ᑐᕌᒐᖓᓄᑦ ᐅᖃᐅᓯᒃᓴᖅ
“ᓯᕗᒧᐊᖅᑎᑦᑎᓂᕐᒥᑦ ᓄᓇᒥᑦ ᐊᑐᕐᓂᕐᒧᑦ ᐸᕐᓇᐃᓂᒃᑯᑦ ᓄᓇᕗᒻᒥᐅᓄᑦ”
ᐱᓇᓱᐊᒐᕆᔭᑦ
ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ (NPC) ᑲᒪᒋᔭᖃᖅᑐᑦ ᐱᕙᓪᓕᐊᑎᑦᑎᓂᕐᒥᑦ, ᐊᑐᓕᖅᑎᑦᑎᓂᕐᒥᑦ ᐊᒻᒪ ᖃᐅᔨᓴᕐᓂᕐᒥᑦ ᓄᓇᐅᑉ ᐊᑐᖅᑕᐅᓂᖓᓂ ᐸᕐᓇᐅᑎᓂᑦ ᐃᑲᔪᖅᑐᖅ ᐊᒻᒪ ᑐᑭᒧᐊᕈᑕᐅᔪᖅ ᓄᓇᒥᙶᖅᑐᓂᑦ ᐊᑐᕐᓂᕐᒧᑦ ᐊᒻᒪ ᐱᕙᓪᓕᐊᑎᑦᑎᓂᕐᒧᑦ ᓄᓇᕗᒻᒥ ᓄᓇᑖᕆᔭᐅᓯᒪᔪᒥᑦ.
ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ (NPC) ᓴᖅᑭᑕᐅᕐᖓᓚᐅᖅᓯᒪᔪᖅ 1993-ᒥᑦ ᐱᓕᕆᕝᕕᒃ ᑭᒃᑯᑐᐃᓐᓇᕐᓄᑦ ᒐᕙᒪᓄᑦ (IPG) ᐊᑖᒍᑦ ᑎᑎᕋᖅᓯᒪᔪᖅ 10 ᓄᓇᕗᒻᒥ ᐊᖏᕈᑎᒥᑦ. ᓄᓇᕗᒻᒥ ᐸᕐᓇᐃᓂᕐᒧᑦ ᐊᒻᒪ ᐱᓕᕆᐊᒃᓴᓂᑦ ᖃᐅᔨᓴᕐᓂᕐᒧᑦ ᐱᖁᔭᖅ (NuPPAA) ᐱᒋᐊᓚᐅᖅᑐᖅ ᔪᓚᐃ 2015-ᒥᑦ, ᓴᖅᑮᓚᐅᖅᑐᑦ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ “ᐱᓯᒪᑦᑎᔨᐅᓪᓗᑎᒃ” ᑕᐃᒪᓐᓄᑦ ᐱᓕᕆᐊᒃᓴᓄᑦ ᑐᒃᓯᕋᐅᑎᓄᑦ. ᑕᒪᓐᓇ ᑐᑭᖃᖅᐳᖅ ᐱᓕᕆᐊᖑᔪᓕᒫᑦ ᑐᒃᓯᕋᐅᑕᐅᓯᒪᔪᑦ ᓄᓇᕗᒻᒥ ᑐᓂᔭᐅᖅᑳᕆᐅᓖᑦ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᓄᑦ ᕿᒥᕐᕈᔭᐅᓂᕐᒧᑦ.
ᐊᓯᖏᓪᓗ ᐱᓕᕆᕝᕕᒃ ᑭᒃᑯᑐᐃᓐᓇᕐᓄᑦ ᒐᕙᒪᓄᑦ (ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ, ᓄᓇᕗᒻᒥ ᐃᒪᓕᕆᔨᒃᑯᑦ ᑲᑎᒪᔨᖏᑦ, ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᒻᒪ ᓄᓇᕗᒻᒥ ᓄᓇᒧᑦ ᐱᔪᓐᓇᐅᑎᓕᕆᔨᒃᑯᑦ) ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᐱᓪᓗᐊᑕᕆᔭᐅᔪᑦ ᖃᐅᔨᓴᕐᓂᕐᒧᑦ ᐋᖅᑭᒃᓱᖅᓯᒪᔪᒥᑦ ᓄᓇᒥ ᐊᒻᒪ ᓄᓇᒥᙶᖅᑐᓂᑦ ᐊᐅᓚᑦᑎᓂᕐᒧᑦ ᓄᓇᕗᒻᒥ ᓄᓇᑖᕆᔭᐅᓯᒪᔪᒥᑦ
ᐊᑖᒍᑦ ᑎᑎᕋᖅᓯᒪᔪᖅ 11.4.4 ᑕᐃᑲᓂ ᓄᓇᕗᒻᒥ ᐊᖏᕈᑎ, ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᐃᒪᐃᓕᐅᕐᓂᐊᖅᑐᑦ
(a) ᓇᓗᓇᐃᖅᓯᓗᓂ ᐸᕐᓇᐃᕐᓂᕐᒧᑦ ᐊᕕᑦᑐᖅᓯᒪᔪᓂᑦ;
(b) ᓇᓗᓇᐃᖅᓯᓗᓂ ᑐᕌᓪᓚᕆᑦᑐᓂᑦ ᐸᕐᓇᐃᒧᑦ ᐱᓕᕆᔭᐅᔪᒪᔪᑦ, ᑐᕌᖅᑕᐅᔪᑦ ᐊᒻᒪ ᐊᓯᔾᔨᖅᑕᖅᑐᓂᑦ ᑐᕌᖓᔪᓂᑦ ᐸᕐᓇᐃᓂᕐᒧᑦ ᐊᕕᑦᑐᖅᓯᒪᔪᓂᑦ ᒪᓕᑦᑎᐊᖅᑐᓂᑦ ᐊᖏᓂᖅᓴᓄᑦ ᐱᓕᕆᔭᐅᔪᒪᔪᓄᑦ ᐊᒻᒪ ᑐᕌᖅᑕᐅᔪᓄᑦ;
(c) ᐃᑲᔪᕐᓗᑎᒃ ᐱᕙᓪᓕᐊᑎᑦᑎᓂᕐᒥᑦ ᐊᒻᒪ ᕿᒥᕐᕈᐊᕐᓂᕐᒥᑦ ᐅᑭᐅᖅᑕᖅᑐᒥ ᑕᕆᐅᕐᒥᑦ ᐊᑐᐊᒐᕐᒥᑦ;
(d) ᑐᓐᓂᖅᓴᐃᓗᑎᒃ ᑐᑭᓯᒋᐊᕈᑎᒃᓴᓂᑦ ᐊᒻᒪ ᖃᐅᔨᓴᖅᑕᐅᔾᔪᑎᓂᑦ ᓄᐊᑕᐅᓯᒪᔪᓂᑦ;
(e) ᑐᒃᓯᕋᕐᓗᑎᒃ ᐅᖃᐅᓯᒃᓴᕆᔭᐅᔪᓂᑦ ᓄᓇᓕᖕᓂᑦ, ᐃᓄᖁᑎᒋᔭᐅᔪᓂᑦ ᐊᒻᒪ ᐊᓯᖏᓐᓂᒃ ᐸᕐᓇᐃᓂᕐᒧᑦ ᐱᓕᕆᔭᐅᔪᒪᔪᓂᑦ, ᑐᕌᖅᑕᐅᔪᒪᔪᓂᑦ ᐊᒻᒪ ᓇᓖᕋᕈᑎᒃᓴᓂᑦ ᐊᕕᒃᑐᖅᓯᒪᔪᒥᑦ;
(f) ᐱᕙᒌᔭᐃᓗᑎᒃ ᐊᒻᒪ ᑐᓐᓂᖅᓴᐃᓗᑎᒃ ᑎᑎᕋᖅᑕᐅᕐᖓᖅᓯᒪᔪᓂᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂᑦ;
(g) ᐅᔾᔨᕈᓱᓕᖅᑎᑦᑎᓗᑎᒃ ᐃᓄᓕᒫᑦ ᖃᐅᔨᒪᓂᖏᓐᓂᒃ ᐊᒻᒪ ᐅᖃᖃᑎᒌᓗᑎᒃ ᐊᒻᒪ ᐃᓄᓕᒫᓂᑦ ᓈᓚᖕᓂᖃᖅᑎᑦᑎᓗᑎᒃ ᐊᒻᒪ ᐋᔩᖃᑎᒌᖕᓂᕐᒥᑦ ᐸᕐᓇᐃᓂᕐᒧᑦ ᐱᓕᕆᔾᔪᓯᐊᓂ;
(h) ᐸᕐᓇᐅᑎᓂᑦ ᐊᑐᓕᖁᔭᐅᔪᓂᑦ ᑐᓂᓯᓗᑎᒃ ᒥᓂᔅᑕᓄᑦ;
(i) ᐃᓱᒪᒃᓴᖅᓯᐅᕐᓗᑎᒃ ᐋᖅᑭᒋᐊᕈᑎᒃᓴᓂᑦ ᑐᒃᓯᕌᖑᓯᒪᔪᓂᑦ ᒥᓂᔅᑕᓄᑦ ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎ ᐋᒃᑳᖅᑕᐅᑳᓪᓚᓐᓂᕈᓂ;
(j) ᐃᓱᒪᒃᓴᖅᓯᐅᕐᓗᑎᒃ ᐊᓯᔾᔩᓂᕐᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒥᑦ ᒪᓕᓪᓗᒍ ᐃᓚᖓ 6;
(k) ᓇᓗᓇᐃᖅᓯᓗᑎᒃ ᐱᓕᕆᐊᒃᓴᐅᔪᖅ ᑐᒃᓯᕌᖑᓯᒪᔪᖅ ᒪᓕᑦᑎᐊᕋᓗᐊᕐᒪᖔᖅ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒥᑦ;
(l) ᖃᐅᔨᓴᕐᓗᒋᑦ ᐱᓕᕆᐊᒃᓴᐅᔪᑦ ᒪᓕᑦᑎᐊᕋᓗᐊᕐᒪᖔᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂᑦ; ᐊᒻᒪ
(m) ᐊᕐᕌᒍᑕᒫᑦ ᐅᓂᒃᑳᓕᐅᕙᒡᓗᑎᒃ ᒥᓂᔅᓴᑕᓄᑦ ᐊᒻᒪ ᑎᒃᑯᐊᖅᑕᐅᓯᒪᔪᖅ ᐃᓄᐃᑦ ᑲᑐᔾᔨᖃᑎᒌᑦ ᐊᑐᓕᖅᑎᑦᑎᓂᕐᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂᑦ