ᑎᑎᕋᖅᑕᐅᓵᖅᓯᒪᔪᑦ ᐊᑐᓕᖅᑎᑕᐅᓂᖏᑦ

 ᓄᓇᕗᑦ ᐸᕐᓇᐃᔨᒃᑯᑦ ᑲᒥᓯᓇᒃᑯᑦ ᐊᑐᓕᖅᑎᑦᑎᓯᒪᖕᒪᑕ ᒪᕐᕈᖕᓂᒃ ᐊᖏᖅᑕᐅᓯᒪᓕᑑᖕᓂᒃ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑎᓂᒃ, ᐅᐊᖕᓇᖓᓂ ᕿᑭᖅᑖᓘᑉ ᐊᕕᒃᑐᖅᓯᒪᓂᕐᒧᑦ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑎᓂᒃ (NBRLUP) ᐊᒻᒪᓗ ᑭᕙᓪᓕᕐᒥ ᐊᕕᒃᑐᖅᓯᒪᓂᕐᒧᑦ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑎᓂᒃ (KRLUP). ᑖᒃᑯᐊ ᐊᖏᖅᑕᐅᓯᒪᔫᒃ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑏᑦ ᓇᓗᓇᐃᒃᑯᑕᕆᔭᐅᓂᐊᖅᑐᑦ ᐊᒻᒪᓗ ᒪᓕᒐᒃᓴᐅᓪᓗᑎᒃ ᓴᐳᓐᓂᐊᖅᑕᐅᓂᖏᓐᓄᑦ, ᐱᕙᓪᓕᐊᕝᕕᐅᔪᓐᓇᕐᓂᖏᓐᓄᑦ ᐊᒻᒪᓗ ᐊᑐᖅᑕᐅᔪᓐᓇᕐᓂᖏᓐᓄᑦ ᓄᓇᐃᑦ ᐊᑐᓂ ᐸᕐᓇᐃᕕᖃᖅᑐᓂ ᐊᕕᒃᑐᖅᓯᒪᓂᖏᓐᓂ.

ᑕᒪᒃᑭᖅᑑᒃ ᐸᕐᓇᐅᑏᒃ ᐃᓗᓕᖃᖅᐳᑦ ᐊᑐᐊᒐᓕᐅᖃᑦᑕᕐᓂᕐᒧᑦ ᑐᖓᕕᐅᕙᒃᑐᓂᒃ, ᐃᓕᑕᖅᓯᓯᒪᔪᓂᒃ ᐱᒻᒪᕆᐅᓂᖏᓐᓂᒃ ᐸᐸᑕᐅᑦᑎᐊᕆᐊᖃᕐᓂᖏᑦ ᐱᐅᓯᑐᖃᖏᑦ ᓄᓇᐃᑦ ᐊᒻᒪᓗ ᐱᓕᓯᑐᖃᖏᓐᓂᒃ ᓄᓇᒥᐅᑕᓂᒃ, ᐋᕿᐅᒪᔾᔪᑕᐅᓪᓗᑎᒡᓗ ᓴᐳᓐᓂᐊᖅᑕᐅᓯᒪᓂᖏᓐᓂᒃ ᓄᓇᓂᒃ, ᐊᒻᒪᓗ ᐱᔫᒥᓴᐅᑕᐅᓪᓗᑎᒃ ᐃᖕᒥᓂᒃ ᒪᑭᑕᔪᓐᓇᕐᓂᕐᒥᒃ, ᐊᑯᓂᐅᔪᒥᒃ, ᐊᑐᖅᑕᐅᖏᓐᓇᕈᓐᓇᕐᓂᐊᖅᑐᓂᒃ, ᑮᓇᐅᔭᓕᐅᕐᕕᒃᓴᓂᒃ ᐱᕈᖅᑎᑦᑎᓂᕐᒥᒃ.

