ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᑎᑎᕋᖅᓯᒪᔪᖅ ᖄᖓ ᐊᒻᒪ ᐃᖅᑲᓇᐃᔭᕐᓂᑯᑎᑦ ᐊᒻᒪ ᐃᓕᖅᑯᓯᕆᔭᕐᓄᑦ ᐊᐱᖅᓱᖅᑕᐅᓂᕐᒧᑦ ᐃᑲᔫᑎᒃᓴᑦ ᐃᓕᖕᓄᑦ ᐊᑐᐃᓐᓇᐅᔪᑦ ᐃᑲᔫᑎᒃᓴᑦᑎᐊᕙᐅᔪᑦ ᐱᕙᒌᔭᖅᓯᒪᓂᐊᕋᕕᑦ ᓯᕗᓂᒃᓴᒥᑦ ᐃᖅᑲᓇᐃᔮᒃᓴᒧᑦ ᐊᐱᖅᓱᖅᑕᐅᓕᕈᕕᑦ ᐅᕙᑦᑎᓐᓄᑦ. ᐆᑦᑐᖃᑕᐅᓚᐅᙱᓐᓂᕐᓂᑦ ᐃᖅᑲᓇᐃᔮᒃᓴᒧᑦ ᐅᕙᑦᑎᓐᓂ ᐃᓕᖕᓂᑦ ᑎᓕᐅᕆᔪᑦ ᐅᖃᓕᒫᕐᓗᒋᑦ ᑎᑎᖅᑲᓂᑦ ᓂᕈᐊᕈᒥᓇᕐᓂᖅᓴᐅᓂᐊᕋᕕᑦ ᐊᐱᖅᓱᖅᑕᐅᓂᕐᒧᑦ ᐃᖅᑲᓇᐃᔮᒃᓴᒧᑦ.
ᐃᖅᑲᓇᐃᔭᕐᓂᖅ ᑲᒥᓴᒃᑯᓐᓂᑦ
ᐊᒡᓚᒡᕕᖃᖅᖢᑕ ᐱᖓᓱᓂᑦ ᓄᓇᓕᐅᔪᓂᑦ ᓄᓇᕗᒻᒥ, ᐃᖅᑲᓇᐃᔭᖅᑎᐅᔪᑦ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᓐᓂ (NPC) ᐱᕕᖃᖅᑎᑕᐅᓲᑦ ᐱᓕᕆᑦᑎᐊᕐᓂᕐᒥᑦ ᐊᒻᒪ ᐃᓕᖅᑯᓯᕐᒥᑦ ᑲᒪᑦᑎᐊᖅᑐᒥᑦ ᐊᒡᓚᒡᕕᖕᒥᑦ. ᐊᑐᐊᒐᕆᔭᐅᔪᖅ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᓐᓄᑦ ᐱᓇᓱᓐᓂᕐᒥᑦ ᐊᒥᓱᓛᓂᑦ ᐊᔪᙱᓐᓂᖃᑦᑎᐊᖅᑐᓂᑦ ᐱᓇᓱᐊᖅᑐᓂᑦ ᐊᔪᙱᓐᓂᓕᒫᖏᓐᓂᒃ ᐊᑭᓗᐊᖅᑕᐃᓕᒪᑎᑦᑎᓂᕐᒥᑦ ᐃᓐᓄᒃᓯᒪᙱᑦᑐᓂᑦ ᐱᑕᖃᖅᐸᒌᖅᑐᓂᑦ ᐃᖅᑲᓇᐃᔮᒃᓴᓂᑦ ᐅᕝᕙᓘᓐᓃᑦ ᖄᒃᑲᓐᓂᐊᒍᑦ ᐃᖅᑲᓇᐃᔮᒃᓴᓂᑦ ᑕᐃᒪᐃᒋᐊᖃᖅᑎᓪᓗᒋᑦ ᐊᐅᓚᓂᖃᑦᑎᐊᖁᓪᓗᒋᑦ. ᐃᖅᑲᓇᐃᔮᒃᓴᒥᑦ ᑖᒃᑯᓇᓂ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᓐᓂ ᐱᓇᓱᒍᒪᓐᓂᕈᕕᑦ, ᖃᐅᔨᒋᐊᔾᔫᒥᖃᑦᑕᕆᑦ ᐃᖅᑲᓇᐃᔮᒃᓴᑦ ᒪᒃᐱᖓᔪᓂᑦ.
ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᑐᕌᒐᓪᓗᐊᑕᖏᑦ ᐃᖅᑲᓇᐃᔭᖅᑎᑖᕐᓂᕐᒧᑦ ᐊᑐᐃᓐᓇᐅᑎᑦᑎᒍᒪᒧᑦ ᐃᖅᑲᓇᐃᔮᒃᓴᓂᑦ ᓄᓇᕗᒻᒥᐅᑕᕐᓄᑦ ᐊᒻᒪ ᐊᑐᐃᓐᓇᐅᑎᑦᑎᓂᕐᒥᑦ ᐱᕚᓪᓕᕈᑎᓂᑦ ᓄᓇᓕᖕᒥᐅᑕᕐᓄᑦ ᐊᒻᒪ ᐊᑐᐃᓐᓇᖃᕐᕕᐅᓂᕐᒧᑦ ᐃᓄᖕᓄᑦ ᐊᑎᖃᖅᑐᓂᑦ ᓄᓇᕗᒻᒥ ᐊᖏᕈᑎᒃᑯᑦ. ᑕᐃᒪᐃᒐᓗᐊᖅᑎᓪᓗᒍ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᑎᓕᐅᕆᔪᑦ ᐱᓇᓱᐊᖁᔨᓪᓗᑎᒃ ᐊᔪᙱᓐᓂᖃᖅᑎᓕᒫᓂᑦ ᐃᓄᖕᓂᑦ ᒪᓕᒡᓗᒍ ᓄᓇᕗᒻᒥ ᐊᖏᕈᑎ, ᓯᕗᓪᓕᐅᔾᔨᓂᐊᖅᑐᑦ ᓄᓇᕗᑦ ᐃᓄᖁᑎᖏᓐᓂᒃ ᑎᑭᐅᒪᔪᓂᑦ ᐊᔪᙱᔾᔪᑕᐅᔭᕆᐊᓕᖕᓂᑦ. ᐆᑦᑐᖃᑕᐅᔪᑦ ᐃᓱᒪᒋᔭᐅᓂᐊᖅᑐᑦ ᐃᓅᓂᕐᒧᑦ ᐅᕝᕙᓘᓐᓃᑦ ᓄᓇᕗᒻᒥᐅᑕᐅᓂᕐᒧᑦ ᓇᓗᓇᐃᑦᑎᐊᕆᐊᓖᑦ ᖃᓄᐃᑦᑑᓂᖏᓐᓂᒃ ᑎᑎᖅᑲᖓᓂ ᖄᖓᓂ.
ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᐃᓱᒪᖃᓯᐅᑎᓲᑦ ᐃᖅᑲᓇᐃᔭᖅᑎᖏᑦ ᐱᓕᕆᖃᑕᐅᑦᑎᐊᕐᓗᑎᒃ ᑎᑭᐅᒪᑦᑎᑦᑎᓂᕐᒥᑦ ᐱᓇᓱᐊᒐᕆᔭᐅᔪᒥᑦ. ᐃᖅᑲᓇᐃᔮᓕᒫᑦ ᐊᑭᑐᔪᒥᑦ ᑮᓇᐅᔾᔭᒃᓴᖅᑐᑦ ᐊᒻᒪ ᐱᕚᓪᓕᕈᑎᒃᓴᓖᑦ, ᐃᓚᖃᖅᖢᓂ ᕿᑲᕐᓂᕐᒧᑦ ᖃᖓᑦᑕᐅᑎᒃᓴᓄᑦ ᐃᑲᔫᑎᓂᑦ, ᐅᑭᐅᖅᑕᖅᑐᕐᒥᐅᑕᐅᓂᕐᒧᑦ ᐃᑲᔫᑎᓂᑦ, ᐊᒻᒪ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᐃᓱᓕᑦᑎᓂᕐᒧᑦ ᐱᕚᓪᓕᕈᑎᒃᓴᓂᑦ.
ᐊᑏᖓᐃ ᑐᓂᓯᓗᑎᑦ ᑎᑎᕋᖅᓯᒪᔪᖅ ᖄᖓ ᐊᒻᒪ ᐃᖅᑲᓇᐃᔭᕐᓂᑯᑎᑦ ᐅᕗᖓ HR@nunavut.ca ᐅᕝᕙᓘᓐᓃᑦ ᓱᒃᑲᔪᒃᑯᑦ ᐅᕗᖓ (867) 979-3443.
ᐊᐱᖅᑯᑎᒋᔭᐅᔪᑦ ᑐᕌᖅᑎᑕᐅᔪᓐᓇᖅᑐᑦ ᐃᕐᖐᓐᓈᖅᑕᐅᑎᒃᑯᑦ, ᖁᓛᓃᑦᑑᑉ ᐊᔾᔨᖓ, ᐅᕝᕙᓘᓐᓃᑦ ᐅᖄᓚᐅᑎᒃᑯᑦ ᐅᕗᖓ (867) 979-8254.
ᐊᑖᓃᑦᑐᑦ ᑎᑎᕋᖅᓯᒪᔪᑦ ᐃᖅᑲᓇᐃᔮᕆᔭᐅᔪᓕᒫᓄᑦ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᓐᓂ.
ᑐᑭᒧᐊᒃᑎᑦᑎᔨᒻᒪᕆᒃ
ᑐᑭᒧᐊᒃᑎᑦᑎᔨᒻᒪᕆᒃ ᐅᖃᐅᔾᔪᐃᓲᖅ ᑲᒥᓴᓂᑦ ᑭᓱᓕᒫᓄᑦ ᑲᒥᓴᒃᑯᑦ ᐱᔭᒃᓴᕆᔭᖏᓐᓂᒃ. ᐊᖑᑦ/ᐊᕐᓇᖅ ᐱᔪᓐᓇᕐᓂᖃᖅᑐᖅ ᑕᒪᐃᓐᓂᒃ ᐃᓱᒪᓕᐅᕆᓂᕐᒥᑦ, ᖃᓄᐃᓕᐅᕐᓂᕐᒥᑦ, ᐊᒻᒪ ᐱᕙᓪᓕᐊᑎᑦᑎᓂᕐᒥᑦ ᖃᓄᐃᓕᐅᕈᑎᒃᓴᓕᒫᓂᑦ ᓱᓕᔪᓂᑦ ᑲᒥᓴᒃᑯᑦ ᐊᐅᓚᑦᑎᓂᕐᒧᑦ ᐊᑐᐊᒐᖏᓐᓄᑦ. ᑐᑭᒧᐊᒃᑎᑦᑎᔨᒻᒪᕆᒃ ᑕᒪᐃᓐᓂᒃ ᐱᔭᒃᓴᖃᕐᓂᐊᖅᐳᖅ, ᒪᓕᒡᓗᓂ ᑕᒪᐃᓐᓂᒃ ᑲᒥᓴᐅᑉ ᐊᑐᐊᒐᖏᓐᓂᒃ, ᑕᒪᐃᓐᓄᑦ ᐃᖅᑲᓇᐃᔭᖅᑐᓕᕆᓂᕐᒨᖓᔪᓂᑦ, ᐋᖅᑭᒃᓱᐃᓂᕐᒥᑦ ᐊᐅᓚᑦᑎᓂᕐᒧᑦ ᐱᓕᕆᐊᒃᓴᓂᑦ ᐊᒻᒪ ᐱᓕᕆᔾᔪᓯᕐᓂᑦ, ᑐᑭᒧᐊᒃᑎᑦᑎᓗᓂ ᖃᐅᑕᒫᖅᓯᐅᑎᓂᑦ ᑲᒥᓴᒃᑯᓐᓂ, ᑮᓇᐅᔭᓕᕆᓂᕐᒥᑦ ᐊᐅᓚᑦᑎᓂᕐᒥᑦ, ᖃᐅᔨᓴᕐᓂᕐᒥᑦ ᐊᒻᒪ ᐅᓂᒃᑳᓕᐅᕐᓂᕐᒥᑦ ᑮᓇᐅᔭᕐᓂᒃ ᐊᒻᒪ ᐱᓕᕆᐊᒃᓴᒧᑦ ᐱᕙᓪᓕᐊᓂᖓᓄᑦ, ᐊᒻᒪ ᑭᒡᒐᖅᑐᐃᔨᐅᓗᓂ ᐸᕐᓇᐃᔨᐅᖃᑕᐅᔪᓂᑦ.
