ᓴᙱᒃᑎᒋᐊᕐᓗᒍ ᐱᓕᕆᖃᑎᒌᖕᓂᖅ ᐃᒪᕐᒥᐅᑕᓕᕆᓂᕐᒧᑦ ᐊᐅᓚᑦᑎᕝᕕᖃᕐᓂᖅ ᓄᓇᕗᑦᒥᐅᓄᑦ
ᐃᖃᓗᐃᑦ, ᓄᓇᕗᑦ, ᔭᓄᐊᕆ 13, 2026—ᓄᓇᕗᑦᒥ ᐃᒪᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ (NMC) ᐅᐱᒍᓱᒃᐳᑦ ᑐᓴᖅᑎᑦᓯᔭᕆᐊᒃᓴᖅ ᓴᖅᑭᑕᐅᓂᖓᓂᒃ 2026-2031 ᐋᖅᑭᒃᓯᒪᐅᑎᒃᓴᓄᑦ ᐸᕐᓇᐅᑎᒥᒃ, ᐊᕐᕌᒍᓄᑦ−ᑕᓪᓕᒪᓄᑦ ᐊᑉᖁᑎᒃᓴᖅ ᓴᙱᒃᑎᒋᐊᕐᓗᒍ ᓄᓇᕘᑉ ᐱᓕᕆᐊᒃᓴᖓ ᐅᑭᐅᖅᑕᖅᑐᒥ ᐃᒪᕐᒥᐅᑕᓕᕆᓂᕐᒧᑦ ᐊᐅᓚᑦᑎᕝᕕᖃᕐᓂᕐᒥᒃ, ᐱᐅᓯᒋᐊᖅᑎᑦᓯᓗᑎᒃ ᐃᓄᐃᑦ ᓯᕗᓪᓕᐅᑎᔪᒪᔭᖏᑦᓂᒃ ᓴᐳᔾᔨᓯᒪᓗᑎᒡᓗ ᐃᒪᕐᒥᐅᑕᓂᒃ ᐃᓂᓂᒃ ᑭᖑᕚᒃᓴᑉᑎᒃᓄᑦ.
ᑐᙵᕕᖃᖅᖢᓂ ᑎᑎᕋᖅᓯᒪᓂᓕᒃ 15.4.1−ᒥ ᓄᓇᕗᑦᒥ ᐊᖏᕈᑎᒥ ᑕᓯᐅᖅᑕᐅᓪᓗᓂᓗ ᐃᓄᐃᑦ ᖃᐅᔨᒪᔭᑐᖃᖏᑦᓄᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᑦᓄᑦ, ᑖᒻᓇ ᐱᕙᒌᔭᖅᑕᐅᓯᒪᔪᖅ ᐋᖅᑭᒃᓯᒪᓕᖅᑎᑦᓯᕗᖅ ᑐᑭᓯᓇᑦᑎᐊᖅᑐᒥᒃ ᖃᓄᐃᓕᐅᖅᑕᐅᕙᓪᓕᐊᓇᔭᖅᑐᒥᒃ ᖃᓄᖅ ᑖᑉᑯᐊ ᓄᓇᕗᑦᒥ ᐃᒪᕐᒥᐅᑕᓕᕆᔨᒃᑯ ᑲᑎᒪᔨᖏᑦ ᑲᔪᓯᑎᑦᓯᓇᔭᕐᒪᖔᑕ ᐱᔭᒃᓴᕆᔭᒥᓂᒃ ᐅᖃᐅᔾᔪᐃᕙᒡᓗᑎᒃ ᒐᕙᒪᒋᔭᐅᔪᓂᒃ ᐃᒪᕐᒥᐅᑕᐃᑦ ᐃᓂᖏᑦᓂᒃ.
