ᑎᑎᕋᖅᑕᐅᓵᖅᓯᒪᔪᑦ ᓄᓇᕗᒻᒥ ᓄᓇᐃᑦ ᐋᑐᑎᒃᓴᖏᓐᓄᑦ ᐸᕐᓇᐅᑏᑦ

ᓄᓇᕗᒻᒥ ᐸᕐᓇᐃᔨᒃᑯᑦ ᑲᒥᓯᓇᒃᑯᖏᑦ ᓴᓇᓯᒪᓕᕐᒪᑕ ᑎᑎᕋᖅᑕᐅᓵᖅᓯᒪᓕᖅᑐᓂᒃ ᓄᓇᐃᑦ ᐊᑑᑎᒃᓴᖏᓐᓂᑦ ᐸᕐᓇᐅᑎᓂᒃ ᓄᓇᕗᒻᒥ ᓄᓇᒋᔭᐅᔪᒥ. ᑎᑎᕋᖅᑕᐅᓵᖅᓯᒪᔪᑦ ᐸᕐᓇᐅᑏᑦ ᐃᓗᓕᖃᖅᐳᑦ ᑕᑯᑎᑦᑎᔾᔪᑎᒃᓴᓂᒃ ᖃᓄᖅ ᓄᓇᕗᒻᒥ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᐅᑏᑦ ᓇᓗᓇᐃᒃᑯᑕᐅᔪᓐᓇᕐᒪᖔᑕ ᐊᒻᒪᓗ ᒪᓕᒐᒃᓴᐅᔪᓐᓇᕐᒪᖔᑕ ᓄᓇᒥᐅᑕᐃᑦ ᐊᑐᖅᑕᐅᔪᓐᓇᕐᓂᖏᓐᓂᑦ ᐊᒻᒪᓗ ᓴᓇᕝᕕᐅᔪᓐᓇᕐᓂᖏᓐᓄᑦ, ᐊᖏᖅᑕᐅᓯᒪᓕᕈᑎᒃ. ᑲᒥᓯᓇᒃᑯᑦ ᐊᑐᓕᕐᒪᑕ ᑎᑎᕋᖅᑕᐅᓵᖅᓯᒪᔪᓂᒃ ᐸᕐᓇᐅᑎᓂᒃ ᐃᓱᒪᒋᔭᐅᖁᓪᓗᒋᑦ ᐅᖃᐅᓯᒃᓴᐅᓂᐊᖅᑐᑦ ᓄᓇᓕᖕᓂ ᐊᒻᒪᓗ ᐊᓯᖏᓐᓄᑦ ᐃᓚᒋᔭᐅᖃᑦᑕᕆᐊᖃᖅᑐᓄᑦ, ᐊᒻᒪᓗ ᐱᔫᒥᓴᐅᑕᐅᓪᓗᑎᒃ ᑐᓴᕐᕕᐅᔪᓐᓇᕐᓂᖏᑦ ᐃᓄᓕᒫᑦ ᐃᑲᔪᕐᓂᐊᕐᒪᑕ ᐸᕐᓇᐅᑎᓄᑦ ᐱᐅᓂᖅᓴᐅᓕᕈᓐᓇᕐᓂᖏᓐᓄᑦ.

ᑎᑎᕋᖅᑕᐅᓵᖅᓯᒪᔪᑦ ᐸᕐᓇᐅᑏᑦ ᐃᓗᓕᖃᖅᐳᑦ ᑐᕌᒐᕆᔭᐅᔪᓂᒃ, ᑎᑭᑕᐅᔪᒪᔪᓂᒃ ᐊᒻᒪᓗ ᐊᑐᐊᒐᕐᓂᒃ ᓄᓇᐃᑦ ᐊᑑᑎᒃᓴᖏᓐᓄᑦ ᐸᕐᓇᑎᓂᒃ ᓄᓇᕗᒻᒥ. ᓄᓇᐃᑦ ᐊᒻᒪᓗ ᐃᓱᒪᓘᑖᐅᔪᑦ ᓇᓗᓇᐃᖅᑕᐅᓯᒪᓕᖅᐳᑦ ᐱᒻᒪᕆᐅᓂᖏᓐᓂ ᑕᒪᐃᓐᓂ ᑐᕌᒐᕆᔭᐅᔪᓂ ᐅᖃᐅᓯᐅᓯᒪᕗᑦ, ᐊᒻᒪᓗ ᐊᑕᐅᓯᕐᒥᒃ ᓇᓪᓕᐊᖕᓂᑐᐃᓐᓇᖅ ᐅᑯᓇᓂ ᐊᑖᓃᑦᑐᓂᒃ ᓄᓇᐃᑦ ᐊᑑᑎᒃᓴᖏᓐᓄᑦ ᑎᒃᑯᐊᖅᑕᐅᓯᒪᓪᓗᑎᒃ ᐅᕝᕙᓗᓐᓃᑦ ᐊᑐᓕᖁᔭᐅᓯᒪᔪᓂᒃ ᑎᒃᑯᐊᖅᑕᐅᓯᒪᕗᑦ:

