿᑎᑕᐅᓯᒪᓪᓗᑎᒃ ᐃᖕᒥᒍᑦ ᐊᐅᓚᔪᓐᓇᕐᓂᖃᖅᓱᑎᒃ ᑎᒥᐅᓂᖏᓐᓂᒃ, ᖃᓄᐃᓕᐅᖅᑎᐅᓂᖏᑦ ᐊᒻᒪᓗ ᑲᒪᒋᖃᑦᑕᕆᐊᖃᖅᑕᖏᑦ ᓇᓗᓇᐃᖅᑕᐅᓯᒪᓪᓗᑎᒃ ᓄᓇᕗᒻᒥ ᓄᓇᑖᕈᑏᑦ ᐊᖏᕈᑎᐊᒍᑦ, ᐃᓗᓕᖏᓐᓃᑦᑐᓂᒃ 11-ᖓᓂ, ᓄᓇᐃᑦ ᐊᑑᑎᒃᓴᖏᓐᓂᒃ ᐸᕐᓇᐃᖃᑦᑕᕐᓂᕐᒥᒃ. 

ᐸᕐᓇᐃᔩᑦ ᑲᒥᓯᓇᐃᑦᑕᐅᖅ ᐊᐅᓚᑦᑎᔨᐅᖃᑎᒋᔭᐅᕙᒃᐳᑦ ᑎᒥᖁᖏᓐᓂ, ᐊᔾᔨᐅᖏᑦᑐᒻᒪᕆᖕᓂᒃ ᐱᔪᓐᓇᕐᓂᖃᖅᑎᑕᐅᓪᓗᑎᒃ ᐊᒻᒪᓗ ᐃᓱᒪᓕᐅᕈᑎᖃᕈᓐᓇᖅᓱᑎᒃ, ᐱᓕᕆᐊᒃᓴᖏᓪᓗ ᑕᒪᒃᑯᐊ ᓴᐳᓐᓂᐊᖅᑕᐅᓯᒪᓪᓗᑎᒃ ᐊᑖᒍᑦ ᓄᓇᕗᒻᒥ ᓄᓇᑖᕈᑎᑦ ᐊᖏᕈᑎᖏᓐᓄᑦ. ᐸᕐᓇᐃᔩᑦ ᑲᒥᓯᓇᒃᑯᖏᑦ ᑐᑭᓯᓂᐊᕐᕕᖃᖃᑦᑕᖅᐳᑦ ᒐᕙᒪᒃᑯᓐᓂᒃ, ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒻᒪᓗ ᐊᒥᓱᓂᑦ ᐊᓯᖏᓂᒃ ᑎᒥᖁᑎᒋᔭᐅᔪᓂᒃ, ᑭᓯᐊᓂ ᑲᒥᓯᓇᒃᑯᑦ ᐃᓱᒪᓕᐅᖅᑎᐅᕙᒃᐳᑦ ᑭᖑᓪᓕᖅᐹᖑᓂᐊᖅᑐᓂᒃ ᖃᓄᖅ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑏᑦ ᓴᓇᔭᐅᓯᒪᓂᐊᕐᒪᖔᑕ ᐊᒻᒪᓗ ᖃᓄᖅ ᐸᕐᓇᐅᑎᓕᐊᖑᔪᑦ ᐊᐅᓚᑎᔾᔪᑕᐅᓂᐊᕐᒪᖔᑕ ᓄᓇᓂᒃ ᓄᓇᕗᒻᒥ. ᑕᐃᒪᓕ ᑕᒃᑯᐊ ᐃᓱᒪᓕᐊᖑᓯᒪᔪᑦ ᐱᔭᕆᖅᑕᐅᒐᒥᒃ, ᐸᕐᓇᐃᔩᑦ ᑲᒥᓯᓇᒃᑯᑦ ᑐᓂᔭᐅᓕᖃᑦᑕᖅᐳᑦ ᒐᕙᒪᒃᑯᓐᓄᑦ, ᐊᖏᖅᑕᐅᖁᓪᓗᒋ. ᐃᓚᐅᖃᑦᑕᕐᕆᕗᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖏᑦ ᐊᒻᒪᓗ ᐊᕕᒃᑐᖅᓯᒪᓂᐅᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᖏᖅᑕᐅᔪᒫᕐᓂᐊᓕᖅᑎᓪᓗᒋᑦ.  

ᐊᐅᓚᑦᑎᔨᐅᖃᑕᐅᓪᓗᑎᒃ ᑎᒥᐅᓂᖏᓐᓄᑦ, ᑎᒃᑯᐊᖅᑕᐅᓯᒪᔪᓂᒃ ᑲᑎᒪᔨᖃᖅᐳᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᓐᓂᒃ, ᐱᖓᓱᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᑲᓇᑕᐅᑉ ᒐᕙᒪᒃᑯᖏᓐᓂᒃ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓄᑦ. 

ᓄᓇᕗᑦ ᐸᕐᓇᐃᔨᒃᑯᑦ ᑲᒥᓯᓇᒃᑯᖏᑦ ᐱᒻᒪᕆᐊᓗᖕᒥᒃ ᑎᓕᔭᐅᓯᒪᓂᖃᖅᐳᑦ ᓄᓇᕗᒻᒥ ᓄᓇᑖᕈᑎᓄᑦ ᐊᖏᕈᑎᑎᒍᑦ, ᐸᕐᓇᐅᔨᐅᔭᕆᐊᖃᕐᓂᕐᒧᑦ ᐊᑐᓕᖅᑎᑦᑎᔨᐅᓂᕐᒧᓪᓗ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑎᓂᒃ, ᓇᓗᓇᐃᑯᑕᐅᖃᑦᑕᖅᑐᓂᒃ ᐊᒻᒪᓗ ᒪᓕᒐᒃᓴᐅᓕᐅᖃᑦᑕᖅᑐᓂᒃ ᓄᓇᒥᐅᑕᐃᑦ ᐊᑐᖅᑕᐅᔪᓐᓇᕐᓂᖏᓐᓂᒃ ᐊᒻᒪᓗ ᐱᕙᓪᓕᐊᕝᕕᐅᔪᓐᓇᕐᓂᖏᓐᓂᒃ.