ᐸᕐᓇᐃᔨᒃᑯᑦ ᑲᒥᓯᓇᒃᑯᖏᑦ ᐃᓕᑕᖅᓯᓯᒪᕗᑦ ᑲᔪᓯᔪᓐᓇᑦᑎᐊᖅᑐᒥᒃ ᐊᑐᓕᑎᖅᑕᐅᔪᓐᓇᕐᓂᖏᑦ ᐅᐊᖕᓇᖓᓂ ᕿᑭᖅᑖᓘᑉ ᐸᕐᓇᐅᑎᖏᑦ ᐊᒻᒪᓗ ᑭᕙᓪᓕᕐᒥ ᐸᕐᓇᐅᑎᖏᑦ ᑲᑐᔾᔭᐅᑦᑎᐊᕐᓗᑎᒃ ᐱᓕᕆᐊᖑᔭᕆᐊᖃᕐᓂᐊᖅᐳᑦ. ᐸᕐᓇᐅᑏᑦ ᐊᑐᓕᖅᑎᑕᐅᓂᖏᑦ ᑐᖓᕕᖃᖅᑐᒻᒪᕆᐅᕙᖕᒪᑕ ᒐᕙᒪᒃᑯᑦ ᐃᖃᓇᐃᔭᕕᖏᓐᓂᒃ, ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒻᒪᓗ ᐊᖏᔫᑎᓂᒃ ᓴᓇᕝᕕᖃᖅᑎᐅᔪᓂᒃ, ᐱᓕᕆᖃᑎᒌᑦᑎᐊᕐᓗᑎᒃ ᓴᕿᑎᑦᑎᔪᓐᓇᕐᓂᖏᓐᓂᒃ ᓴᖏᔫᔪᓂᒃ, ᐊᔪᖅᓴᖏᑦᑐᓂᒃ ᐊᕕᒃᑐᖅᓯᒪᓂᐅᔪᓂᒃ.  

ᐱᓕᕆᐊᖃᕈᑕᐅᔪᑦ 

ᓄᓇᕗᒻᒥ ᓄᓇᑖᕈᑏᑦ ᐊᖏᕈᑎᖏᑦ ᐃᓚᖃᕐᒪᑕ ᒪᓕᒋᐊᓕᖕᓂᒃ ᒪᑯᓂᖓ ᐱᑕᖃᕈᑕᐅᓂᖏᓐᓄᑦ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑎᓂᒃ:

  • ᓴᐳᓐᓂᐊᖅᑕᐅᖁᓪᓗᒋᑦ ᐊᑐᓕᖁᔭᐅᓪᓗᑎᒡᓗ ᒫᓐᓇᐅᔪᖅ ᓯᕗᓂᒃᓴᐅᓂᐊᖅᑐᒥᓗ ᖃᓄᐃᓐᓂᖏᓂᑦ ᐃᓄᐃᑦ ᐊᒻᒪᓗ ᓄᓇᓖᑦ ᓄᓇᕗᒻᒥ ᓄᓇᑖᕐᕕᐅᓯᒪᔫᓃᑦᑐᑦ, ᐃᓱᒪᒋᔭᐅᓗᑎᒡᓗ ᐃᓚᒋᔭᐅᖃᑕᐅᓂᖏᑦ ᐊᓯᖏᑦ ᑲᓇᑕᐅᑕᐃᑦ, 
  • ᓴᐳᓐᓂᐊᖅᑕᐅᖁᓪᓗᒋ, ᐊᒻᒪᓗ ᐱᔭᕆᐊᖃᓕᕌᖓᒥᒃ, ᐅᑎᖅᑎᑕᐅᒋᐊᖅᓯᒪᖃᑕᕐᓗᑎᒃ ᐊᕙᑎᖏᑦ ᖃᓄᐃᓚᐅᖏᓐᓂᖏᓐᓂᖏᑦ ᐊᒃᑐᖅᑕᐅᓯᒪᓇᑎᒃ, ᓄᓇᕗᒻᒥ ᓄᓇᑖᕐᕕᐅᓯᒪᔪᒥ.

ᑕᒪᕐᒥᒃ ᑭᕙᓪᓕᕐᒥ ᐸᕐᓇᐅᑏᑦ ᐊᒻᒪᓗ ᐅᐊᖕᓇᖓ ᕿᑭᖅᑖᓘᑉ ᐸᕐᓇᐅᑎᖏᑦ ᑐᖓᕕᒃᓴᖃᕈᑕᐅᕗᑦ ᐃᑲᔫᖅᓱᖅᑕᐅᓂᖏᓐᓄᑦ ᖃᓄᐃᓐᓂᐊᖏᓐᓂᖏᑦ ᐃᓄᖁᑎᖏᑦ, ᐊᒻᒪᓗ ᐊᕙᑎᖁᑎᖏᓐᓂᒃ ᐱᐅᔫᓂᖏᑦ. ᐃᓗᓕᖃᖅᐳᑦ ᖃᓄᐃᓕᐅᕈᑎᒃᓴᓂᒃ, ᐊᑐᓕᖁᔭᓕᐊᓂᒃ ᐊᒻᒪᓗ ᒪᓕᒋᐊᓕᖕᓂᒃ ᓇᓗᓇᐃᒃᑯᑕᐅᔪᓂᒃ ᐊᒻᒪᓗ ᓄᓇᒥᐅᑕᐃᑦ ᐊᑐᖅᑕᐅᔪᓐᓇᕐᓂᖏᓐᓂᒃ, ᒪᓕᒃᑕᐅᓪᓗᑎᒃ ᑐᖓᕕᓪᓗᐊᑕᖏᑦ ᓄᓇᕗᒻᒥ ᓄᓇᑖᕈᑎᓄᑦ ᐊᖏᕈᑎᑦ.

ᖃᓄᖅ ᐅᖃᓕᒫᖅᑕᐅᔪᓐᓇᕐᓂᖏᑦ ᐸᕐᓇᐅᑏᑦ

ᐊᖏᖅᑕᐅᓯᒪᓕᖅᑐᑦ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑏᑦ ᐃᓚᖃᖅᐳᑦ ᐃᓱᒪᓘᑕᐅᔪᓂᒃ, ᑎᑭᑕᐅᔪᒪᔪᓂᒃ, ᒪᓕᒋᐊᓕᖕᓂᒃ, ᒪᓕᒃᑕᐅᓯᒪᖃᑦᑕᕆᐊᖃᕐᓂᐊᖅᑐᓂᒃ, ᐊᑐᓕᖁᔭᓕᐊᒃ ᐊᒻᒪᓗ ᐱᓕᕆᐊᒃᓴᓂᒃ ᖃᓄᐃᓕᐅᕐᕕᒃᓴᓂᒃ ᓇᓗᓇᐃᒃᑯᑕᐅᓂᕐᒧᑦ ᓄᓇᐃᑦ ᓄᓇᒥᐅᑕᐃᓪᓗ ᐊᑐᖅᑕᐅᓂᖏᓐᓄᑦ.

  • ᐃᓱᒪᓘᑕᐅᔪᑦ; ᐅᖃᐅᓯᖃᖅᑐᖅ ᓇᓗᓇᐃᖅᑕᐅᓯᒪᔪᓂᒃ ᐅᖃᐅᓯᐅᖃᑦᑕᖅᓯᒪᔪᓂᒃ ᓄᓇᓕᖕᓄᑦ, ᒐᕙᒪᒃᑯᓐᓄᑦ, ᐊᒻᒪᓗ ᐊᓯᖏᓐᓄᑦ ᑲᓇᑕᓕᒫᒧᑦ ᐃᓚᐅᑎᑕᐅᕙᒃᑐᓄᑦ ᑎᒥᐅᔪᓄᑦ, ᐱᒻᒪᕆᐅᓂᖃᖅᑐᓂᒃ ᐊᕕᒃᑐᖅᓯᒪᓂᖏᓐᓂ.
  • ᑎᑭᐅᒪᔭᐅᔪᒪᔪᑦ: ᑎᑭᑕᐅᓯᒪᓐᓇᖅᑐᓂᒃ ᑐᕌᒐᕆᔭᐅᔪᑦ ᐊᐅᓚᑕᐅᖃᑦᑕᕐᓂᖏᓐᓄᑦ ᐃᓱᒪᓘᑖᐅᔪᑦ.
  • ᒪᓕᒐᒃᓴᐃᑦ  ᒪᓕᒐᒃᓴᐅᕗᑦ ᓄᓇᐃᑦ ᓄᓇᒥᐅᑕᐃᓪᓗ ᐊᑐᖅᑕᐅᔪᓐᓇᕐᓂᖏᓐᓄᑦ ᐸᕐᓇᐅᑎᖃᕐᕕᐅᔪᓂ ᐊᕕᒃᑐᖅᓯᒪᔪᓂ. ᐊᑐᓕᖅᑎᑕᐅᖃᑦᑕᖅᐳᑦ ᐊᖁᑎᒋᓪᓗᒋᑦ ᒪᓕᑦᑎᐊᖃᑦᑕᕆᐊᖃᓂᕐᒧᑦ ᒪᓕᒐᖏᓐᓂᒃ, ᖃᓄᐃᓕᐅᕈᑕᐅᖁᔭᐅᓯᒪᔪᓂᒃ ᐊᒻᒪᓗ ᐊᑐᓕᖁᔭᓕᐊᖑᔪᓂᒃ.
  • ᒪᓕᑦᑎᐊᖃᑦᑕᕆᐊᖃᕐᓂᕐᒧᑦ ᒪᓕᒋᐊᑦ, ᖃᓄᐃᓕᐅᕆᐊᕈᑦ ᐊᒻᒪᓗ ᐊᑐᓕᖁᔭᓕᐊᑦ: ᓴᓇᕐᕈᑕᐅᕙᒃᐳᑦ ᐊᑐᖅᑕᐅᕙᒃᑐᑦ ᑲᒥᓯᓇᒃᑯᓐᓄᑦ ᐊᑐᓕᖅᑎᑕᐅᔪᓐᓇᕐᓂᖏᓐᓄᑦ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑕᐅᔪᑦ. ᑎᑎᕋᖅᓯᒪᔪᖃᖅᐳᑦ ᒪᓕᒃᑕᐅᔭᕆᐊᖃᖅᑐᓂᒃ, ᐃᓚᖏᓐᓂᒡᓗ, ᖃᓄᐃᓕᐅᕈᑕᐅᔭᕆᐊᖃᖅᑐᓂᒃ ᓄᓇᐃᑦ ᐊᑑᑎᒃᓴᖏᓐᓂᒃ ᐱᒋᐊᖅᑎᑦᑎᔪᖃᕈᒪᓂᐊᖅᐸᑦ ᐊᕕᒃᑐᖅᓯᒪᓂᖓᑕ ᐃᓗᐊᓂ. 