PSE ᓴᐳᓐᓂᐊᖅᑕᐅᓂᖏᑦ ᐊᒻᒪᓗ ᐊᑐᖅᑕᐅᖏᓐᓇᕈᓐᓇᕐᓂᖏᑦ ᐊᕙᑎᒋᔭᐅᔪᑦ
ECP ᐊᑐᖅᐸᓪᓕᐊᓇᓱᐊᕐᓂᖅ ᓴᐳᓐᓂᐊᖅᓯᒪᓂᒃᑯᑦ ᐸᕐᓇᐃᓂᕐᒥᒃ
BHC ᖃᓄᐃᖏᓐᓂᖅᓴᐅᖁᔨᓂᕐᒧᑦ ᓄᓇᓕᖕᓂᒃ
ESED ᐱᔫᒥᓴᐃᓂᖅ ᑲᔪᓰᓐᓇᕈᓐᓇᖅᑐᓂᒃ ᑮᓇᐅᔭᓕᐅᕈᑎᒃᓴᓂᒃ ᐱᕙᓪᓕᐊᑎᑦᑎᓂᖅ
MU ᐊᑕᐅᓯᐅᖏᑦᑐᒥᒃ ᐊᑑᑎᖃᖅᑐᖅ

ᓄᓇᐃᑦ ᐊᑑᑎᒃᓴᖏᓐᓄᑦ ᑎᒃᑯᐊᖅᑕᐅᓯᒪᔪᑦ ᐱᔪᓐᓇᐅᑕᐅᕗᑦ ᐊᑐᖅᑕᐅᔪᓐᓇᕐᓂᖏᓐᓂᒃ ᒪᓕᒃᑐᓂᒃ ᓇᓗᓇᐃᖅᑕᐅᓯᒪᔪᓂᒃ ᐱᒻᒪᕆᐅᑎᑕᐅᔪᓂᒃ ᐊᒻᒪᓗ ᐊᔪᕐᓇᖅᑎᑦᑎᔪᓐᓇᖅᓱᑎᒃ ᓈᒻᒪᖑᔾᔪᑕᐅᔪᓐᓇᖅᑐᓂᒃ. ᐊᑐᓕᖁᔭᐊᖑᔪᑦ ᐊᑑᑎᖃᖅᐳᑦ ᐅᖃᐅᔾᔨᒋᐊᕈᑕᐅᓂᕐᒥᒃ ᓴᓇᔪᒪᔪᓄᑦ ᐊᒻᒪᓗ ᒪᓕᒐᓕᕆᔨᐅᖃᑕᐅᕙᒃᑐᓄᑦ ᐃᓱᒪᓘᑕᐅᓂᖏᓐᓂᒃ ᐃᓱᒪᒋᔭᐅᖃᑦᑕᕆᐊᖃᖅᑐᓂᒃ ᕿᒥᕐᕈᐊᖅᑕᐅᓂᖏᓐᓂᒃ ᓴᓇᔪᒪᓂᕐᒧᑦ ᑐᒃᕋᐅᑏᑦ. 

ᑎᑎᕋᖅᑕᐅᓵᖅᓯᒪᔪᑦ ᐸᕐᓇᐅᑏᑦ ᖃᕆᑕᐅᔭᒃᑯᑦ ᑎᑭᓴᒐᒃᓴᐅᕗᑦ ᐅᕙᓐᖓᑦ.   ᐃᓚᒋᔭᐅᖃᑕᐅᔪᑦ ᑎᑎᖃᐃᑦᑕᐅᖅ ᐊᑐᐃᓐᓇᐅᒋᕗᑦ, ᓲᕐᓗ ᐊᓯᖔᖏᓐᓂᒃ ᐊᑐᖅᑕᐅᔪᓐᓇᖅᑐᓄᑦ ᐊᒻᒪᓗ ᐊᑐᓕᖁᔭᓕᐊᖑᓯᒪᔪᓄᑦ ᐅᓂᒃᑳᓕᐊᑦ, ᐱᑕᖃᕐᒪᑕ ᑕᒪᐃᓐᓂᒃ ᑕᑯᔭᐅᔪᓐᓇᕐᓂᖏᓐᓂᒃ ᖃᐅᔨᒪᔾᔪᑎᒃᓴᐃᑦ ᐊᑐᖅᑕᐅᓚᐅᖅᑐᑦ ᐃᓱᒪᒃᓴᖅᓯᐅᕈᑕᐅᓪᓗᑎᒃ ᑲᒥᓯᓇᒃᑯᓐᓄᑦ, ᐊᒻᒪᓗ ᑐᑭᓕᐅᕈᑎᒋᓚᐅᖅᑕᖏᓐᓂᒃ ᐃᓱᒪᓕᐅᕈᑎᒋᔭᖏᓐᓄᑦ. 

ᐊᑐᕈᓐᓇᕐᒥᔪᑎᑦᑕᐅᖅ ᓴᓇᓯᒪᔭᑦᑎᓐᓂᒃ  ᐊᐅᓚᑕᐅᔪᓐᓇᖅᑐᒥᒃ ᐊᑐᕐᓂᕐᒥᒃ ᓄᓇᖑᐊᕐᒥᒃ ᐱᓕᕆᔾᔪᑎᒥᒃ ᖃᐅᔨᓴᕐᓂᕐᒧᑦ ᐃᓗᓕᖏᓐᓂᒃ ᑎᑎᕋᖅᑕᐅᓵᖅᓯᒪᔪᑦ ᐸᕐᓇᐅᑏᑦ. 

ᑭᖑᓂᐊᒍᑦ ᐱᓕᕆᐊᒃᓴᒃᑯᓃᑦ

ᒫᓐᓇᓕ ᑕᐃᒪ ᑎᑎᕋᖅᑕᐅᓵᖅᓯᒪᔪᑦ ᐸᕐᓇᐅᑎᑦ ᐃᓄᓕᒫᓄᐊᖅᑕᐅᓯᒪᓕᕐᒪᑦ, ᑲᒥᓯᓇᒃᑯᑦ ᐱᔫᒥᓴᐃᓕᖅᐳᑦ ᐃᓱᒪᒋᔭᖏᓐᓂᒃ ᐅᖃᖃᑦᑕᖁᔨᓂ ᐃᓄᓕᒫᓂᒃ ᐱᓪᓗᒋᑦ ᐃᓗᓕᖏᑦ. ᑲᒥᓯᓇᒃᑯᑦ ᐃᓕᓐᓂᐊᖅᑎᑦᑎᓪᓗᑎᒃ ᑲᑎᒪᑎᑦᑎᓂᐊᖅᑐᑦ ᑐᓴᖅᐸᓪᓕᐊᔭᒥᓂᒡᓗ ᑲᑎᖅᓱᐃᓗᑎᒃ ᐱᔾᔪᑎᖃᖅᑐᓂᒃ ᑎᑎᕋᖅᑕᐅᓵᖅᓯᒪᔪᓂᒃ ᐸᕐᓇᐅᑎᓕᒃᓂ ᑕᒪᐃᓐᓂᒃ ᓄᓇᕗᒻᒥ ᓄᓇᓕᖕᓂ, ᐊᒻᒪᓗ ᐃᓄᖕᓂᒃ ᓄᓇᕕᖕᒥᐅᑕᓂᒃ ᐊᒻᒪᓗ ᐊᑖᐹᔅᑲᒥᐅᓂᒃ ᒪᓂᑑᐸᒥᐅᓂᒡᓗ ᐊᓪᓚᓂᒃ, ᐊᕐᕋᒎᓂᐊᓕᖅᑐᒥ. ᐊᓯᖏᓐᓂᒃᑕᐅᖅ ᐃᓕᓐᓂᐊᖅᑎᑦᑎᓂᐊᕐᒥᔪᑦ ᐱᓕᕆᕕᖃᖅᐸᒃᑐᓂᒃ ᐊᖏᔫᑎᓂᒃ ᓴᓇᕝᕕᓕᖕᓂᒃ ᐊᒻᒪᓗ ᒐᕙᒪᑯᓐᓂᒃ. ᑎᑭᓯᒪᕝᕕᒃᓴᐃᑦ ᓄᓇᓕᖕᓄᑦ ᐳᓚᕋᑦᑕᐅᑎᓂᕐᒧᑦ ᖃᖓᒃᑰᖓᓂᐊᕐᓂᖏᑦ ᐊᑐᐃᓐᓇᐅᕗᑦ ᐅᕙᖓᑦ.

