ᐸᕐᓇᐅᑎᒥᑦ ᐊᑐᓕᖅᑎᑦᑎᓂᕐᒥᑦ
- ᕿᒥᕐᕈᓂᕐᒥᑦ ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᒥᑦ ᑕᐃᑲᓃᑦᑐᒥᑦ ᐸᕐᓇᐃᓂᕐᒧᑦ ᐊᕕᒃᑐᖅᓯᒪᔪᒥᑦ ᑖᒃᑯᓄᖓ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᓐᓄᑦ ᓇᓗᓇᐃᖅᓯᓂᕐᒥᑦ ᐱᒍᓐᓇᕐᒪᖔᖅ ᐋᒃᑲᓘᓐᓃᑦ ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᖅ ᒪᓕᑦᑎᐊᕋᓗᐊᕐᒪᖔᖅ ᒪᓕᒋᐊᓕᖕᓂᑦ ᐊᖏᖅᑕᐅᓯᒪᔪᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒥᑦ.
- ᑕᒪᐃᓐᓂᒃ ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᑦ ᑐᓂᔭᐅᖅᑳᕆᐊᓖᑦ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᓐᓄᑦ ᕿᒥᕐᕈᔭᐅᓂᕐᒧᑦ. ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᖅ ᑕᐃᑲᓃᒃᑯᓂ ᐊᖏᖅᑕᐅᔪᒥᑦ ᕿᑭᖅᑖᓗᒃ ᐅᐊᖕᓇᖓᓂ ᓄᓇᒥ ᐊᑐᕐᓂᕐᒧᑦ ᐸᕐᓇᐃᓂᕐᒥᑦ ᐊᕕᒃᑐᖅᓯᒪᔪᒥᑦ ᐅᕝᕙᓘᓐᓃᑦ ᑭᕙᓪᓕᕐᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐃᓂᕐᒥᑦ ᐊᕕᒃᑐᖅᓯᒪᔪᒥᑦ, ᖃᐅᔨᓴᖅᑕᐅᖅᑳᕆᐊᓕᒃ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᓐᓄᑦ ᒪᓕᑦᑎᐊᕋᓗᐊᕐᒪᖔᖅ ᑐᕌᖓᖃᓯᐅᑎᔪᒧᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒧᑦ.
- ᑐᓂᓯᓂᕐᒥᑦ ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᒥᑦ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᓐᓄᑦ, ᐱᓕᕆᒍᒪᔪᖅ ᓴᖅᑮᕆᐊᓕᒃ ᐃᓯᕈᑎᖕᒥᑦ ᖃᕆᑕᐅᔭᒃᑯᑦ ᐃᓯᕈᑎᒃᑯᑦ. ᑕᑕᑎᕈᓐᓇᓕᕋᔭᖅᑕᐃᑦ ᖃᕆᑕᐅᔭᒃᑯᑦ ᑐᒃᓯᕋᐅᑎ ᐊᒻᒪ ᐃᓚᓯᓗᑎᒃ ᖄᒃᑲᓐᓂᖃᒍᑦ ᑎᑎᖅᑲᕐᓂᑦ ᓈᒻᒪᒋᓇᓱᒋᔭᕐᓂᒃ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᐃᖅᑲᓇᐃᔭᖅᑎᖏᓐᓄᑦ ᑐᑭᓯᐅᒪᓂᖅᓴᐅᓂᐊᕐᒪᑕ ᐊᖏᓂᕆᔭᖓᓂ ᐱᓕᕆᐊᒃᓴᕆᔭᕐᓂᑦ.
- ᑕᐃᒪᐃᒐᔪᒃᐳᖅ, ᑐᓂᓯᒋᐊᖃᕋᔭᖅᑐᑎᑦ ᓇᐃᑦᑐᒥᑦ ᓇᓗᓇᐃᖅᓯᓗᑎᑦ ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᒥᑦ, ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᖅ ᐃᓂᖓ, ᓄᓇᐅᑉ ᐊᑐᖅᑕᐅᓂᖓ ᐊᒻᒪ ᓚᐃᓴᓐᓯᒨᖓᔪᓂᑦ, ᓱᓇᒃᑯᑖᖏᑦ ᐊᒻᒪ ᐱᖁᑏᑦ ᐊᑐᖅᑕᐅᓂᐊᖅᑐᑦ, ᐊᒻᒪ ᐊᑦᑐᐊᒐᔭᖅᑐᑦ ᐊᒻᒪ ᐊᑦᑕᑯᓂᑦ ᑲᒪᑦᑎᐊᕐᓂᕐᒥᑦ.