ᐸᕐᓇᐃᔨᒃᑯᑦ ᑲᒥᓯᓇᐃᑦ ᒪᓕᒃᑕᐅᔭᕆᐊᖃᖅᑐᓂᒃ ᒪᓕᖕᒪᖔᑕ ᕿᒥᕐᕈᐊᕈᐊᕈᓯᖏᑦ

ᕿᒥᕐᕈᐊᖅᑕᐅᖃᑦᑕᕐᒪᑦ ᓴᓇᔪᒪᔪᓂᒃ ᑐᒃᓯᕋᐅᑎᓕᐊᖑᓯᒪᔪᑦ ᐸᕐᓇᐃᔨᒃᑯᓄᑦ ᑲᒥᓯᓇᒃᑯᓐᓄᑦ, ᐱᒋᐊᖃᑦᑕᖅᓱᑎᒃ ᖃᖓᑐᐃᓐᓇᖅ ᓴᓇᔪᒪᔪᖃᖅᑎᓪᓗᒋᑦ ᑐᒃᓯᕋᖅᓯᒪᓪᓗᓂ ᐸᕐᓇᐃᕕᖄᓂᒃᑐᒥ ᐊᕕᒃᑐᖅᓯᒪᓂᕐᒥ ᓚᐃᓴᓐᓯᖃᕈᑕᐅᔭᕆᐊᖃᖅᑎᓪᓗᒍ ᐊᖏᖅᑕᐅᓯᒪᔭᕆᐊᖃᖅᑎᓪᓗᒍᓗᓐᓃᑦ ᓄᓇᐃᑦ ᐊᑐᖅᑕᐅᔪᓐᓇᕐᓂᖏᓐᓄᑦ ᑲᒪᔨᐅᔪᓄᑦ ᐊᖏᖅᑎᐅᔪᓄᑦ, ᓲᕐᓗ ᑎᒃᑯᐊᖅᑕᐅᓯᒪᔪᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᐅᕝᕙᓗᓐᓃᑦ ᓄᓇᖃᖄᖅᑐᓕᕆᔨᒃᑯᖏᓐᓂᒃ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᖏᓐᓂᒃ ᑲᓇᑕᒥ.  

ᖃᖓᑐᐃᓐᓇᖅ ᓴᓇᔪᒪᓂᕐᒧᑦ ᑐᒃᓯᕋᖅᑐᖃᖅᐸᑦ ᐸᕐᓇᐅᑎᖃᕐᕕᐅᕌᓂᒃᑐᒥ ᐊᕕᒃᑐᖅᓯᒪᓂᕐᒥ, ᑕᐃᓐᓇᓗ ᓚᐃᓴᓐᓯᑖᕆᐊᖃᖅᓱᓂ ᐅᕝᕙᓗᓐᓃᑦ ᐊᖏᖅᑕᐅᓯᒪᔭᕆᐊᖃᕈᓂ, ᓴᓇᔪᒪᔭᖏᑦ ᑐᒃᓯᕋᐅᑎᖏᑦ ᓯᕗᒻᒥᐊᒃᑕᐅᑲᐅᑎᒌᓲᖑᕗᑦ ᓇᖕᒥᓂᖅ ᓄᓇᕗᑦ ᐸᕐᓇᐃᔨᒃᑯᑦ ᑲᒥᓯᓇᒃᑯᖏᓐᓄᑦ, ᐊᑐᖅᑕᐅᔪᓐᓇᕐᓂᖏᓐᓄᑦ ᓄᓇᐃᑦ ᑲᒪᔨᖏᓐᓄᑦ/ᐊᖏᕈᓐᓇᕐᓂᖃᖅᑎᑕᐅᔪᓄᑦ. ᐱᔭᐅᓯᒪᓕᕌᖓᒥᒃ ᐸᕐᓇᐃᔨᒃᑯᓐᓄᑦ, ᐸᕐᓇᐃᔨᒃᑯᑦ ᐊᓱᐃᓛᒃ ᕿᒥᕐᕈᐊᓕᖃᑦᑕᖅᐳᑦ ᓴᓇᔪᒪᔪᓂᒃ ᑐᒃᓯᕋᐅᑎᓂᒃ, ᒪᓕᒃᑲᓗᐊᕐᒪᖔᑖ ᖃᐅᔨᓴᖅᓱᒋᑦ ᐊᖏᖅᑕᐅᓯᒫᓂᒃᑐᓂᒃ ᓄᓇᐃᑦ ᐊᑑᑎᒃᓴᖏᓐᓂᒃ ᐸᕐᓇᐅᑎᓂᒃ. 