"ᓄᓇᕘᑉ ᓄᓇᓕᖏᑦ ᑕᕆᐅᕐᒥᑦ ᓂᕿᒃᓴᖃᖅᐳᑦ, ᐃᓕᖅᑯᓯᖃᖅᖢᑎᒃ, ᐃᓅᓇᓱᐊᖅᖢᑎᒡᓗ," ᐅᖃᖅᑐᖅ ᔮᓱᐊ ᐋᕆᐊᖅ, ᑲᑎᒪᔨ ᑲᑎᒪᑎᑦᑎᓯᓗ ᓄᓇᕗᑦᒥ ᐸᕐᓇᐃᔨᑦ ᑲᑎᒪᔨᖏᑦᓄᑦ." ᑖᒻᓇ ᑐᑭᒧᐊᒍᑎᒃᓴᓄᑦ ᐸᕐᓇᐅᑎ ᓄᓇᕗᑦᒥ ᐃᒪᕐᒥᐅᑕᓕᕆᓂᕐᒧᑦ ᑲᑎᒪᔨᓂᒃ ᐅᒃᐱᕆᔭᐅᔪᖕᓇᕐᒪᑕ ᐊᒻᒪ ᐅᐱᒋᔭᐅᑦᑎᐊᕐᓗᑎᒃ ᓂᐱᒋᔭᐅᓗᑎᒃ ᑲᑐᔾᔨᖃᑎᒌᒡᓗᑎᒃ ᐃᒪᕐᒥᐅᑕᓂᒃ ᐊᐅᓚᑦᑎᓂᕐᒥᒃ, ᐃᓄᐃᑦ ᖃᐅᔨᒪᔭᑐᖃᖏᑦᓂᒃ ᐊᒻᒪ ᓄᓇᓕᖕᓂ ᓯᕗᓪᓕᐅᖁᔭᐅᔪᓂᒃ ᐃᓱᒪᓕᐅᕈᑎᖃᖅᑎᓪᓗᒋᑦ."
ᖃᓄᖅᑑᕐᓂᕐᒧᑦ ᓯᕗᓪᓕᐅᓂᐊᖅᑐᑦ
2026-2031-ᒧᑦ ᖃᓄᐃᓕᐅᖅᐸᓪᓕᐊᓂᕐᒧᑦ ᐱᕙᒌᔭᖅᑕᐅᓯᒪᔪᖅ ᑕᐅᑐᒐᖃᓪᓗᐊᑕᖅᐳᖅ ᒪᕐᕉᖕᓂᒃ ᖃᓄᐃᓕᐅᖅᐸᓕᐊᓂᕐᒧᑦ ᓯᕗᓪᓕᖅᐸᐅᓯᒪᔫᖕᓂᒃ:
- ᐱᕚᓪᓕᖅᑎᓪᓗᒋᑦ ᓄᓇᕗᑦᒥ ᐃᒪᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ ᐱᔪᖕᓇᕐᓂᖏᑦ ᓴᙱᒃᑎᒋᐊᕐᓗᒍᓗ ᐱᓕᕆᖃᑎᒌᖕᓂᖅ ᐃᓄᐃᑦ ᖃᐅᔨᒪᔭᑐᖃᖏᑎᒍᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᑎᒍᑦ.
- ᐃᑲᔪᖅᑐᕐᓗᒋᑦ ᐱᓕᕆᖃᑎᒌᖕᓂᖅ ᐃᒪᕐᒥᐅᑕᓕᕆᓂᕐᒧᑦ ᐊᐅᓚᑦᑎᕝᕕᖃᕐᓂᖅ ᒪᓕᒐᖅᑎᒍᑦ ᐊᑐᐊᒐᑎᒍᓪᓗ ᑐᑭᒧᐊᒃᑎᑦᓯᓂᒃᑯᑦ ᓄᓇᕘᒥ, ᒐᕙᒪᑐᖃᒃᑯᓯᓂ ᐊᒻᒪ ᓄᓇᕐᔪᐊᓕᒫᒥ.