ᐃᑲᔪᖅᑎᒋᔭᐅᔪᖅ/ᐊᒡᓚᒡᕕᓕᕆᔨ
ᑐᑭᒧᐊᒃᑎᑦᑎᔨᖃᕐᓗᑎᒃ ᑐᑭᒧᐊᒃᑎᑦᑎᔨᒻᒪᕆᖕᒥᑦ, ᐊᒻᒪ ᖃᐅᑕᒫᑦ ᑐᑭᒧᐊᒃᑎᑦᑎᔨᖃᕐᓗᑎᒃ ᑐᑭᒧᐊᒃᑎᑦᑎᔨ ᑮᓇᐅᔭᓕᕆᓂᕐᒧᑦ, ᐊᐅᓚᑦᑎᔨ ᖃᕆᑕᐅᔭᓕᕆᔾᔪᑎᓄᑦ, ᑐᑭᒧᐊᒃᑎᑦᑎᔨ ᐊᑐᐊᒐᕐᓄᑦ ᐊᒻᒪ ᐸᕐᓇᐃᓂᕐᒧᑦ, ᐊᒻᒪ ᐊᐅᓚᑦᑎᔨ ᐊᑐᓕᖅᑎᑦᑎᓂᕐᒧᑦ, ᐃᑲᔪᖅᑎᒋᔭᐅᔪᖅ/ᐊᒡᓚᒡᕕᓕᕆᔨ ᐱᔭᒃᓴᖃᖅᐳᖅ ᑎᑎᕋᖅᑎᐅᓂᕐᒥᑦ, ᐊᐅᓚᑦᑎᓂᕐᒥᑦ ᐊᒻᒪ ᐱᓕᕆᔨᒻᒪᕆᐅᓂᕐᒧᑦ ᐃᑲᔪᕐᓂᕐᒥᑦ, ᐱᓕᕆᐊᒃᓴᓂᑦ ᑲᒪᓂᕐᒥᑦ, ᐋᖅᑭᒃᓱᖅᓯᒪᔪᒥᑦ ᖃᐅᔨᓴᖅᑕᐅᔾᔪᑎᓂᑦ ᓄᐊᑕᐅᓯᒪᔪᓂᑦ ᐊᐅᓚᑦᑎᓂᕐᒥᑦ ᐊᒻᒪ ᑐᖅᑯᖅᓯᒪᓂᕐᒥᑦ ᐱᖓᓱᓂᑦ ᑲᒥᓴᒃᑯᑦ ᐊᒡᓚᒡᕕᖏᓐᓄᑦ ᐊᒻᒪ ᐃᖃᓗᖕᓃᖦᖢᓂ.
ᒪᓕᒐᕐᓄᑦ ᐅᖃᐅᔾᔪᐃᔨ
ᒪᓕᒐᕐᓄᑦ ᐅᖃᐅᔾᔪᐃᔨ ᐱᔭᒃᓴᖃᖅᐳᖅ ᐊᑐᐃᓐᓇᐅᑎᑦᑎᓂᕐᒥᑦ ᒪᓕᒐᓕᕆᓂᕐᒧᑦ ᐱᔨᑦᑎᕋᕐᓂᕐᒥᑦ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᓐᓄᑦ. ᐃᓚᒋᔭᐅᓪᓗᓂ ᖁᑦᑎᖕᓂᖅᓴᒥᑦ ᐊᐅᓚᑦᑎᔨᐅᖃᑎᒌᓂᑦ, ᑖᓐᓇ ᐃᓂᒋᔭᖓ ᐱᖃᑕᐅᑦᑎᐊᓲᖅ ᖁᑦᑎᖕᓂᖅᓴᒥᑦ ᐊᐅᓚᑦᑎᔨᐅᖃᑎᒌᓂᑦ ᑲᑎᒪᔨᐅᔪᓂᑦ.
ᖃᖓᑦᑕᐅᑎᓕᕆᔨ/ᑮᓇᐅᔭᓕᕆᔨ/ᐊᒡᓚᒡᕕᓕᕆᔨ ᑎᑎᕋᖅᑎ
ᑐᑭᒧᐊᒃᑎᑦᑎᔨᖃᕐᓗᓂ ᑐᑭᒧᐊᒃᑎᑦᑎᔨᒻᒪᕆᖕᒥᑦ, ᖃᖓᑦᑕᐅᑎᓕᕆᔨ ᐊᒡᓚᒡᕕᓕᕆᔨ ᑮᓇᐅᔭᓕᕆᔨ ᑎᑎᕋᖅᑎ ᑲᒪᓲᖅ ᖃᖓᑦᑕᐅᑎᓕᒫᓂᑦ, ᐃᓂᒃᓴᕆᔭᐅᔪᓂᑦ ᐊᒻᒪ ᑲᑎᒪᓂᐅᔪᓂᑦ ᐊᒻᒪ ᐊᒡᓚᒡᕕᖕᒥᑦ ᐃᑲᔪᓲᖅ ᐊᒡᓚᒡᕕᒃ ᐊᐅᓚᓂᖃᑦᑎᐊᖁᓪᓗᒍ. ᑐᑭᒧᐊᒃᑎᑦᑎᔨᖃᕐᓗᓂ ᑐᑭᒧᐊᒃᑎᑦᑎᔨ ᑮᓇᐅᔭᓕᕆᓂᕐᒧᑦ, ᐊᖑᑦ/ᐊᕐᓇᖅ ᐱᔭᒃᓴᖃᖅᐳᖅ ᐊᑐᐃᓐᓇᐅᑎᑦᑎᓂᕐᒥᑦ ᑮᓇᐅᔭᓕᕆᓂᕐᒧᑦ ᐃᑲᔪᕐᓂᒥᑦ ᐊᐅᒃᑕᔫᓄᓪᓗ ᓇᓕᖅᑲᖏᓐᓂᒃ, ᐃᓕᐅᕋᐃᓂᕐᒥᑦ, ᓈᓴᐅᓯᕆᓂᕐᒥᑦ ᐊᒻᒪ ᐱᓕᕆᓂᕐᒥᑦ ᐊᑭᓕᕆᐊᓕᖕᓂᑦ ᐊᒻᒪ ᑐᓂᔭᐅᔭᕆᐊᓕᖕᓂᑦ. ᐱᔭᒃᓴᕆᔭᐅᔪᑦ ᐃᓚᖃᕐᒥᔪᑦ ᐃᖅᑲᓇᐃᔭᖅᑏᑦ ᐊᑭᓕᖅᑕᐅᔾᔪᑎᖏᓐᓂᒃ ᐊᒻᒪ ᑭᖑᕝᕕᐅᑎᐅᓗᓂ ᐊᒡᓚᒡᕕᒥᑦ ᐊᐅᓚᑦᑎᔨᒥᑦ.