ᓄᓇᓕᓕᒫᑦ ᑎᑭᓯᒪᕝᕕᐅᓚᐅᕐᓗᑎᒃ ᑲᒥᓯᓇᒃᑯᓐᓄᑦ, ᑐᓴᖅᑕᐅᓯᒪᔪᑦ ᐱᔾᔪᑎᓖᑦ ᑎᑎᕋᖅᑕᐅᓵᖅᓯᒪᔪᓂᒃ ᐸᕐᓇᐅᑎᓂᒃ ᐃᓄᓕᒫᑦ ᓵᖓᓂ ᓈᓚᒋᐊᖅᑐᕐᕕᐅᓯᒪᔪᓂ ᕿᒥᕐᕈᐊᖅᑕᐅᓂᐊᖅᐳᑦ, ᑭᖑᓪᓕᖅᐹᓪᓗ ᐋᕿᒋᐊᕈᑎᑦ ᐋᕿᒃᓱᖅᑕᐅᓗᑎᒃ, ᐊᒻᒪᓗ ᐸᕐᓇᐅᑎᑦ ᑐᓂᕐᕈᑕᐅᓕᕐᓗᑎᒃ ᒐᕙᒪᒃᑯᓐᓄᑦ ᐊᖏᖅᑕᐅᖁᓪᓗᒋᑦ. ᑭᖑᓂᐊᒍᑦ ᐊᖏᖅᑕᐅᓚᐅᕐᓗᑎᒃ, ᑕᒪᕐᒥᒃ ᓴᓇᔭᐅᔪᒪᔪᓄᑦ ᑐᒃᓯᕋᖅᑕᐅᓯᒪᔪᑦ ᒪᓕᖃᑦᑕᕆᐊᖃᓕᕐᓂᐊᖅᑐᑦ ᒪᓕᒐᖏᓐᓂᒃ ᐸᕐᓇᐅᑏᓂᑦᑐᓐᓂᒃ.

ᑐᑭᓯᓂᐊᕐᕕᐅᖃᑦᑕᓚᐅᖅᑐᓄᑦ ᑎᑎᖃᖁᑎᒋᔭᐅᔪᑦ

ᑲᒥᓯᓇᒃᑯᑦ ᑐᑭᓯᓂᐊᕐᕕᖃᖅᓯᒪᕗᑦ ᐸᕐᓇᐃᔨᐅᖃᑎᒋᕙᒃᑕᒥᓂᒃ ᐃᓚᒥᓂᒃ ᐊᓂᒍᖅᓯᒪᓕᖅᑐᓂ ᓯᑕᒪᓂᒃ ᐊᕐᕋᒍᓂᒃ ᖃᐅᔨᒪᔾᔪᑎᒃᓴᖃᖅᑎᑕᐅᑦᑎᐊᖁᓪᓗᒋᑦ ᑎᑎᕋᖅᑕᐅᓵᖅᓯᒪᔪᑦ ᐸᕐᓇᐅᑏᑦ. ᑕᒪᐃᓐᓂᒃ ᑕᑯᔭᒃᓴᐅᕗᑦ ᑕᐃᒃᑯᐊ ᑐᑭᓯᓂᐊᕐᕕᐅᖃᑦᑕᓚᐅᖅᑐᑦ ᐅᕙᖓᑦᑦ ᑐᑭᓯᓂᐊᕐᕕᒋᔭᐅᖃᑦᑕᓚᐅᖅᑐᓂᒃ ᑎᑎᖃᖁᑎᕗᑦ.  ᑕᒪᕐᒥᒃ ᐅᖃᐅᓯᐅᓯᒪᔪᑦ ᑐᓴᖅᑕᐅᓯᒪᔪᑦ ᑲᒪᒥᓯᓇᒃᑯᓐᓄᑦ ᐱᓪᓗᒋᑦ ᑎᑎᕋᖅᑕᐅᓵᖅᓯᒪᔪᑦ ᐸᕐᓇᐅᑏᑦ ᑖᒃᑯᓇᓂ ᑎᑎᖃᖁᑎᖃᕐᕕᒦᓐᓂᐊᕗᑦ.