ᑲᑐᔾᔨᖃᑎᒌᖕᓂᒃᑯᑦ ᑕᐅᑐᙳᐊᖅᑕᐅᔪᖅ ᑕᕆᐅᕐᔪᐊᕐᒥ ᐊᐅᓚᑦᑎᕝᕕᖃᕐᓂᖅ
ᓄᓇᕗᑦᒥ ᐃᒪᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ ᑕᐅᑐᙳᐊᖅᑕᖓᑦ ᐱᔾᔪᑎᖃᓪᓗᐊᑕᖅᐳᖅ ᑲᔪᓰᓐᓇᕈᖕᓇᖅᑐᒥᒃ ᐊᐅᓚᑦᑎᓂᕐᒥᒃ ᐃᒪᕐᒥᐅᑕᓂᒃ ᓇᓗᙱᑦᑎᐊᕈᒪᓂᕐᒧᑦ ᐊᕗᖓᒃᑲᓐᓂᖅ ᐱᕚᓪᓕᕈᑕᐅᓇᔭᖅᑐᓂᒃ ᐃᓄᖕᓄᑦ, ᓄᓇᕗᑦᒥᐅᓄᑦ ᑲᓇᑕᒥᐅᓕᒫᓄᓪᓗ. ᐱᓕᕆᖃᑎᒌᖕᓂᕐᒧᑦ ᐸᕐᓇᐅᑎ ᐊᖏᖅᓯᒪᓂᖃᖅᑐᖅ ᐃᓚᓕᐅᔾᔨᓂᕐᒥᑦ ᐃᓄᐃᑦ ᖃᐅᔨᒪᔭᑐᖃᖏᑦᓂᑦ ᓇᐅᒃᑯᓕᒫᖅ ᑲᑎᒪᔩᑦ ᐱᓕᕆᐊᖏᑦᓂᑦ, ᑭᒡᒐᖅᑐᐃᓂᕐᒥᑦ ᑲᑎᖅᓱᖅᓯᒪᔪᓂᑦ ᐊᑐᐊᒐᕐᓂᑦ, ᓇᓗᓇᐃᖅᓯᓂᕐᒥᓪᓗ ᐃᓄᐃᑦ ᓂᐱᖏᑦ ᐋᖅᑭᑦᓱᐃᓂᕐᒥᑦ ᓯᕗᓂᑦᓴᖓᓂᑦ ᐅᑭᐅᖅᑕᖅᑐᒥᑦ ᐃᒪᕐᒥᐅᑕᓂᑦ ᐊᐅᓚᑦᓯᓂᕐᒥᑦ.
ᑕᒪᓐᓇ ᓴᖅᑭᑎᑕᐅᓂᖓ ᓇᓗᓇᐃᖅᓯᕗᖅ ᐱᒻᒪᕆᐊᓗᖕᒥᒃ ᐊᓂᒍᖅᑕᐅᔪᒥᒃ ᑲᑎᒪᔨᓄᑦ, ᐋᖅᑭᒃᓱᐃᕙᓪᓕᐊᓪᓗᑎᒃ ᑐᙵᕕᒋᔭᐅᔪᓂᒃ ᐋᖅᑭᒃᑕᐅᓚᐅᖅᑐᓂᒃ ᓯᕗᓪᓕᕐᒥ ᖃᓄᐃᓕᐅᕐᓂᐊᕐᓂᕐᒧᑦ ᐱᕙᒌᔭᖅᑕᐅᓯᒪᔪᒥ (2018-2023). ᐊᕐᕌᒍᓂ ᑕᓪᓕᒪᓂ ᐊᒡᒋᖅᑐᓂ, ᓄᓇᕗᑦᒥ ᐃᒪᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ ᑕᐅᑐᒐᖃᓪᓗᐊᑕᕐᓂᐊᖅᐳᑦ ᓴᙱᒃᑎᒋᐊᖅᑎᑦᓯᓂᕐᒥᒃ ᐱᓕᕆᐊᒃᓴᒥᓂᒃ ᐊᐅᓚᑦᑎᔨᐅᓗᑎᒃ ᐅᖃᐅᔾᔪᐃᔨᐅᓗᑎᒡᓗ ᑎᒥᐅᓗᑎᒃ, ᐃᓄᐃᑦ ᖃᐅᔨᒪᔭᑐᖃᖏᑦᓂᒃ ᓴᖅᑭᑎᑦᑎᓗᑎᒃ, ᐃᓄᐃᑦ ᓯᕗᓪᓕᖅᐸᐅᑦᑎᐅᑎᔪᒪᔭᖏᓐᓂᒃ, ᖃᐅᔨᓴᖅᑐᓕᕆᓂᕐᒧᑦ ᖃᐅᔨᒪᓂᕆᔭᖏᑦᓂᒃ ᒪᓕᒋᐊᓕᖕᓄᓪᓗ ᐊᑐᖅᑕᐅᕙᒃᑐᓂᒃ ᐊᑕᐅᑦᑎᒃᑯᑦ ᑭᐅᔪᒪᓪᓗᑎᒃ ᓴᖅᑭᑉᐸᓪᓕᐊᔪᓂᒃ ᐃᒪᕐᒥᐅᑕᓂᒃ ᐊᓂᒍᖅᑎᓐᓇᓱᒋᐊᖃᖅᐸᒃᑐᓂᒃ, ᐃᓚᒋᔭᐅᓗᓂ ᐊᒥᓱᖑᖅᓯᒪᕚᓪᓕᖅᓯᒪᔪᑦ ᐅᒥᐊᕐᔪᐊᒃᑰᖅᑎᑦᓯᕙᖕᓂᕐᒧᑦ ᐱᓕᕆᐊᖑᕙᒃᑐᑦ ᐱᕙᓪᓕᐊᓂᕆᔭᐅᔪᓄᓪᓗ ᐊᒃᓱᕈᕈᑕᐅᕙᒃᑐᑦ.
"ᓴᙱᔪᒥᒃ, ᐊᐅᓚᑕᐅᑦᑎᐊᖅᑐᒥᒃ ᐊᐅᓚᑦᑎᕝᕕᖃᕐᓂᖅ ᐱᒻᒪᕆᐊᓘᕗᖅ ᐅᑭᐅᖅᑕᖅᑐᖅ ᐊᓯᔾᔨᖅᐸᓪᓕᐊᖏᓐᓇᖅᑎᓪᓗᒍ," ᐅᖃᓚᐅᖅᐳᖅ ᐸᑐᕆᓴ ᐃᓄᐊᐱᒃ, ᑲᑎᒪᔨ ᑲᒥᓯᓇᒋᔭᐅᑉᓗᓂᓗ ᓄᓇᕗᑦᒥ ᐸᕐᓇᐃᔨᓄᑦ." ᑕᕝᕘᓇ ᐱᓕᕆᖃᑎᒌᖕᓂᕐᒧᑦ ᐸᕐᓇᐅᑎᒃᑯᑦ, ᐱᓕᕆᐊᖃᖅᑐᒍᑦ ᓇᓗᓇᐃᖅᓯᓂᕐᒥᑦ ᓄᓇᕘᑉ ᑕᕆᐅᕐᒥᐅᑕᖏᑦ ᖃᓄᐃᖏᑦᓯᐊᖏᓐᓇᖁᑉᓗᒋᑦ, ᐱᕙᓪᓕᐊᑦᓯᐊᕐᓗᑎᒃ, ᐊᐅᓚᑕᐅᑦᓯᐊᕐᓗᑎᓪᓗ ᑭᖑᕚᕆᓂᐊᖅᑕᑉᑎᒃᓄᑦ."