ᖁᑦᑎᖕᓂᖅᓴᒥᑦ ᐊᑐᐊᒐᕐᓄᑦ ᐅᖃᐅᔾᔪᐃᔨ
ᐊᖏᔪᖅᑳᖃᖅᖢᓂ ᑐᑭᒧᐊᒃᑎᑦᑎᔨᒻᒪᕆᖕᒥᑦ, ᖁᑦᑎᖕᓂᖅᓴᒥᑦ ᐊᑐᐊᒐᕐᓄᑦ ᐅᖃᐅᔾᔪᐃᔨ ᐊᑐᐃᓐᓇᐅᑎᑦᑎᓲᖅ ᖃᐅᔨᓴᕐᓂᕐᒥᑦ ᐊᒻᒪ ᐅᖃᐅᔾᔪᐃᓲᖅ ᐊᑐᖅᑕᐅᓂᐊᖅᑐᓂᑦ, ᐊᑐᐊᒐᕐᓂᒃ, ᐊᒻᒪᓗ ᓴᖅᑭᐸᓪᓕᐊᔪᓂᑦ ᐊᑲᐅᙱᓕᐅᕈᑕᐅᔪᓂᑦ ᐊᒻᒪ ᐅᓗᕆᐊᓇᖅᑐᓂᑦ. ᐊᖑᑦ/ᐊᕐᓇᖅ ᐱᔭᒃᓴᖃᕐᒥᔪᖅ ᑎᑎᖃᓄᑦ/ᐅᓂᒃᑳᓂᑦ ᑎᑎᕋᕐᓂᕐᒥᑦ ᐊᒻᒪ ᐊᐅᓚᑦᑎᓂᕐᒥᑦ, ᓯᓚᑖᓂ ᑭᒡᒐᖅᑐᐃᔨᐅᓂᕐᒥᑦ ᐊᒻᒪ ᐃᓗᐊᓂ ᑲᒪᓂᕐᒥᑦ, ᐊᐅᓚᑦᑎᓂᕐᒧᑦ ᕿᒥᕐᕈᐊᕐᓂᕐᒥᑦ ᐊᒻᒪ ᖃᐅᔨᓴᕐᓂᕐᒥᑦ ᐊᒻᒪ ᖁᑦᑎᖕᓂᖅᓴᒥᑦ ᐊᐅᓚᑦᑎᓂᕐᒥᑦ. ᐃᓚᒋᔭᐅᓗᓂ ᖁᑦᑎᖕᓂᖅᓴᒥᑦ ᐊᐅᓚᑦᑎᔨᐅᖃᑎᒌᓂᑦ, ᐊᖑᑦ/ᐊᕐᓇᖅ ᐅᖃᐅᔾᔪᐃᖃᑦᑕᓛᖅᑐᖅ ᒫᓐᓇᐅᔪᖅ ᐱᓇᓱᐊᒐᕆᔭᐅᔪᒥᑦ ᐊᒻᒪ ᐊᑐᖅᑕᐅᓂᐊᖅᑐᓂᑦ, ᐃᑲᔪᖅᓱᕐᓗᓂ ᑐᓴᐅᒪᔪᓕᕆᓂᕐᒥᑦ ᑕᒪᐃᓐᓂᒃ ᐸᕐᓇᐃᓂᕐᒧᑦ ᑲᑐᔾᔨᖃᑎᒌᔭᐅᔪᓂᑦ ᐊᒻᒪ ᑕᑯᒃᓴᐅᑎᑦᑎᓗᓂ ᑕᒪᒃᑮᓐᓂᒃ ᐃᓄᓕᕆᓕᒪᓗᓂ ᐊᒻᒪ ᓯᕗᓕᖅᑎᑦᑎᐊᕙᐅᓗᓂ.
ᑐᓴᐅᒪᔪᓕᕆᓂᕐᒧᑦ ᐱᓕᕆᔨ/ᐊᑐᐊᒐᕐᓄᑦ ᐅᖃᐅᔾᔪᐃᔨ
ᐊᖏᔪᖅᑳᖃᖅᖢᓂ ᑐᑭᒧᐊᒃᑎᑦᑎᔨᒻᒪᕆᖕᒥᑦ ᑐᓴᐅᒪᔪᓕᕆᓂᕐᒧᑦ ᑲᒪᔨᒥᑦ/ᐊᑐᐊᒐᓕᕆᓂᕐᒧᑦ ᐅᖃᐅᔾᔪᖏᔨ ᑲᒪᒋᔭᖃᖅᐳᖅ ᐋᖅᑭᒃᓱᐃᓂᕐᒥᑦ ᐊᒻᒪ ᐊᑐᓕᖅᑎᑦᑎᓂᕐᒥᑦ ᑐᓴᐅᒪᖃᑎᒌᖕᓂᕐᒧᑦ ᐊᑐᖅᑕᐅᓂᐊᖅᑐᒥᑦ ᐊᒻᒪ ᐸᕐᓇᐅᑎᒥᑦ ᑲᒥᓴᒃᑯᓐᓄᑦ, ᐱᕙᒌᔭᐃᓂᕐᒥᓪᓗ ᐅᖃᓕᒫᖅᑕᐅᓂᐊᖅᑐᓂᑦ ᓱᓇᒃᑯᑖᓂᑦ, ᐱᕙᓪᓕᐊᔪᓂᑦ ᓴᖅᑭᑕᐅᔪᒃᓴᓂᑦ, ᑐᓴᐅᒪᑎᑦᑎᔾᔪᑎᓂᑦ, ᐅᖃᐅᓯᒃᓴᓂᑦ, ᐱᕙᓪᓕᐊᔪᓂᑦ ᑎᑎᖅᑲᓂᑦ, ᑲᑎᒪᔾᔪᑎᒥᓂᕐᓂᒃ, ᐊᒻᒪ ᑲᒥᓴᒃᑯᑦ ᐊᕐᕌᒍᑕᒫᑦ ᐅᓂᒃᑳᓕᐊᖏᓐᓂᒃ. ᑐᓴᐅᒪᔪᓕᕆᓂᕐᒧᑦ ᐱᓕᕆᔨ/ᐊᑐᐊᒐᕐᓄᑦ ᐅᖃᐅᔾᔪᐃᔨ ᐃᑲᔪᓲᖑᖕᒥᔪᖅ ᕿᒥᕐᕈᐊᓲᖅ, ᖃᐅᔨᓴᓲᖅ ᐊᒻᒪ ᐅᖃᐅᔾᔪᐃᒋᐊᓲᖅ ᐊᑐᖅᑕᐅᓂᐊᖅᑐᓂᑦ, ᐊᑐᐊᒐᕐᓂᒃ, ᐊᑲᐅᙱᓕᐅᕈᑕᐅᕙᓪᓕᐅᔪᓂᑦ ᐊᒻᒪ ᐅᓗᕆᐊᓇᖅᑐᓂᑦ ᐊᒻᒪ ᐃᑲᔪᖅᓱᕐᓂᕐᒥᑦ ᐊᐅᓚᑦᑎᔨᒻᒪᕆᐅᖃᑎᒌᓂᑦ ᓄᓇᕗᒻᒥ ᓄᓇᒥ ᐊᑐᕐᓂᕐᒧᑦ ᐸᕐᓇᐃᓂᕐᒧᑦ ᐱᓕᕆᓂᒃᑯᑦ. ᑐᓴᐅᒪᔪᓕᕆᓂᕐᒧᑦ ᐱᓕᕆᔨ/ᐊᑐᐊᒐᕐᓄᑦ ᐅᖃᐅᔾᔪᐃᔨ ᐃᑲᔪᓲᖑᖕᒥᔪᖅ ᐊᒻᒪ ᐱᓕᕆᓲᖅ ᑭᐅᓂᕐᒥᑦ ᑲᙳᓇᖅᑐᓕᕆᓂᕐᒧᑦ ᑐᓴᖅᑕᐅᒍᒪᔪᓂᑦ ᐊᒻᒪ ᐃᑲᔪᓲᖅ ᐱᕙᒌᔭᐃᓂᕐᒥᑦ ᐊᕐᕌᒍᑕᒫᑦ ᐱᓕᕆᓂᕐᒧᑦ ᐸᕐᓇᐅᑎᓂᑦ ᐊᒻᒪ ᑮᓇᐅᔭᕐᓂᒃ ᐊᑐᖅᑐᒃᓴᓂᑦ ᑮᓇᐅᔭᓕᕆᓂᕐᒧᓪᓗ ᐅᓂᒃᑳᓕᐊᓂᑦ ᑕᐃᒪᐃᒋᐊᖃᖅᑎᓪᓗᒋᑦ ᑮᓇᐅᔭᖃᖅᑎᑦᑎᔨᓂᑦ ᐊᖏᕈᑎᓂᑦ.