- ᑕᐃᒪᐃᓐᓂᕈᓂ ᐱᓕᕆᐊᒃᓴᓄᑦ ᑐᒃᓯᕌᕆᔭᐃᑦ ᐱᔭᕆᐊᑐᓂᖅᓴᐅᒃᐸᑦ, ᐅᕝᕙᓘᓐᓃᑦ ᑐᑭᓯᒋᐊᕈᑎᒃᓴᑦ ᐊᑐᐃᓐᓇᐅᔪᑦ ᓈᒻᒪᙱᓗᐊᖅᐸᑕ ᐅᕝᕙᓘᓐᓃᑦ ᑐᑭᓯᓇᖏᑉᐸᑕ, ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᐃᓕᖕᓄᑦ ᑐᓴᕆᐊᓛᖅᑐᑦ ᐊᒻᒪ ᑐᒃᓯᕋᕋᔭᖅᑐᑦ ᑐᑭᓯᒋᐊᕈᑎᒃᓴᒃᑲᓐᓂᕐᓂᒃ.
- ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᐱᔭᕇᖅᓯᕆᐊᓖᑦ ᕿᒥᕐᕈᓂᐅᔪᒥᑦ ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᒧᑦ 45 ᐅᓪᓗᐃᑦ ᑐᖔᓂ.
- ᒪᓕᑦᑎᐊᕆᐊᖃᕐᓂᕐᒥᑦ ᓇᓗᓇᐃᖅᓯᓂᖅ ᐃᓱᒪᓕᐅᖅᑕᐅᔪᖅ ᑐᓂᓯᓂᕐᒥᑦ ᒐᕙᒪᑐᖃᒃᑯᓐᓄᑦ ᐊᒻᒪ/ᐅᕝᕙᓘᓐᓃᑦ ᐅᑭᐅᖅᑕᖅᑐᒥᑦ ᑐᑦᑕᕐᕕᖕᓄᑦ ᑕᐃᑲᙵᑦ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᓐᓂ ᐱᔾᔪᑎᒋᓪᓗᒍ ᐊᖏᖅᑕᐅᖕᒪᖔᑦ ᐋᒃᑲᓘᓐᓃᑦ ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪ ᒪᓕᑦᑎᐊᕋᓗᐊᕐᒪᖔᖅ ᐊᖏᖅᑕᐅᓯᒪᔪᒧᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒥᑦ. ᐱᐅᑦᑎᐊᖅᑐᖅ ᒪᓕᑦᑎᐊᕆᐊᖃᕐᓂᕐᒥᑦ ᓇᓗᓇᐃᖅᓯᓲᑦ ᐃᓚᖃᑐᐃᓐᓇᕆᐊᓕᒃ ᒪᓕᒋᐊᓕᖕᓂᑦ ᑐᒃᓯᕋᖅᓯᒪᔪᖅ ᒪᓕᒋᐊᖃᖅᑕᖏᓐᓂᒃ ᐱᓕᕆᐊᒃᓴᓕᕆᓂᐊᕐᓗᓂ.
ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᑦ ᐸᕐᓇᐃᓂᕐᒥᑦ ᐊᕕᒃᑐᖅᓯᒪᔪᒥᑦ ᒪᓕᑦᑎᐊᕆᐊᓕᒃ ᑐᕌᖓᔪᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒥᑦ. ᓯᕗᓂᐊᒍᑦ ᓚᐃᓴᓐᓯ ᐅᕝᕙᓘᓐᓃᑦ ᐱᔪᓐᓇᖅᑎᑕᐅᓂᕐᒧᑦ ᑐᓂᔭᐅᑎᓪᓗᒍ ᓄᓇᒥ ᐊᑐᕐᓂᕐᒧᑦ ᐱᔪᓐᓇᕐᓂᖃᖅᑎᑦᑎᔨᓄᑦ, ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᓇᓗᓇᐃᖅᓯᖅᑳᕆᐊᓖᑦ ᐱᓕᕆᐊᒃᓴᖅ ᒪᓕᑦᑎᐊᖅᑐᖅ ᑐᕌᖓᔪᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒥᑦ.
ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᑦ ᑕᐃᑲᓃᖏᑦᑐᑦ ᐸᕐᓇᐃᓂᕐᒧᑦ ᐊᕕᒃᑐᖅᓯᒪᔪᒥᑦ ᐊᖏᖅᑕᐅᓯᒪᔪᒥᑦ ᐸᕐᓇᐅᑎᒥᑦ ᕿᒥᕐᕈᔭᐅᔭᕆᐊᓖᑦ, ᐃᓱᓕᐅᕆᓗᑎ 45 ᐅᓪᓗᐃᑦ ᑐᖔᓂ ᖃᐅᔨᓴᕐᓂᖃᕆᐊᖃᕐᒪᖔᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ.
- ᓚᐃᓴᓐᓰᑦ ᐊᒻᒪ ᐱᔪᓐᓇᕐᓂᖃᕐᓃᑦ ᑐᓂᔭᐅᔪᓂᑦ ᐱᔪᓐᓇᕐᓂᖃᖅᑐᓂᑦ ᑐᑦᑕᕐᕕᖕᓂᑦ ᐊᑐᓕᖅᑎᑦᑎᒐᔭᖅᑐᑦ ᖃᓄᐃᑦᑐᑐᐃᓐᓇᕐᓂᑦ ᐊᑐᕆᐊᓕᖕᓂᑦ ᓇᓗᓇᐃᖅᑕᐅᔪᓂᑦ ᒪᓕᒋᐊᓕᖕᓂᑦ.
- ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᓇᒃᓯᐅᔾᔨᒐᔭᖅᑐᖅ ᓇᓗᓇᐃᖅᓯᒪᔭᖓᓂ ᐊᒻᒪ ᐊᑐᓕᖁᔭᖏᓐᓂᒃ ᐱᔪᓐᓇᕐᓂᖃᖅᑐᓄᑦ ᑐᑦᑕᕐᕕᖕᓄᑦ ᓇᓗᓇᐃᖅᑕᐅᔪᓂᑦ ᐱᓕᕆᒍᒪᔪᒧᑦ.
- ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᓇᒃᓯᐅᔾᔨᒐᔭᕐᒥᔪᑦ ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᒥᑦ, ᓇᓗᓇᐃᖅᓯᒪᔭᖓᓂ ᐊᒻᒪ ᐊᑐᓕᖁᔭᖏᓐᓂᒃ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᖃᐅᔨᓴᖅᑕᐅᓂᕐᒧᑦ, ᑭᓯᐊᓂ ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᖅ ᑭᑭᑕᐅᓯᒪᒃᐸᑦ ᖃᐅᔨᓴᖅᑕᐅᓂᕐᒥᑦ ᒪᓕᒡᓗᒍ ᐃᓚᓕᐅᔾᔭᐅᓯᒪᔪᖅ 12-1 ᓄᓇᕗᒻᒥ ᐊᖏᕈᑎᖕᒥᑦ.
- ᐱᓕᕆᒍᒪᔪᖅ ᐱᔭᒃᓴᖃᖅᐳᖅ ᖃᐅᔨᒋᐊᕐᓂᕐᒥᑦ ᐊᒻᒪ ᑐᓂᓯᓂᕐᒥᑦ ᓚᐃᓴᓐᓯᒧᑦ/ᐱᔪᓐᓇᐅᑎᒧᑦ ᑐᒃᓯᕋᐅᑎᓂᑦ ᑐᓂᔭᐅᒋᐊᓕᖕᓄᑦ ᐱᔪᓐᓇᕐᓂᖃᖅᑎᑦᑎᔨᓄᑦ, ᐊᒻᒪ, ᑕᐃᒪᐃᒋᐊᖃᖅᑎᓪᓗᒍ, ᖃᐅᔨᒋᐊᕐᓗᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᒃ ᑐᓂᓯᓂᕐᒥᑦ ᑐᒃᓯᕋᐅᑎᒥᑦ ᖃᐅᔨᓴᖅᑕᐅᓂᕐᒧᑦ.
- ᓇᓗᓇᐃᖅᑕᐅᒃᐸᑦ ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᖅ ᒪᓕᑦᑎᐊᙱᑦᑐᖅ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒥᑦ, ᐱᓇᓱᐊᖅᑐᑦ ᑐᒃᓯᕋᕈᓐᓇᖅᑐᑦ ᐊᓯᔾᔩᕌᕐᔪᖕᓂᕐᒧᑦ ᑐᕌᖓᑎᓪᓗᒍ, ᐸᕐᓇᐅᑎᒥᑦ ᐊᓯᔾᔩᓂᕐᒥᑦ, ᐅᕝᕙᓘᓐᓃᑦ ᒥᓂᔅᑕᐅᑎᒥᑦ ᑭᑭᑕᐅᓯᒪᓂᕐᒧᑦ.
ᖃᐅᔨᒋᐊᕐᕕᒋᔪᓐᓇᖅᑕᑎᑦ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᑐᑭᓯᒋᐊᕈᑎᒃᓴᓄᑦ ᑐᓂᓯᓂᕐᒧᑦ ᐊᒻᒪ ᕿᒥᕐᕈᐊᕐᓂᕐᒧᑦ ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᓂᑦ ᐅᕝᕙᓘᓐᓃᑦ ᐊᓯᖏᓐᓄᑦ ᐊᐱᖅᑯᑎᓄᑦ ᐱᔭᒃᓴᕆᔭᖏᓐᓄᑦ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ.
