ᑲᖏᖅᖠᓂᖅ, ᑖᕙᓃᑦᑐᖅ ᐅᐊᖕᓇᖓᓂ ᓯᒡᔭᖓᓂ ᑲᖏᖅᓱᐊᓘᑉ ᐃᓗᐊᓂ, ᑭᖑᓂᖓᓂ ᐊᖏᓂᖅᐹᖑᔪᖅ ᓄᓇᓕᐅᔪᓂᑦ ᓄᓇᕗᒻᒥ ᐊᒻᒪᓗ ᐊᐅᓚᑦᑎᕕᐅᔪᖅ ᐅᓯᑲᑦᑕᕐᓂᕐᒧᓪᓗ ᑐᑦᑕᕐᕕᒃ ᑭᕙᓪᓕᕐᒥᑦ. ᓄᓇᓕᐅᔪᖅ ᖃᐅᔨᒪᔭᐅᖕᒥᔪᖅ Rankin Inlet.
ᑲᖏᖅᖠᓂᕐᒥᐅᑕᐃᑦ ᓴᓇᖃᑦᑕᖅᑐᑦ ᐊᔾᔨᒌᙱᑦᑐᓂᑦ ᓴᓇᐅᒐᕐᓂᒃ, ᐃᓚᒋᓗᓂᒋᑦ ᓴᓇᙳᐊᒐᑦ, ᐳᕌᓐᓯᒨᖓᔪᑦ, ᐊᒻᒪᓗ ᑎᑎᖅᑐᒐᑦ, ᖃᐅᔨᒪᔭᐅᑦᑎᐊᖅᑐᖅ ᓴᓇᓲᑦ ᐃᓄᐃᑦ ᒪᕋᕐᒨᖓᔪᓂᑦ. ᐊᒥᓱᑦ ᐊᐅᓪᓚᕈᔾᔨᔩᑦ ᐊᒻᒪ ᓱᓇᒃᑯᑖᖃᖅᑎᑦᑎᔩᑦ ᐊᑐᐃᓐᓇᐅᑎᑦᑎᓲᑦ ᐳᓚᕋᖅᑎᓂᑦ ᐊᒻᒪ ᑲᒻᐸᓂᐅᔪᓂᑦ ᐊᔾᔨᒌᙱᑦᑐᓂᑦ ᐱᔨᑦᑎᕋᐅᑎᓂᑦ. ᐱᓱᔪᒋᐊᑦᑎᐊᕐᓇᖅᑐᖅ, ᐃᖃᓗᒐᓱᐊᕐᓂᖅ, ᑎᖕᒥᐊᓂᑦ ᖁᙱᐊᕐᓂᖅ ᐊᒻᒪᓗ ᐃᓚᖏᑦ ᑑᓖᑦ ᐃᑦᑕᕐᓂᓴᖃᕐᕖᑦ ᐃᓂᓂᑦ ᑕᑯᔭᐅᒍᓐᓇᖅᑐᑦ ᐃᖃᓗᒑᕐᔫᑉ ᓄᓇᖓ ᒥᕐᖑᐃᖅᓯᕐᕕᖕᒥᑦ, ᑖᕙᓃᑦᑐᖅ 10 km ᐅᐊᖕᓇᒃᐸᓯᖓᓂ ᓄᓇᓕᐅᔪᒥᑦ.
ᐱᑕᖃᑐᐃᓐᓇᕆᐊᓖᑦ ᐊᑐᒃᑲᓐᓂᒐᒃᓴᐅᙱᑦᑐᑦ ᑕᐅᕙᓃᑦᑐᑦ ᐃᓚᖃᖅᑐᖅ: ᒎᓗ, ᐅᔭᖅᑲᓂᒃ ᑎᓯᓂᖅᐹᑦ, ᓄᖑᔪᐃᑦᑐᖅ, ᓴᕕᕋᔭᒃᓴᐅᔪᑦ, ᐊᒻᒪᓗ ᑮᓇᐅᔭᒃᓴᑦ-ᑲᓐᓄᔭᖅ-ᐳᓚᑎᓇᒻ ᑲᑎᙵᔪᑦ ᐃᓗᓕᖏᑦ (PGE)
ᓄᓇᒥᒃ ᐊᑐᕐᓂᕐᒧᑦ ᐸᕐᓇᐃᓂᖅ
ᐊᖏᖅᑕᐅᔪᖅ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎ
ᓄᓇᓕᐅᔪᖅ ᑲᖏᖅᖠᓂᖅ ᑖᕙᓃᑦᑐᖅ ᐸᕐᓇᑕᐅᓯᒪᔪᖅ ᐃᓂᖓᓂ ᑭᕙᓪᓕᕐᒥ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᒥᑦ (KRLUP). ᓄᓇᕗᒻᒥ ᐸᕐᓇᐃᔩᑦ ᕿᒥᕐᕈᓲᑦ ᐊᑕᖏᖅᑐᒋᑦ ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᓂᑦ ᑕᐃᑲᓂ ᖃᓂᒋᔭᖓᓂᓗ ᑲᖏᖅᖠᓂᕐᒥ ᓇᓗᓇᐃᖅᓯᓂᕐᒧᑦ ᐊᖏᖅᑕᐅᓇᓱᐊᖅᑐᖅ ᐱᓕᕆᐊᒃᓴᑦ ᒪᓕᑦᑎᐊᕋᓗᐊᕐᒪᖔᑦ ᒪᓕᒋᐊᓕᖕᓂᒃ ᑖᔅᓱᒥᖓ ᑭᕙᓪᓕᕐᒥ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᒥᑦ.
ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕗᒻᒥ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎ
ᐊᑯᓐᓂᖏᓐᓂ 2004 ᐊᒻᒪ 2011, ᓄᓇᕗᒻᒥ ᐸᕐᓇᐃᔩᑦ ᐳᓚᕋᓚᐅᖅᑐᑦ ᐊᑕᖏᖅᖢᑎᒃ ᓄᓇᕗᒻᒥ ᓄᓇᓕᖏᓐᓄᑦ ᐃᓛᒃᑰᖓᔪᓂᑦ “ᐊᑐᖅᑕᐅᓂᕐᒧᑦ ᐊᒻᒪ ᐃᓄᖃᕐᓂᖓᓄᑦ ᓄᓇᙳᐊᓕᐅᕐᓂᕐᒥᑦ” ᐊᐱᖅᓱᖅᖢᑎᒃ ᓄᐊᑦᑎᓂᕐᒧᑦ ᑐᑭᓯᒋᐊᕈᑎᒃᓴᓂᑦ ᐱᖅᑯᓯᑐᖃᖅᑎᒍᑦ ᓄᓇᐅᑉ ᐊᑐᖅᑕᐅᖓᓄᑦ ᖃᓄᐃᓕᐅᕈᑎᓂᑦ “ᐃᓅᓂᕐᒥᓂ ᐃᖅᑲᐅᒪᔭᒥᓂ.” ᑖᓐᓇ ᓄᓇᓕᖕᒧᑦ ᓄᓇᒥᒃ ᐊᑐᕐᓂᕐᒧᑦ ᑐᑭᓯᒋᐊᕈᑎᒃᓴᑦ ᐃᓚᓕᐅᑎᓯᒪᔪᑦ ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎᒥᑦ ᐊᒻᒪ ᐊᑐᖅᑕᐅᓯᒪᔪᖅ ᐃᑲᔪᖅᓱᐃᓂᕐᒥᑦ ᐃᓱᒪᓕᐅᕆᓂᕐᒥᑦ.
ᑲᒥᓴᒃᑯᑦ ᐳᓚᕋᓚᐅᕐᒥᔪᑦ ᓄᓇᓕᐅᔪᒥᑦ ᐅᑦᑑᐱᕆ 31−ᒥᑦ ᓄᕕᐱᕆ 1−ᒧᑦ, 2013 ᓄᓇᓕᖕᓂ ᐃᓚᐅᑎᑦᑎᓂᕐᒥᑦ ᑲᑎᒪᓂᕐᒧᑦ ᑎᑎᕋᖅᑕᐅᕐᖓᖅᓯᒪᔪᒧᑦ ᐸᕐᓇᐅᑎᒧᑦ.
ᑐᑭᓯᒋᐊᕈᑎᒃᓴᑦ ᓴᖅᑮᓚᐅᖅᑐᑦ ᐊᒻᒪᓗ ᑐᓂᔭᐅᓪᓗᑎᒃ ᐱᖃᑕᐅᔪᓂᑦ ᑲᖏᖅᖠᓂᕐᒥᑦ ᒪᓕᑦᑎᐊᖅᖢᑎᒃ ᓄᓇᕗᒻᒥ ᐸᕐᓇᐃᔩᑦ ᐃᓚᐅᑎᑦᑎᓂᒃᑯᑦ ᐸᕐᓇᐅᑎᖓᓂ. ᓇᐃᓈᖅᓯᒪᔪᖅ ᐅᓂᒃᑳᓕᐊᑦ ᓄᓇᓕᖕᓂ ᑲᑎᒪᓂᕐᒧᑦ ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕗᒻᒥ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᒧᑦ ᐅᑐᐱᕆ 31−ᒥᑦ ᓄᕕᐱᕆ 1−ᒧᑦ, 2013, ᑲᖏᖅᖠᓂᕐᒥ ᑕᑯᔭᐅᒍᓐᓇᖅᑐᑦ ᐊᑖᓂ.
ᓄᓇᓕᐅᑉ ᑕᑯᓐᓈᖅᑕᖏᑦ ᐊᒻᒪ ᐅᖃᐅᓯᒃᓴᖏᑦ ᐃᑲᔪᕐᔪᐊᖅᓯᒪᔪᑦ ᑲᔪᓯᔪᒥᑦ ᐱᓕᕆᓂᐅᔪᒥᑦ ᐱᕙᓪᓕᐊᑎᑦᑎᓂᕐᒥᑦ ᐊᒻᒪ ᐋᖅᑭᒋᐊᖅᓯᓂᕐᒥᑦ ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕗᒻᒥ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᒥᑦ. ᐱᓗᐊᙳᐊᖅᑐᒥᑦ, ᐃᓂᓕᒫᖏᑦ ᐱᒻᒪᕆᐅᒋᔭᐅᔪᑦ ᓇᓗᓇᐃᖅᑕᐅᔪᑦ ᓄᓇᓕᖕᒧᑦ ᐃᓚᓕᐅᑎᓯᒪᔪᑦ ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎᒥᑦ “ᓄᓇᓕᐅᑉ ᓯᕗᓪᓕᐅᔾᔨᖁᔭᖏᑦ ᐊᒻᒪ ᐱᒻᒪᕆᐅᒋᔭᖏᑦ.”