ᑐᑭᒧᐊᒃᑎᑦᑎᔨ ᑮᓇᐅᔭᓕᕆᓂᕐᒧᑦ
ᑐᑭᒧᐊᒃᑎᑦᑎᔨ ᑮᓇᐅᔭᓕᕆᓂᕐᒧᑦ ᓵᑕᐅᔪᓐᓇᖅᑐᖅ ᑐᑭᒧᐊᒃᑎᑦᑎᔨᒻᒪᕆᖕᒧᑦ ᐊᒻᒪ, ᑕᐃᒪᐃᒻᒪᑦ, ᐱᔭᒃᓴᖃᖅᐳᖅ ᑮᓇᐅᔭᓕᕆᓂᕐᒧᑦ ᑐᕌᖓᔪᓕᒫᓂᑦ, ᐊᐅᓚᑦᑎᓂᕐᒥᑦ, ᐃᖅᑲᓇᐃᔭᖅᑐᓕᕆᓂᕐᒥᑦ ᐊᐅᓚᑦᑎᓂᕐᒥᑦ ᐊᒻᒪ ᐱᕙᒌᔭᐃᑦᑎᐊᕐᓂᕐᒥᑦ ᑮᓇᐅᔭᓕᕆᓂᕐᒧᑦ, ᐃᖅᑲᓇᐃᔭᖅᑎᓄᑦ ᐊᒻᒪ ᐊᐅᓚᑦᑎᓂᕐᒧᑦ ᐅᓂᒃᑳᓕᐊᓂᑦ. ᑖᓐᓇ ᐃᓂᐅᔪᖅ ᐋᖅᑭᐅᒪᑎᑦᑎᔭᕆᐊᓖᑦ ᖃᐅᔨᔭᐅᙱᓪᓗᑎᒃ ᑮᓇᐅᔭᓕᕆᓂᕐᒧᑦ ᑐᑭᓯᒋᐊᕈᑎᒃᓴᓂᑦ, ᐃᖅᑲᓇᐃᔭᖅᑏᑦ ᑎᑎᖅᑲᖁᑎᖏᓐᓂᒃ ᐊᒻᒪ ᖃᐅᔨᔭᐅᔭᕆᐊᖃᙱᑦᑐᓂᑦ ᑳᓐᑐᓛᓄᑦ ᑐᑭᓯᒋᐊᕈᑎᒃᓴᓂᑦ.
ᑮᓇᐅᔭᓕᕆᔨᒻᒪᕆᒃ
ᑐᑭᒧᐊᒃᑎᑦᑎᔨᖃᕐᓗᓂ ᑐᑭᒧᐊᒃᑎᑦᑎᔨ ᑮᓇᐅᔭᓕᕆᓂᕐᒧᑦ, ᑮᓇᐅᔭᓕᕆᔨᒻᒪᕆᒃ ᐱᔭᒃᓴᖃᖅᐳᖅ ᖃᐅᔨᒪᑦᑎᐊᕆᐊᕐᓂᕐᒥᑦ ᖃᐅᑕᒫᖅᓯᐅᑏᑦ ᑮᓇᐅᔭᓕᕆᔾᔪᑏᑦ ᐊᒻᒪ ᑮᓇᐅᔭᓕᕆᓂᕐᒧᑦ ᐊᒻᒪ ᐊᐅᓚᑦᑎᓂᕐᒧᑦ ᐱᔨᑦᑎᕋᐅᑏᑦ ᐊᑐᐃᓐᓇᐅᑎᑕᐅᓗᑎᒃ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᓐᓄᑦ.
ᐃᖅᑲᓇᐃᔭᖅᑐᓕᕆᔨ
ᐊᖏᔪᖅᑳᖃᖅᖢᓂ ᑐᑭᒧᐊᒃᑎᑦᑎᔨ ᑮᓇᐅᔭᓕᕆᓂᕐᒧᑦ, ᑖᓐᓇ ᐃᓂᒋᔭᐅᔪᖅ ᐱᔭᒃᓴᖃᖅᐳᖅ ᐃᖅᑲᓇᐃᔭᖅᑐᓕᕆᓂᕐᒧᑦ ᐊᒻᒪ ᐃᖅᑲᓇᐃᔭᖅᑎᑖᕐᓂᕐᒧᑦ ᖃᐅᔨᒪᓯᓐᓈᕐᓗᓂ ᐃᖅᑲᓇᐃᔭᕐᓂᖏᑦ, ᐃᖅᑲᓇᐃᔭᖅᑏᑦ ᐊᒻᒪ ᓇᓕᒧᒃᑐᒥᑦ ᐱᕕᒃᓴᖃᖅᑎᑕᐅᓂᕐᒥᑦ ᐊᑐᐊᒐᐃᑦ ᐊᒻᒪ ᐱᓕᕆᔾᔪᓰᑦ ᒪᓕᑦᑎᐊᕐᓗᑎᒃ ᑐᕌᖓᖃᓯᐅᑎᔪᓂᑦ ᒪᓕᒋᐊᓕᖕᓂᒃ ᒐᕙᒪᑐᖃᒃᑯᓐᓂ ᐊᒻᒪ ᐅᑭᐅᖅᑕᖅᑐᒥ ᐃᖅᑲᓇᐃᔭᖅᑎᓄᑦ ᒪᓕᒐᕐᓂᒃ. ᑖᓐᓇ ᐃᓂᒋᔭᐅᔪᖅ ᑲᒪᒋᔭᖃᓲᖅ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑕ ᐱᕚᓪᓕᕈᑎᒃᓴᓄᑦ ᐱᓕᕆᐊᒃᓴᖏᓐᓂᒃ.