- ᔮᓇᑕᓐ ᓴᕗᐃ, ᑐᑭᒧᐊᒃᑎᑦᑎᔨ ᐊᑐᐊᒐᕐᓄᑦ ᐊᒻᒪ ᐸᕐᓇᐃᓂᕐᒧᑦ, ᖃᐅᔨᒋᐊᕐᕕᐅᔪᓐᓇᖅᑐᖅ ᐅᕙᓂ jsavoy@nunavut.ca ᐅᕝᕙᓘᓐᓃᑦ 867 983 4632, ᐊᒻᒪ
- ᒐᐅᒻᑉ ᑕᔭᐅᓗᒍ, ᐊᐅᓚᑦᑎᔨ ᐊᑐᓕᖅᑎᑦᑎᓂᕐᒧᑦ, ᖃᐅᔨᒋᐊᕐᕕᐅᔪᓐᓇᖅᑐᖅ ᐅᕙᓂ gdjalogue@nunavut.ca ᐅᕝᕙᓘᓐᓃᑦ 867 979 3444.
ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕗᒻᒥ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ
- ᓄᓇᒥ ᐊᑐᕐᓂᕐᒧᑦ ᐸᕐᓇᐅᓂᖅ ᐱᕚᓪᓕᕈᑕᐅᕗᖅ ᐃᓄᖕᓄᑦ ᐊᒻᒪ ᐊᑐᖅᑕᐅᔭᕆᐊᓕᒃ ᓄᓇᕗᒻᒥ ᐊᖏᕈᑎ ᐊᑖᒍᑦ ᐊᒻᒪ ᓄᓇᕗᒻᒥ ᐸᕐᓇᐃᓂᕐᒧᑦ ᐊᒻᒪ ᐱᓕᕆᐊᒃᓴᓂᑦ ᖃᐅᔨᓴᕐᓂᕐᒧᑦ ᐱᖁᔭᖅ (NuPPAA).
- ᐊᑕᐅᓯᕐᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒥᑦ ᓄᓇᕗᒻᒥ ᓄᓇᑖᕆᔭᐅᓯᒪᔪᒧᑦ ᐱᐅᓂᐊᖅᑐᖅ ᐃᓄᖕᓄᑦ ᐊᒻᒪ ᑮᓇᐅᔭᖃᖅᑎᑦᑎᔨᓄᑦ ᓇᓗᓇᐃᖅᓯᓂᕐᒥᑦ ᓇᒥ ᐱᕙᓪᓕᐊᑎᑦᑎᒍᓐᓇᕐᒪᖔᑦ, ᓇᒥ ᐆᒪᔪᐃᑦ ᐊᒻᒪ ᐆᒪᔪᐃᑦ ᓇᔪᒐᖏᑦ ᓴᐳᔾᔭᐅᖕᒪᖔᑦ, ᐊᓯᖏᓪᓗ.
ᐄ, ᓄᓇᒥ ᐊᑐᕐᓂᕐᒧᑦ ᐸᕐᓇᐅᑏᑦ ᐱᕙᓪᓕᐊᑎᑕᐅᔪᑦ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᓐᓄᑦ ᒪᑯᓄᖓ ᑐᕌᖓᖏᑦᑐᑦ:
- ᐱᖅᑯᓯᒃᑯᑦ ᓄᓇᐅᑉ ᐊᑐᖅᑕᐅᓂᖓ ᐃᓄᖕᓄᑦ ᐃᓚᒋᓗᓂᐅᒃ ᓂᐅᕕᐊᒃᓴᖃᙱᓐᓂᐅᔪᒥᑦ ᐃᖃᓪᓕᐊᕐᓂᕐᒥᑦ, ᐊᖑᓇᓱᓐᓂᕐᒥᑦ, ᐊᒻᒪ ᐊᐅᓪᓛᕐᓂᕐᒥᑦ.
- ᓇᑉᐸᖅᑎᑕᐅᓂᖓ, ᐊᐅᓚᑕᐅᓂᖓ ᐊᒻᒪ ᐋᖅᑭᐅᒪᑎᑕᐅᓂᖏᑦ ᐃᒡᓗᐊᓗᐃᑦ ᐊᒻᒪ ᐱᔨᑦᑎᕈᑏᑦ ᓄᓇᓕᖕᒥᑦ, ᑭᑭᑕᐅᓗᑎᒃ ᐊᖏᔫᑏᑦ ᐅᖅᓱᐊᓗᖕᓄᑦ ᑐᖅᑯᐃᕖᑦ, ᐆᒻᒪᖅᑯᑎᓕᐅᕈᑏᑦ ᖄᕈᓐᓇᖅᑐᓄᑦ ᐅᖅᓱᐊᓗᖕᓄᑦ, ᐃᒪᖕᒧᑦ ᐆᒻᒪᖅᑯᑏᑦ, ᐊᒻᒪ ᓴᓇᔪᓕᕆᓂᕐᒧᑦ ᖃᓄᐃᓕᐅᕈᑕᐅᔪᓂᑦ. ᑕᑯᓗᒋᑦ ᐃᓗᐊᒍᑦ ᐱᓕᕆᔾᔪᓰᑦ: ᒪᓕᑦᑎᐊᕆᐊᖃᕐᓂᕐᒥᑦ ᓇᓗᓇᐃᖅᓯᓂᕐᒥᑦ ᑐᑭᓯᒋᐊᕈᑎᒃᓴᒃᑲᓐᓂᕐᓄᑦ.
- ᐊᑐᖅᑕᐅᓂᖏᑦ ᑭᒡᓕᓕᐊᖑᓯᒪᔪᓂᑦ ᑲᓇᑕᒥ ᐊᒻᒪ ᐅᑭᐅᖅᑕᖅᑐᒥᑦ ᒥᕐᖑᐃᖅᓯᕐᕕᖕᓂᑦ.
- ᑐᑭᓯᐊᕈᑎᒃᓴᓂᑦ ᐃᓄᒋᐊᕐᓂᐅᔪᑦ ᐱᕈᖅᐸᓪᓕᐊᓂᖏᓐᓂᒃ, ᐃᓅᕙᓪᓕᐊᔪᓂᑦ, ᐃᓕᓐᓂᐊᕐᓂᕐᒧᑦ ᐊᒻᒪ ᐃᖅᑲᓇᐃᔭᕐᓂᕐᒧᑦ ᓈᓴᐅᑎᓂᑦ.
- ᓄᓇᒥᙶᖅᑐᑦ ᐊᒻᒪ ᖃᓄᐃᓕᖓᓃᑦ ᓄᓇᒥᙶᖅᑐᓂᑦ ᐊᑐᕐᓂᕐᒥᑦ. (ᓲᕐᓗ ᐅᔭᕋᖕᓂᐊᕐᕖᑦ, ᑐᔪᕐᒥᕖᑦ, ᓂᐅᕐᕈᑎᖃᕐᓂᕐᒧᑦ ᐆᒪᔪᕋᓱᐊᕐᓂᖅ ᐊᒻᒪ ᐃᖃᓪᓕᐊᕐᓂᖅ)
- ᑮᓇᐅᔾᔭᒃᓴᒃᓂᒃᒧᑦ ᐱᕕᒃᓴᖃᕐᓂᐅᔪᑦ ᐊᒻᒪ ᐱᔭᐅᔭᕆᐊᓖᑦ.
- ᐆᒻᒪᖅᑯᑎᓄᑦ ᐱᔭᐅᔭᕆᐊᓖᑦ, ᓇᑭᙶᕐᓂᖏᑦ ᐊᒻᒪ ᐊᑐᐃᓐᓇᐅᓂᖏᑦ.
- ᓄᓇᓕᖕᓂᑦ ᒪᑭᒪᔾᔪᑏᑦ ᐱᓯᒪᔭᐅᔭᕆᐊᓖᑦ, ᐃᓚᒋᓗᓂᒋᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᐃᒡᓗᓕᕆᓂᕐᒧᑦ, ᐃᓕᓐᓂᐊᕐᓂᓕᕆᓂᕐᒧᑦ, ᐊᒻᒪ ᐊᓯᖏᑦ ᐃᓄᓕᕆᓂᕐᒧᑦ
- ᐊᕙᑎᒧᑦ ᐃᓱᒪᒋᔭᐅᔭᕆᐊᓖᑦ, ᐃᓚᒋᓗᓂᒋᑦ ᒥᕐᖑᐃᖅᓯᕐᕖᑦ ᐊᒻᒪ ᐸᐸᑦᑎᑦᑎᐊᕐᓂᕐᒧᑦ ᐃᓂᐅᔪᑦ, ᐊᒻᒪ ᐆᒪᔪᐃᑦ ᓇᔪᒐᖏᑦ.