"ᑲᑐᔾᔨᖃᑎᒌᖕᓂᒃᑯᑦ ᐱᓕᕆᕝᕕᓕᒫᓂᑦ ᐃᒃᐱᒍᓱᑦᑎᐊᖕᓂᖕᒥᓪᓗ ᐃᓄᖕᓂᑦ ᑲᒪᑦᑎᐊᖕᓂᖕᓂᑦ ᑐᙵᕕᒋᔭᐅᕗᑦ ᑲᔪᓰᓐᓇᕈᖕᓇᖅᑐᓂᑦ ᐃᒪᕐᒥᐅᑕᓂᑦ ᐊᐅᓚᑦᑎᓂᖕᓂᑦ ᓄᓇᕗᑦᒥᑦ," ᐅᖃᖅᑐᖅ ᑖᓂᐅᓪ ᓲᑦᓴᒃ, ᑲᑎᒪᔨ ᑲᑎᒪᑎᑦᓯᔨᓗ ᓄᓇᕗᑦᒥᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦᓄᑦ." ᑖᒻᓇ ᐅᐸᓗᖓᐃᔭᐅᑎᓄᑦ ᐸᕐᓇᐅᑎ ᓴᙱᒃᑎᒋᐊᖅᑎᑦᓯᕗᖅ ᑲᑐᔾᔨᓗᑕ ᐱᔪᖕᓇᕐᓂᑦᑎᑉᓂᒃ ᑐᓴᐅᒪᑦᑎᐊᕐᓗᑕ ᐊᒻᒪ ᑐᑭᒧᐊᒃᑎᑕᐅᑦᑎᐊᕐᓗᑕ ᐅᖃᐅᔾᔨᒋᐊᕈᖕᓇᖁᑉᓗᑕ ᐃᒪᕐᒥᐅᑕᓕᕆᓂᕐᒧᑦ ᐱᔾᔪᑎᓕᖕᓂᒃ."
ᓄᓇᕗᒻᒥ ᐃᒪᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ ᓴᖅᑭᑕᐅᓯᒪᔪᑦ ᑎᑎᕋᖅᓯᒪᓂᓕᒃ 15 ᒪᓕᒃᖢᒍ ᓄᓇᕗᑦᒥ ᐊᖏᕈᑎᒥ, ᓄᓇᕗᑦᒥ ᐃᒪᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ ᐅᑯᐊᖑᕗᑦ ᓄᓇᕗᑦᒥ ᐊᕙᑎᓕᕆᔨᒃᑯᑦ ᑲᑎᒪᔨᖏ5ᓂᒃ,ᓄᓇᕗᑦᒥ ᐸᕐᓇᐃᔨᑦ ᑲᑎᒪᔨᖏᑦᓂᒃ, ᓄᓇᕗᑦᒥ ᐃᒪᓕᕆᔨᑦ ᑲᑎᒪᔨᖏᑦᓂᒃ, ᐊᒻᒪ ᓄᓇᕗᑦᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦᓂᒃ. ᐊᑕᐅᑦᑎᒃᑯᑦ, ᑖᑉᑯᐊ ᐱᓕᕆᕝᕖᑦ ᑭᒃᑯᑐᐃᓐᓇᓄᑦ ᒐᕙᒪᒋᔭᐅᔪᓄᑦ ᐱᑎᑦᓯᕙᒃᐳᑦ ᐊᐅᓚᑕᐅᔪᒥᒃ ᐅᖃᐅᔾᔪᐃᓂᕐᒥᒃ ᖃᓄᐃᓕᐅᖁᔨᓂᕐᒥᒡᓗ ᓄᓇᕘᑉ ᐃᒪᕐᒥᐅᑕᖁᑎᖏᑦᓂᒃ ᒐᕙᒪᒃᑯᑦᓄᑦ ᐃᑲᔪᖅᑐᐃᔪᒪᓪᓗᑎᒃ ᑲᔪᓰᓐᓇᕈᖕᓇᖅᑐᒥᒃ, ᐃᓄᖕᓄᑦ−ᑐᙵᕕᓕᖕᓂᒃ ᐃᒪᕐᒥᐅᑕᓂᒃ ᐊᐅᓚᑦᑎᕝᕕᖃᕐᓂᕐᒥᒃ.