ᐊᐅᓚᑦᑎᔨ ᖃᕆᑕᐅᔭᓕᕆᓂᕐᒧᑦ
ᐊᖏᔪᖅᑳᖃᖅᖢᓂ ᑐᑭᒧᐊᒃᑎᑦᑎᔨᒻᒪᕆᖕᒥᑦ, ᐊᐅᓚᑦᑎᔨ ᖃᕆᑕᐅᔭᓕᕆᓂᕐᒧᑦ ᐱᔭᒃᓴᖃᖅᐳᖅ ᑕᒪᐃᓐᓄᑦ ᑐᑭᓯᒋᐊᕈᑎᒃᓴᓄᑦ ᐋᖅᑭᒃᓱᖅᓯᒪᔪᓂᑦ, ᖃᕆᑕᐅᔭᕐᓄᑦ, ᓱᓇᒃᑯᑖᑦ ᐃᑭᐊᖅᑭᕕᒃᑯᑦ, ᖃᕆᑕᐅᔭᓕᕆᔾᔪᑏᑦ, ᐊᒻᒪ ᖃᕆᑕᐅᔭᓕᕆᔾᔪᑎᓄᑦ ᓚᐃᓴᓐᓰᑦ, ᐃᑭᐊᖅᑭᕕᖕᒥᑦ ᐊᐅᓚᑦᑎᓂᕐᒥᑦ ᐊᒻᒪ ᑐᖅᑯᐃᕕᖕᒥᑦ ᑲᒥᓴᒃᑯᓐᓄᑦ. ᐊᖑᑦ/ᐊᕐᓇᖅ ᐃᓕᓐᓂᐊᖅᑎᑦᑎᒐᔭᖅᑐᖅ ᖃᕆᑕᐅᔭᓕᕆᓂᕐᒥᑦ ᑲᒥᓴᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐊᒻᒪ ᑲᒥᓴᓄᑦ.
ᑐᑭᒧᐊᒃᑎᑦᑎᔨ ᐊᑐᐊᒐᕐᓄᑦ ᐊᒻᒪ ᐸᕐᓇᐃᓂᕐᒧᑦ
ᐊᖏᔪᖅᑳᖃᖅᖢᓂ ᑐᑭᒧᐊᒃᑎᑦᑎᔨᒻᒪᕆᖕᒥᑦ, ᑖᓐᓇ ᖁᑦᑎᖕᓂᖅᓴᖅ ᐊᐅᓚᑦᑎᓂᕐᒧᑦ ᐃᓂᐅᔪᖅ ᐱᔭᒃᓴᖃᖅᐳᖅ ᐱᕙᓪᓕᐊᑎᑦᑎᓂᕐᒥᑦ ᐊᒻᒪ ᐊᑐᓕᖅᑎᑦᑎᓂᕐᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂᑦ ᐊᒻᒪ ᑐᕌᖓᖃᓯᐅᑎᔪᓂᑦ ᐊᑐᐊᒐᕐᒨᖓᔪᓂᑦ. ᐱᔭᒃᓴᕆᔭᐅᔪᑦ ᐃᓚᖃᖅᑐᑦ ᖃᐅᔨᒪᑦᑎᐊᕆᐊᕐᓂᕐᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐃᓂᕐᒧᑦ ᐊᑎᕆᐊᓖᑦ ᓄᓇᕗᒻᒥ ᐊᖏᕈᑎᖕᒥᑦ ᐊᒻᒪ ᓄᓇᕗᒻᒥ ᐸᕐᓇᐃᓂᕐᒧᑦ ᐊᒻᒪ ᐱᓕᕆᐊᒃᓴᓂᑦ ᖃᐅᔨᓴᕐᓂᕐᒧᑦ ᐱᖁᔭᕐᒥᑦ ᑎᑭᐅᒪᔭᐅᓗᑎᒃ.
ᐊᐅᓚᑦᑎᔨ ᐸᕐᓇᐃᓂᕐᒧᑦ ᐊᒻᒪ ᐊᑐᓕᖅᑎᑦᑎᓂᕐᒧᑦ
ᐊᐅᓚᑦᑎᔨ ᐊᑐᓕᖅᑎᑦᑎᓂᕐᒧᑦ, ᐊᖏᔪᖅᑳᖃᖅᖢᓂ ᑐᑭᒧᐊᒃᑎᑦᑎᔨᒻᒪᕆᖕᒥᑦ/ᑐᑭᒧᐊᒃᑎᑦᑎᔨᒥᑦ ᐊᑐᐊᒐᓕᕆᓂᕐᒧᑦ ᐊᒻᒪ ᐸᕐᓇᐃᓂᕐᒧᑦ, ᐱᔭᒃᓴᖃᖅᐳᖅ ᐋᖅᑭᒃᓱᐃᓂᕐᒥᑦ ᐊᕕᒃᑐᖅᓯᒪᔪᒥᑦ ᐸᕐᓇᐃᓂᕐᒥᑦ ᐃᖅᑲᓇᐃᔭᖅᑏᑦ ᐊᐅᓚᓂᕆᔭᖏᓐᓄᑦ ᐊᒻᒪ ᐱᓕᕆᑦᑎᐊᕋᓗᐊᕐᒪᖔᑦ ᐊᐅᓚᓂᖏᑦ ᑐᕌᖓᔪᓂᑦ ᐱᕙᓪᓕᐊᑎᑦᑎᓂᕐᒧᑦ, ᐊᑐᓕᖅᑎᑦᑎᓂᕐᒧᑦ ᐊᒻᒪ ᑲᔪᓰᓐᓇᖅᑐᒥᑦ ᐋᖅᑭᐅᒪᑎᑦᑎᓂᕐᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂᑦ.
ᐸᕐᓇᐃᔨᒻᒪᕆᒃ
ᑐᑭᒧᐊᒃᑎᑦᑎᔨᖃᕐᓗᓂ ᐊᐅᓚᑦᑎᔨᒥᑦ ᐊᑐᓕᖅᑎᑦᑎᓂᕐᒧᑦ, ᐸᕐᓇᐃᔨᒻᒪᕆᒃ ᐱᔭᒃᓴᖃᖅᐳᖅ ᐊᐅᓚᑦᑎᓂᕐᒥᑦ ᐊᒻᒪ ᐊᑐᐃᓐᓇᐅᑎᑦᑎᓂᕐᒥᑦ ᐅᖃᐅᓯᒃᓴᓂᑦ ᐊᑕᖏᖅᑐᓄᑦ ᐊᑑᑎᖃᖅᑐᒥᑦ ᐊᒻᒪ ᐱᓕᕆᑦᑎᐊᕐᓂᕐᒧᑦ ᐊᑐᓕᖅᑎᑦᑎᓂᕐᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂᑦ ᐊᒻᒪ ᓄᓇᕗᒻᒥ ᐸᕐᓇᐃᓂᕐᒧᑦ ᐊᒻᒪ ᐱᓕᕆᐊᒃᓴᓂᑦ ᖃᐅᔨᓴᕐᓂᕐᒧᑦ ᐱᖁᔭᖅ (NuPPAA).