- ᐃᓕᖅᑯᓯᕐᒧᑦ ᐃᓚᓕᐅᑎᔪᑦ ᐊᒻᒪ ᓯᕗᓪᓕᐅᔾᔭᐅᔭᕆᐊᓖᑦ, ᐃᓚᖃᖅᖢᓂ ᓴᐳᔾᔨᓂᕐᒥᑦ ᐊᒻᒪ ᐊᓯᐅᔨᑦᑕᐃᓕᕐᓂᕐᒥᑦ ᐃᑦᑕᕐᓂᓴᕐᓂᒃ ᐃᓂᓂᑦ ᐊᒻᒪ ᓄᓇᓕᕋᓛᖑᔪᑦ, ᐊᒻᒪ
- ᐊᔾᔨᐅᑎᑦᑐᑦ ᓄᓇᓕᖕᒥ ᐊᒻᒪ ᐊᕕᒃᑐᖅᓯᒪᔪᒥᑦ ᐃᓱᒪᒋᔭᐅᔭᕆᐊᓖᑦ.
ᐃᓗᐊᓃᓪᓗᑎᒃ ᑮᓇᐅᔭᕐᓂᒃ ᐊᑐᖅᑐᒃᓴᓂᑦ, ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᐊᑐᐃᓐᓇᐅᑎᑦᑎᓲᑦ ᐊᒥᓱᓂᑦ ᐱᕕᒃᓴᐅᔪᓂᑦ ᒐᕙᒪᓄᑦ, ᐃᓄᓕᒫᓄᑦ, ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᐊᒻᒪ ᐊᓯᖏᓐᓄᑦ ᑐᑭᓯᒋᐊᕈᑎᒃᓴᓄᑦ ᐃᓱᒪᓕᐅᕆᓂᕐᒧᑦ 2016 ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕗᒻᒥ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒧᑦ.
- ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᓇᓕᒧᒌᓕᖅᑎᑦᑎᒋᐊᓖᑦ ᑐᑭᓯᒋᐊᕈᑎᒃᓴᓂᑦ ᑐᓂᔭᐅᔪᓂᑦ ᖁᕝᕙᒃᓴᐃᓂᕐᒥᑦ ᐊᒻᒪ ᓴᐳᔾᔨᕐᓂᕐᒥᑦ ᐱᑕᖃᖅᐸᒌᖅᑐᓂᑦ ᐊᒻᒪ ᓯᕗᓂᒃᓴᒥᑦ ᖃᓄᐃᙱᑦᑎᐊᕐᓂᕆᔭᖏᓐᓂᒃ ᐃᓄᖁᑎᒋᔭᐅᔪᑦ ᐊᒻᒪ ᓄᓇᓖᑦ. ᐊᑐᐊᒐᖏᑦ, ᐊᑐᖅᑕᐅᓂᐊᖅᑐᑦ, ᐊᒻᒪᓗ ᒪᓕᒋᑦᑎᒍᑦ ᐱᔭᒃᓴᕆᔭᐅᔪᑦ ᒐᕙᒪᒃᑯᓐᓂ, ᓄᓇᕗᑦ ᑐᙵᕕᒃᑯᓐᓂ, ᕿᑎᕐᒥᐅᑦ, ᑭᕙᓪᓕᖅ, ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓂ ᐃᓱᒪᒋᔭᐅᖃᓯᐅᑎᖕᒥᔪᑦ.
- ᐃᓱᒪᑦᑎᐊᕆᐊᕐᓂᕐᒥᑦ ᐊᔾᔨᒌᓕᖅᑎᑦᑎᖏᓪᓗᑎᒃ ᒪᓕᒐᑦᑎᒍᑦ ᐱᔭᒃᓴᕆᔭᐅᔪᓂᑦ ᒐᕙᒪᓄᑦ (ᒐᕙᒪᑐᖃᒃᑯᑦ ᐊᒻᒪ ᐅᑭᐅᖅᑕᖅᑐᒥ), ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᓇᓗᓇᐃᖅᓯᓲᑦ ᐃᓗᓕᖏᓐᓂᒃ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒥᑦ ᐃᓱᒪᖃᓯᐅᑎᓂᕐᒥᑦ ᐊᑕᖏᕐᓗᒋᑦ ᑐᑭᓯᒋᐊᕈᑎᒃᓴᓂᑦ ᑐᓂᔭᐅᔪᓂᑦ ᑕᒪᒃᑯᐊᓗ ᐊᔾᔨᒌᙱᑦᑐᑦ ᐃᓄᓕᒫᓄᑦ ᐊᑐᐊᒐᐅᔪᑦ ᐊᒻᒪ ᐊᑐᖅᑕᐅᒍᒪᔪᑦ.
ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ ᐃᑲᔪᖅᑐᖅ ᐊᒻᒪ ᑐᑭᒧᐊᕈᑕᐅᔪᖅ ᓄᓇᒥᙶᖅᑐᓂᑦ ᐊᑐᕐᓂᕐᒥᑦ ᐊᒻᒪ ᐱᕙᓪᓕᐊᑎᑦᑎᓂᕐᒥᑦ ᓄᓇᕗᒻᒥ ᓄᓇᑖᕆᔭᐅᓯᒪᔪᒥᑦ ᐊᒻᒪ ᒪᓕᒐᑦᑎᒎᖓᓪᓗᓂ.
- ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ ᑐᓴᖅᑎᑦᑎᕗᖅ ᓄᓇᒥ ᐊᑐᖅᑎᓂᑦ ᖃᓄᐃᓕᐅᕈᑎᒃᓴᓂᑦ ᑕᐃᒪᐃᑐᐃᓐᓇᕆᐊᓕᖕᓂᑦ/ᑕᐃᒪᐃᙱᑐᐃᓐᓇᕆᐊᓕᖕᓂᑦ, ᖃᖓᒃᑯᓪᓗ ᐊᕐᕌᒍ ᐃᓗᐊᓂ.
- ‘“ᐱᒻᒪᕆᐅᔪᑦ ᐃᓗᓕᖏᑦ” ᓇᓗᓇᐃᕐᓗᒋᑦ ᓇᐅᒃᑯᑦ ᐱᒻᒪᕆᐅᒋᔭᐅᖕᒪᖔᑦ ᐃᓄᖁᑎᓄᑦ ᐊᒻᒪ ᐆᒪᔪᓄᑦ.
- ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ ᐃᓇᖏᖅᓯᖏᑦᑐᖅ ᐅᕝᕙᓘᓐᓃᑦ ᐊᔾᔨᒌᓕᖅᑎᑦᑎᖏᑦᑐᖅ ᐱᔭᒃᓴᕆᔭᐅᔪᓂᑦ ᒐᕙᒪᓄᑦ (ᒐᕙᒪᑐᖃᒃᑯᑦ ᐊᒻᒪ ᐅᑭᐅᖅᑕᖅᑐᒥ) ᐊᒻᒪ ᐊᓯᖏᑦ ᐱᓕᕆᕝᕕᒃ ᑭᒃᑯᑐᐃᓐᓇᕐᓄᑦ ᒐᕙᒪᓄᑦ.
- ᓄᓇᒥ ᐊᑐᕐᓂᕐᒧᑦ ᐊᔪᙱᑎᑕᐅᔪᖅ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒃᑯᑦ ᐊᖏᖅᑕᐅᖅᑳᕆᐊᓕᒃ ᐊᖏᖅᑎᑦᑎᔨᐅᔪᓄᑦ ᑐᑦᑕᕐᕕᖕᒧᑦ ᐱᒋᐊᓚᐅᙱᓐᓂᖓᓂ.
- ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ ᐃᑲᔪᙱᑦᑐᖅ ᐊᒻᒪ ᑐᑭᒧᐊᒃᑎᑦᑎᖏᑦᑐᖅ ᐱᕙᓪᓕᐊᑎᑦᑎᓂᕐᒥᑦ ᓄᓇᓕᖕᓂᑦ ᐸᕐᓇᐅᑎᓂᑦ (ᑕᒪᒃᑯᐊᓕ ᑲᒪᒋᔭᐅᔪᑦ ᓄᓇᓕᖕᓄᑦ).
- ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ ᑲᒪᒋᔭᖃᖅᐳᖅ ᐱᒻᒪᕆᐅᔪᓂᑦ ᐊᑲᐅᙱᓕᐅᕈᑕᐅᔪᓂᒃ ᓲᕐᓗ ᓴᐳᔾᔨᓂᕐᒥᑦ ᓄᓇᓕᖕᒥᑦ ᐃᒥᑦᑎᐊᕙᖕᒥᑦ ᐃᒥᖅᑕᐅᓲᒥᑦ, ᐃᖅᑲᓇᐃᔮᒥᑦ ᓴᖅᑮᓂᕐᒥᑦ, ᐊᒻᒪᓗ ᑲᒪᑦᑎᐊᕐᕐᓂᒥᑦ ᐆᒪᔪᐃᑦ ᐊᒥᓲᔾᔫᒥᔭᕆᐊᖃᕐᓂᖏᓐᓂᒃ.
- ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᑎᓕᐅᕆᔪᑦ ᑭᒃᑯᑐᐃᓐᓇᕐᓂᑦ ᐱᕙᓪᓕᐊᕈᑕᐅᓂᖓᓂ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒥᑦ ᐅᖃᐅᓯᒃᓴᖃᕐᓂᒃᑯᑦ ᑎᑎᕋᖅᑕᐅᕐᖓᖅᓯᒪᔪᒥᑦ.
- ᐅᖃᐅᓯᒃᓴᑎᑦ ᕿᒥᕐᕈᔭᐅᒐᔭᖅᑐᑦ ᐃᓄᓕᒫᓄᑦ ᓈᓚᖕᓂᖃᓕᖅᐸᑕ ᓯᕗᓂᐊᒍᑦ ᐊᓯᔾᔩᓚᐅᙱᑎᓪᓗᒋᑦ ᐸᕐᓇᐅᑎᒥᑦ ᐊᒻᒪ ᑐᓂᔭᐅᓚᐅᙱᓐᓂᖓᓂ ᐊᖏᖅᑕᐅᓂᕐᒧᑦ.
- ᓄᓇᕗᒻᒥ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ ᑕᐃᒪᐃᑦᑑᕗᖅ “ᐊᓯᔾᔨᕈᓐᓇᖅᑐᖅ ᑎᑎᖅᑲᖅ” ᐊᒻᒪ ᐊᓯᔾᔨᖅᑕᐅᒍᓐᓇᖅᑐᖅ ᓄᑖᖑᔪᖅ ᖃᐅᔨᓴᖅᑕᐅᔾᔪᑎᓂᑦ ᓄᐊᑕᐅᓯᒪᔪᑦ ᐊᑐᐃᓐᓇᐅᓕᖅᐸᑕ.
- ᓄᓇᓖᑦ, ᐃᓄᐃᑦ, ᐊᒻᒪ ᐊᓯᖏᑦ ᑎᓕᐅᕆᔪᑦ ᓇᓗᓇᐃᖅᓯᓂᕐᒥᑦ ᐱᒻᒪᕆᐅᒋᔭᐅᔪᓂᑦ ᐃᓂᓂᑦ ᐅᕝᕙᓘᓐᓃᑦ ᓄᓇᒥ ᐊᑐᕐᓂᕐᒧᑦ ᐊᑲᐅᙱᓕᐅᕈᑎᓂᑦ ᐱᕚᓪᓕᕈᑕᐅᑐᐃᓐᓇᕆᐊᓕᖕᓂᑦ ᐊᐅᓚᑦᑎᓂᒃᑯᑦ ᐊᑖᒍᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒃᑯᑦ.
- ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᑐᙵᓴᐃᔪᑦ ᑭᑯᓕᒫᑦ ᐃᓱᒪᒋᔭᖏᓐᓂᒃ, ᐊᒻᒪᓗ ᑎᓕᐅᕆᔪᑦ ᐃᓕᖕᓂᑦ ᖃᐅᔨᒋᐊᕐᕕᒋᖃᑦᑕᕐᓗᒋᑦ ᑲᒥᓴᒃᑯᑦ ᖃᖓᑐᐃᓐᓇᒃᑯᑦ.
ᖃᐅᔨᓴᖅᑕᐅᔾᔪᑎᓂᑦ ᓄᐊᑕᐅᓯᒪᔪᓂᑦ ᑐᓐᓂᖅᓴᐃᓂᕐᒥᑦ
- ᑲᒥᓴᒃᑯᑦ ᑐᓂᓯᔪᓐᓇᙱᑦᑐᑦ ᐱᖓᔪᖓᓂᙶᖅᑐᓂᑦ ᑐᑭᓯᒋᐊᕈᑎᒃᓴᓂᑦ. ᑐᒃᓯᕋᕐᓃᑦ ᖃᐅᔨᓴᖅᑕᐅᔾᔪᑎᓂᑦ ᓄᐊᑕᐅᓯᒪᔪᓄᑦ ᑐᓂᔭᐅᓪᓗᐊᖅᑐᑦ ᖃᐅᔨᓴᖅᑕᐅᔾᔪᑎᓂᑦ ᓄᐊᑕᐅᓯᒪᔪᑦ ᓇᑭᙶᕐᓂᖏᓐᓂᒃ.
- ᓄᓇᙳᐊᓕᕆᓂᕐᒧᑦ ᑎᑎᖅᑲᓄᑦ ᓄᓇᒥ ᐊᑐᕐᓂᕐᒧᑦ ᑎᒃᑯᐊᖅᑕᐅᓯᒪᔪᑦ ᐊᒻᒪ ᐊᑐᓕᖁᔭᐅᔪᑦ ᑕᐃᑲᓃᑦᑐᑦ ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕗᒻᒥ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ ᐅᕙᓂ ᐊᑐᐃᓐᓇᐅᔪᑦ.