ᑕᒪᐃᓐᓂᒃ ᐃᓱᒪᒋᓪᓗᒋᑦ, ᓴᓇᔪᒪᓂᕐᒧᑦ ᑐᒃᓯᕋᐅᑏᑦ ᑐᑭᓕᐅᕈᑕᐅᖃᑦᑕᖅᐳᑦ ᒪᓕᖕᒪᖔᑕ ᐊᖏᖅᑕᐅᓯᒫᓂᒃᑐᓂᒃ ᓄᓇᐃᑦ ᐊᑑᑎᒃᓴᖏᓐᓂᒃ ᐸᕐᓇᐅᑎᓂᒃ, ᐸᕐᓇᐃᔨᒃᑯᑦ ᑲᒥᓯᓇᐃᑦ ᐃᓱᒪᖃᕈᑎᒃ ᐱᐅᓯᖃᕐᓂᖏᓐᓂᒃ ᐊᑐᖅᑕᐅᔪᒥᓇᕐᓂᖏᓐᓂᒃ ᐊᒻᒪᓗ ᒪᓕᑦᑎᐊᕐᓂᖏᓐᓂᒃ, ᑐᖓᕕᒋᔭᐅᔪᓂᒃ ᐊᖏᖅᑕᐅᓯᒪᔪᓂᒃ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑎᓂᒃ. 

ᐸᕐᓇᐃᔨᒃᑯᑦ ᑲᒥᓯᓇᒃᑯᖏᑦ ᑐᑭᓕᐅᕈᑎᒃ ᓴᓇᔭᐅᔪᒪᔪᓂᒃ ᑐᒃᓯᕋᖅᑕᐅᓯᒪᔪᑦ ᒪᓕᑦᑎᐊᕐᓂᖏᓐᓂᒃ ᐊᖏᖅᑕᐅᓯᒪᔪᓂᒃ ᓄᓇᐃᑦ ᐊᑑᑎᒃᓴᖏᓐᓂᒃ ᐸᕐᓇᐅᑎᓂᒃ, ᓴᓇᔪᒪᔪᖅ ᒪᓕᒋᐊᖅᑲᖅᑎᑕᐅᓂᐊᓕᖅᐳᖅ ᓇᓗᓇᐃᔭᖅᑕᐅᓯᒪᔪᓂᒃ ᒪᓕᒐᒃᓴᖏᓐᓂᒃ, ᖃᓄᐃᓕᐅᕆᐊᖃᕐᓂᖏᓐᓂᒃ ᐊᒻᒪᓗ/ᐅᕝᕙᓗᓐᓃᑦ ᐊᑐᓕᖁᔭᓕᐊᖑᔪᓂᒃ, ᐱᓕᕆᐊᖃᕐᓂᖏᓐᓂᒃ ᐱᓕᕆᐊᕆᔪᒪᔭᒥᓂᒃ. ᑕᐃᒃᑯᐊ ᒪᓕᒋᐊᓖᑦ ᐱᓕᕆᐊᒃᓴᐃᓐᓇᖏᓐᓄᑦ ᓴᓇᓂᐊᖅᑕᐃᓐᓇᖏᓐᓄᑦ ᑐᕌᖓᓪᓚᑐᒃᐳᑦ, ᒪᓕᑦᑎᐊᕆᐊᖃᖅᓱᑎᒃ ᖃᓄᐃᓕᖓᖁᔭᐅᔪᓂᒃ ᐊᖏᖅᑕᐅᓯᒪᔪᓂᒃ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑎᓂᒃ, ᐊᒻᒪᓗ ᐊᖏᖅᓯᒪᔭᕆᐊᖃᖅᓱᑎᒃ ᓴᓇᔪᒪᔪᑦ ᓯᕗᓂᐊᒍᑦ ᑐᓂᔭᐅᓚᐅᖏᓐᓂᖏᓐᓂᒃ ᐱᐅᔫᓂᕋᖅᑕᐅᓂᕐᒥᒃ ᒪᓕᑦᑎᐊᕐᓂᕋᐅᑎᓂᒃ ᒪᓕᒋᐊᓕᖕᓂᒃ.

ᐸᕐᓇᐃᔩᑦ ᑲᒥᓯᓇᒃᑯᑦ ᓯᕗᒻᒧᐊᒃᓯᓂᐊᓕᖅᐳᑦ ᐃᓱᒪᓕᐅᕆᔭᒥᓂᒃ ᐊᒻᒪᓗ ᐊᓯᖏᓐᓂᒃ ᐊᑐᓕᖁᔭᓕᐊᖏᓐᓂᒃ ᓈᒪᔪᓂᒃ ᓄᓇᐃᑦ ᐊᑐᖅᑕᐅᔪᓐᓇᕐᓂᖏᓐᓄᑦ ᑲᒪᔨᐅᕙᒃᑐᓄᑦ/ᐊᖏᖅᑎᐅᕙᒃᑐᓄᓪᓗᓐᓃᑦ, ᐱᓕᕆᓂᐊᕐᒪᑕ ᓚᐃᓴᓐᓯᖏᑦ ᐊᒻᒪᓗ ᐊᖏᖅᑕᐅᔾᔪᑎᖏᑦ ᑐᓂᓂᐊᓕᖅᑕᖏᑦ ᐊᑐᓕᖅᑎᑦᑎᔾᔪᑎᖏᑦ ᐃᓚᑖᕆᔭᐅᓂᖏᓐᓂᒃ ᓇᓗᓇᐃᖅᑕᐅᓯᒪᓗᑎᒃ ᑎᑎᖃᖏᓐᓂᒃ ᐃᓱᒪᓕᐅᕈᑕᐅᓯᒪᔪᓂ. ᑐᑭᑖᕈᑕᐅᓯᒪᒍᑎᒃ ᓴᓇᔭᐅᔪᒪᔪᑦ ᑐᒃᓯᕋᖅᑕᐅᔪᑦ ᒪᓕᑦᑎᐊᕐᓂᖏᓐᓂᒃ ᓄᓇᐃᑦ ᐊᑑᑎᒃᓴᖏᓐᓂᑦ ᐸᕐᓇᐅᑎᓂᒃ, ᑲᒥᓯᓇᒃᑯᑕᐅᖅ ᓯᕗᒻᒧᐊᒃᑎᑦᑎᓂᐊᕆᕗᑦ ᐊᔾᔨᖏᓐᓂᒃ ᓴᓇᔪᒪᓂᕐᒧᑦ ᑐᒃᓯᕋᐅᑎᓂᒃ, ᐃᓱᒪᓕᐊᕆᓯᒪᔭᖏᓐᓂᒡᓗ ᐊᒻᒪᓗ ᖃᓄᐃᑐᑐᐃᓐᓇᕐᓂᒃ ᐊᑐᓕᖁᔭᓕᐊᒥᓂᒃ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ, ᖃᐅᔨᓴᖅᑕᐅᔪᒃᓴᒪᐅᑕᐅᓪᓗᑎᒃ, ᑕᐃᒃᑯᐊ ᑕᐃᒪᐃᓐᓇᕋᑎᒃ ᑭᓯᐊᓂ ᓴᓇᔭᐅᔪᒪᔪᓂᒃ ᑐᒃᓯᕋᖅᓯᒪᔪᑦ ᒪᓕᖏᑐᓐᓇᐅᑎᖃᖅᑎᑕᐅᒍᑎᒃ ᖃᐅᔨᓴᖅᑕᐅᒃᑲᓐᓂᕆᐊᖃᖏᓐᓂᕐᒥᒃ ᒪᓕᒃᑕᐅᓪᓗᑎᒃ ᐃᓗᓕᖏᑦ ᐃᓚᒃᑲᓐᓂᖏᓐᓃᑦᑐᑦ 12-1-ᒥ ᓄᓇᕗᒻᒥ ᓄᓇᑖᕈᑎᓂ ᐊᖏᕈᑎᓂ.