ᐸᕐᓇᐃᔨ
ᑐᑭᒧᐊᒃᑎᑦᑎᔨᖃᕐᓗᓂ ᐸᕐᓇᐃᔨᒻᒪᕆᖕᒥᑦ, ᐸᕐᓇᐃᔨ ᐱᔭᒃᓴᖃᖅᐳᖅ ᐃᑲᔪᕐᓂᕐᒥᑦ ᐊᑑᑎᖃᖅᑐᒥᑦ ᐊᒻᒪ ᐱᓕᕆᑦᑎᐊᕐᓂᕐᒧᑦ ᐊᑐᓕᖅᑎᑦᑎᓂᕐᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂᑦ ᐊᒻᒪ ᓄᓇᕗᒻᒥ ᐸᕐᓇᐃᓂᕐᒧᑦ ᐊᒻᒪ ᐱᓕᕆᐊᒃᓴᓂᑦ ᖃᐅᔨᓴᕐᓂᕐᒧᑦ ᐱᖁᔭᖅ (NuPPAA).
ᐊᕕᒃᑐᖅᓯᒪᔪᒥᑦ ᐸᕐᓇᐃᓂᕐᒧᑦ ᑲᒪᔨ/ᓄᓇᙳᐊᓕᕆᔨ ᐊᒻᒪ ᑐᑭᓕᐅᕆᔨ
ᑐᑭᒧᐊᒃᑎᑦᑎᔨᖃᕐᓗᓂ ᐸᕐᓇᐃᔨᒻᒪᕆᖕᒥᑦ, ᐊᕕᒃᑐᖅᓯᒪᔪᒥᑦ ᐸᕐᓇᐃᓂᕐᒧᑦ ᑲᒪᔨ/ᓄᓇᙳᐊᓕᕆᔨ ᐊᒻᒪ ᑐᑭᓕᐅᕆᔨ ᐱᔭᒃᓴᖃᖅᐳᖅ ᐋᖅᑭᒃᓱᐃᓂᕐᒥᑦ ᓄᓇᓕᐅᔪᓂᑦ ᐊᕕᒃᑐᖅᓯᒪᔪᒥᑦ. ᑕᒪᓐᓇ ᐃᓚᖃᖅᐳᖅ ᑲᑎᒪᓂᕐᒥᑦ ᐊᒻᒪ ᐅᖃᖃᑎᖃᕐᓂᕐᒥᑦ, ᐊᑐᐃᓐᓇᐅᑎᑦᑎᓂᕐᒥᑦ ᑐᑭᓯᒋᐊᕈᑎᒃᓴᓂᑦ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑕ ᒥᒃᓵᓄᑦ, ᐃᑲᔪᕐᓂᕐᒥᑦ ᑲᑎᒪᓂᕐᒧᑦ ᐋᖅᑭᒃᓱᐃᓂᕐᒥᑦ, ᑎᑎᖅᑲᓂᑦ ᐊᒻᒪ ᑲᒪᒋᔭᖃᕐᓂᕐᒥᑦ, ᐊᒻᒪ ᓄᓇᙳᐊᓕᕆᓂᕐᒧᑦ ᐱᔭᒃᓴᕆᔭᐅᔪᓂᑦ. ᐊᖑᑦ/ᐊᕐᓇᖅ ᐱᔭᒃᓴᖃᕐᒥᔪᖅ ᐊᑐᐃᓐᓇᐅᑎᑦᑎᓂᕐᒥᑦ ᐱᓕᕆᔨᒻᒪᕆᐅᓗᓂ ᐃᓄᒃᑎᑐᑦ/ᐃᓄᐃᓐᓇᖅᑐᓐ-ᖃᓪᓗᓈᑎᑐᑦ ᑐᑭᓕᐅᕆᓂᕐᒥᑦ.
ᓄᓇᙳᐊᓕᕆᔨ/ᐸᕐᓇᐃᔨ
ᐊᖏᔪᖅᑳᖃᖅᖢᓂ ᐊᐅᓚᑦᑎᔨ ᐸᕐᓇᐃᓂᕐᒧᑦ ᐊᒻᒪ ᐊᑐᓕᖅᑎᑦᑎᓂᕐᒧᑦ, ᑖᓐᓇ ᓄᓇᙳᐊᓕᕆᔨ/ᐸᕐᓇᐃᔨ ᐱᔭᒃᓴᖃᖅᑐᖅ ᐃᑲᔪᕐᓂᕐᒥᑦ ᐊᑐᓕᖅᑎᑦᑎᓂᕐᒥᑦ ᒪᓕᒋᐊᓕᖕᓂᑦ ᓄᓇᕗᒻᒥ ᐊᖏᕈᑎᖕᒥᑦ, ᑎᑎᕋᖅᓯᒪᔪᖅ 11, ᓄᓇᒥ ᐊᑐᕐᓂᕐᒧᑦ ᐸᕐᓇᐃᓂᕐᒥᑦ. ᐊᖑᑦ/ᐊᕐᓇᖅ ᐊᑐᐃᓐᓇᐅᑎᑦᑎᓂᐊᖅᑐᖅ ᖃᐅᔨᒪᔨᑕᐅᓗᓂ ᓄᐊᑦᑎᓂᕐᒥᑦ ᐊᒻᒪ ᖃᐅᔨᓴᑦᑎᐊᕐᓂᕐᒥᑦ ᐊᖏᓂᖓᓄᑦ ᐊᒻᒪ ᐊᑐᓚᐅᑲᒃᑐᓂᑦ ᖃᐅᔨᓴᖅᑕᐅᔾᔪᑎᓂᑦ ᓄᐊᑕᐅᓯᒪᔪᓂᑦ ᑕᒪᒃᑯᐊᓗ ᐃᓅᓯᕐᒧᑦ ᐊᒻᒪ ᑮᓇᐅᔾᔭᓴᖕᓂᕐᒧᑦ ᑐᑭᓯᒋᐊᕈᑎᒃᓴᓂᑦ ᑐᕌᖓᔪᓂᑦ ᐊᕕᒃᑐᖅᓯᒪᔪᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐃᓂᕐᒥᑦ ᐊᒻᒪᓗ ᓄᓇᒥᙶᖅᑐᓂᒃ ᐊᐅᓚᑦᑎᓂᕐᒥᑦ. ᐊᖑᑦ/ᐊᕐᓇᖅ ᐱᔭᒃᓴᖃᖅᐳᖅ ᐃᑲᔪᖅᓱᓂᕐᒥᑦ ᑕᒪᐃᓐᓂᒃ ᓄᓇᙳᐊᓕᕆᓂᕐᒧᑦ ᐊᒻᒪ ᓄᓇᙳᐊᓕᕆᔾᔪᑎᓂᑦ ᖃᕆᑕᐅᔭᒃᑯᑦ ᐊᐅᓚᑦᑎᓂᕐᒥᑦ ᐸᕐᓇᐃᓂᕐᒧᑦ ᐊᒡᓚᒡᕕᖕᒥᑦ. ᐊᖏᑦ/ᐊᕐᓇᖅ ᐱᔭᒃᓴᖃᖅᐳᖅ ᐊᑕᖏᖅᑐᓄᑦ ᐊᑑᑎᖃᖅᑐᒥᑦ ᐊᒻᒪ ᐱᓕᕆᑦᑎᐊᕐᓂᕐᒧᑦ ᐊᑐᓕᖅᑎᑦᑎᓂᕐᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂᑦ ᐊᒻᒪ ᓄᓇᕗᒻᒥ ᐸᕐᓇᐃᓂᕐᒧᑦ ᐊᒻᒪ ᐱᓕᕆᐊᒃᓴᓂᑦ ᖃᐅᔨᓴᕐᓂᕐᒧᑦ ᐱᖁᔭᖅ (NuPPAA).
ᓄᑲᖅᖠᖅ ᓄᓇᙳᐊᓕᕆᔨ/ᐸᕐᓇᐃᔨ
ᐊᖏᔪᖅᑳᖃᖅᖢᓂ ᐸᕐᓇᐃᔨᒻᒪᕆᖕᒥᑦ ᐊᒻᒪ ᓄᓇᙳᐊᓕᕆᔨ/ᐸᕐᓇᐃᔨ ᑖᓐᓇ ᓄᑲᖅᖠᒃ ᓄᓇᙳᐊᓕᕆᔨ/ᐸᕐᓇᐃᔨ ᐱᔭᒃᓴᖃᖅᑐᖅ ᐃᑲᔪᕐᓂᕐᒥᑦ ᐊᑐᓕᖅᑎᑦᑎᓂᕐᒥᑦ ᒪᓕᒋᐊᓕᖕᓂᑦ ᓄᓇᕗᒻᒥ ᐊᖏᕈᑎᖕᒥᑦ (NA) ᑎᑎᕋᖅᓯᒪᔪᖅ 11, ᓄᓇᒥ ᐊᑐᕐᓂᕐᒧᑦ ᐸᕐᓇᐃᓂᕐᒥᑦ, ᐊᒻᒪ ᑐᕌᖓᖃᓯᐅᑎᔪᓂᑦ ᓄᓇᕗᒻᒥ ᐊᖏᕈᑎᖕᒥᑦ ᑎᑎᕋᖅᓯᒪᔪᓂᑦ. ᐱᓕᕆᔨᐅᔪᖅ ᓄᑲᖅᖠᖅ ᓄᓇᙳᐊᓕᕆᔨ/ᐸᕐᓇᐃᔨ ᐱᓕᕆᖃᑎᖃᓲᖅ ᐊᓯᖏᓐᓂᒃ ᐊᑐᐃᓐᓇᐅᑎᑦᑎᓂᕐᒥᑦ ᖃᐅᔨᒪᔨᑕᐅᓗᓂ ᓄᐊᑦᑎᓂᕐᒥᑦ, ᖃᕆᑕᐅᔭᕐᒧᐊᖅᑲᐃᓂᕐᒥᑦ, ᖃᐅᔨᓴᑦᑎᐊᕐᓂᕐᒥᑦ, ᐊᒻᒪ ᑭᒡᒐᖅᑐᐃᓂᕐᒥᑦ ᐊᖏᓂᖓᓄᑦ ᖃᐅᔨᓴᖅᑕᐅᔾᔪᑎᓂᑦ ᓄᐊᑕᐅᓯᒪᔪᓂᑦ ᑕᒪᒃᑯᐊᓗ ᐃᓅᓯᕐᒧᑦ ᐊᒻᒪ ᑮᓇᐅᔾᔭᓴᖕᓂᕐᒧᑦ ᑐᑭᓯᒋᐊᕈᑎᒃᓴᓂᑦ ᑐᕌᖓᔪᓂᑦ ᐊᕕᒃᑐᖅᓯᒪᔪᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐃᓂᕐᒥᑦ ᐊᒻᒪᓗ ᓄᓇᒥᙶᖅᑐᓂᒃ ᐊᐅᓚᑦᑎᓂᕐᒥᑦ. ᓄᑲᖅᖠᒃ ᓄᓇᙳᐊᓕᕆᔨ/ᐸᕐᓇᐃᔨ ᐱᔭᒃᓴᖃᖅᐳᖅ ᐃᑲᔪᖅᓱᓂᕐᒥᑦ ᑕᒪᐃᓐᓂᒃ ᓄᓇᙳᐊᓕᕆᓂᕐᒧᑦ ᐊᒻᒪ ᓄᓇᙳᐊᓕᕆᔾᔪᑎᓂᑦ ᖃᕆᑕᐅᔭᒃᑯᑦ ᐊᐅᓚᑦᑎᓂᕐᒥᑦ ᐱᓕᕆᕝᕕᐅᔪᒥᑦ. ᓄᑲᖅᖠᒃ ᓄᓇᙳᐊᓕᕆᔨ/ᐸᕐᓇᐃᔨ ᐱᔭᒃᓴᖃᕐᒥᔪᖅ ᐃᑲᔪᕐᓂᕐᒥᑦ ᐊᑑᑎᖃᖅᑐᒥᑦ ᐊᒻᒪ ᐱᓕᕆᑦᑎᐊᕐᓂᕐᒧᑦ ᐊᑐᓕᖅᑎᑦᑎᓂᕐᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂᑦ ᐊᒻᒪ ᓄᓇᕗᒻᒥ ᐸᕐᓇᐃᓂᕐᒧᑦ ᐊᒻᒪ ᐱᓕᕆᐊᒃᓴᓂᑦ ᖃᐅᔨᓴᕐᓂᕐᒧᑦ ᐱᖁᔭᖅ (NuPPAA).
ᑐᓵᔨ/ᑐᑭᓕᐅᕆᔨ, ᐃᓄᒃᑎᑐᑦ, ᐃᓄᐃᓐᓇᖅᑐᑦ ᐊᒻᒪ ᐅᐃᕖᑎᑐᑦ
ᑐᑭᓕᕆᔨ/ᑐᓵᔨ ᐱᔭᒃᓴᖃᖅᐳᖅ ᐱᓕᕆᔨᒻᒪᕆᐅᓗᓂ ᐃᓄᒃᑎᑐᑦ-ᖃᓪᓗᓈᑎᑐᑦ/ᐃᓄᐃᓐᓇᖅᑐᓐ-ᖃᓪᓗᓈᑎᑐᑦ/ᐅᐃᕖᑎᑐᑦ-ᖃᓪᓗᓈᑎᑐᑦ ᑐᓵᔨᐅᓂᕐᒥᑦ ᐊᒻᒪ ᑐᑭᓕᐅᕆᓂᕐᒥᑦ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᓐᓄᑦ.