ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᐱᓇᓱᒋᐊᖃᕐᒪᑦ ᐊᑖᒍᑦ ᑎᑎᕋᖅᓯᒪᔪᖅ 11 ᑕᐃᑲᓂ ᓄᓇᕗᒻᒥ ᐊᖏᕈᑎᖕᒥᑦ ᐱᕙᓪᓕᐊᑎᑦᑎᓂᕐᒥᑦ, ᐊᑐᓕᖅᑎᑦᑎᓂᕐᒥᑦ ᐊᒻᒪ ᖃᐅᔨᓴᕐᕐᓂᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂᑦ.
ᐱᔾᔪᑎᒋᔭᖓ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᐅᑉ, ᓇᓗᓇᐃᖅᓯᒪᔪᖅ ᑎᑎᕋᖅᓯᒪᔪᖅ 11.3.2 ᓄᓇᕗᒻᒥ ᐊᖏᕈᑎᖕᒥᑦ “ᓴᐳᔾᔨᓂᕐᒥᑦ ᐊᒻᒪ ᖁᕝᕙᒃᓴᐃᓂᕐᒥᑦ ᐱᑕᖃᖅᐸᒌᖅᑐᓂᑦ ᐊᒻᒪ ᓯᕗᓂᒃᓴᒥᑦ ᖃᓄᐃᙱᑦᑎᐊᕐᓂᕆᔭᖏᓐᓂᒃ ᐃᓄᖁᑎᒋᔭᐅᔪᑦ ᐊᒻᒪ ᓄᓇᓖᑦ ᓄᓇᕗᒻᒥ ᓄᓇᑖᕆᔭᐅᓯᒪᔪᒥᑦ, ᐃᓱᒪᒋᖃᓯᐅᑎᓗᒋᑦ ᐱᔭᐅᒍᒪᔪᓕᒫᑦ ᑲᓇᑕᒥᐅᑦ, ᐊᒻᒪ ᓴᐳᔾᔨᓂᕐᒥᑦ, ᐊᒻᒪ ᑕᐃᒪᐃᒋᐊᖃᖅᑎᓪᓗᒍ, ᐅᑎᖅᑏᓂᕐᒥᑦ ᐊᕙᑎᐅᑉ ᐱᐅᓂᖓ ᓄᓇᕗᒻᒥ ᓄᓇᑖᕆᔭᐅᓯᒪᔪᒥᑦ.”
ᒪᓕᒐᑦ ᐊᐅᓚᑕᐅᔪᓐᓇᖅᑐᑦ
ᐊᑖᒍᑦ ᑎᑎᕋᖅᓯᒪᔪᖅ 11, ᑐᑭᖓ “ᓄᓇ” ᐃᓚᖃᖅᐳᖅ ᐃᒪᕐᒥᑦ ᐊᒻᒪ ᓄᓇᒥᙶᖅᑐᓂᒃ ᐆᒪᔪᓂᒡᓗ. ᑎᑎᕋᖅᓯᒪᔪᖅ ᑐᕌᖓᔪᖅ ᑕᒪᒃᑮᓐᓄᑦ ᓄᓇᒥ ᐊᒻᒪ ᑕᕆᐅᕐᒥᑦ ᑕᒡᕙᓂ ᓄᓇᕗᒻᒥ ᓄᓇᑖᕆᔭᐅᓯᒪᔪᒥᑦ ᐊᒻᒪ ᓯᓚᑖᓂ ᓯᑯᒧᑦ ᓄᓇᒨᖓᔪᒥᑦ ᑭᒡᓕᖓᓂ. ᓄᓇᒥ ᐊᑐᕐᓂᕐᒧᑦ ᐸᕐᓇᐅᑏᑦ ᐱᕙᓪᓕᐊᑕᐅᔪᑦ ᐱᔪᓐᓇᕐᓂᖃᕐᓂᒃᑯᑦ ᑲᒥᓴᒃᑯᓐᓂ ᑐᕌᖓᔪᑦ ᑕᐃᒪᓐᓄᑦ ᓄᓇᒥ ᐊᑐᕐᓂᕐᒧᑦ ᖃᓄᐃᓕᐅᕈᑕᐅᔪᓄᑦ ᑭᖕ ᓄᓇᖓᓂ, ᐃᓄᖕᓄᑦ ᓇᖕᒥᓂᕆᔭᐅᔪᓄᑦ ᓄᓇᒥ ᐅᕝᕙᓘᓐᓃᑦ ᐊᓯᖏᑦ ᓇᖕᒥᓂᕆᔭᐅᔪᓂᑦ ᑎᒍᒥᐊᖅᑕᐅᔪᓂᑦ ᓄᓇᓂ. ᐱᕙᓪᓕᐊᑎᑦᑎᓂᕐᒥᑦ ᓄᓇᓕᖕᓂᑦ ᐸᕐᓇᐅᑎᓂᑦ ᐱᔭᒃᓴᕆᔭᐅᕗᖅ ᓄᓇᓖᑦ ᒐᕙᒪᖏᓐᓄᑦ. ᑐᑭᓯᓇᖅᓯᑎᑦᑎᓂᕐᒧᑦ, ᐸᕐᓇᐅᑏᑦ ᑐᕌᖓᖏᑦᑐᑦ, ᐅᕝᕙᓘᓐᓃᑦ ᑕᐃᑲᓂ, ᑭᒡᓕᒋᔭᐅᔪᓂᑦ ᑲᓇᑕᒥ ᒥᕐᖑᐃᖅᓯᕐᕕᓐᓂᑦ, ᑲᓇᑕᒥ ᐃᓂᒋᔭᐅᔪᑐᖃᕐᓂᒃ ᒥᕐᖑᐃᖅᓯᕐᕕᖕᓂᑦ ᐅᕝᕙᓘᓐᓃᑦ ᑲᓇᑕᒥ ᐃᓂᒋᔭᐅᔪᑐᖃᕐᓂᒃ ᑲᒪᒋᔭᐅᔪᓂᑦ ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥᒃᑯᓐᓄᑦ, ᐅᕝᕙᓘᓐᓃᑦ ᓄᓇᕗᒻᒥ ᒥᕐᖑᐃᖅᓯᕐᕕᓕᕆᔨᒃᑯᑦ ᐋᖅᑭᒃᓱᖅᓯᒪᓕᖅᑎᓪᓗᒋᑦ.
ᐊᑐᓕᖅᑎᑦᑎᓂᖅ
ᓄᓇᒥ ᐊᑐᕐᓂᕐᒧᑦ ᐸᕐᓇᐅᑏᑦ ᐱᔪᓐᓇᕐᓂᖃᖅᑐᑦ ᑐᑭᒧᐊᒃᑎᑦᑎᓂᕐᒥᑦ ᓄᓇᒥᙶᖅᑐᓂᑦ ᐊᑐᕐᓂᕐᒥᑦ ᐊᒻᒪ ᐱᕙᓪᓕᐊᑎᑦᑎᓂᕐᒥᑦ ᒪᓕᒋᐊᖃᖅᑐᖃᕐᓗᓂ ᑕᒪᐃᓐᓄᑦ ᒐᕙᒪᑐᖃᒃᑯᑦ ᐊᒻᒪ ᐅᑭᐅᖅᑕᖅᑐᒥᑦ ᒐᕙᒪᐃᑦ ᐱᓕᕆᕝᕕᖏᑦ ᐊᒻᒪ ᑐᑦᑕᕐᕕᖏᑦ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ, ᓄᓇᕗᒻᒥ ᐃᒪᓕᕆᔨᒃᑯᑦ ᑲᑎᒪᔨᖏᑦ, ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᒻᒪ ᐃᓄᐃᑦ ᑲᑐᔾᔨᖃᑎᒌᑦ ᐊᐅᓚᑦᑎᓂᕐᒧᑦ ᖃᓄᐃᓕᐅᕈᑎᖏᓐᓂᒃ ᑐᕌᖓᔪᓂᑦ ᐊᐅᓚᑦᑎᓂᕐᒧᑦ, ᒪᓕᒐᕐᓄᑦ, ᐊᒻᒪ ᐊᑐᕐᓂᕐᒧᑦ ᓄᓇᒥ ᒪᓕᑦᑎᐊᕐᓗᑎᒃ ᐊᑐᕆᐊᓕᖕᓂᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂᑦ, ᐱᓇᓱᐊᖅᑕᖏᓐᓂᒃ ᐊᒻᒪ ᒪᓕᒐᑦ ᐊᐅᓚᑕᐅᔪᓐᓇᖅᑐᓄᑦ ᐱᔭᒃᓴᕆᔭᐅᔪᓂᑦ. ᐸᕐᓇᐅᑎᐅᑉ ᐱᕙᓪᓕᐊᑎᑕᐅᓂᖓ ᐊᒻᒪ ᐊᑐᓕᖅᑎᑦᑎᓂᕐᒥᑦ ᐱᖃᑕᐅᑦᑎᐊᕆᐊᓖᑦ ᑕᒪᒃᑮᒃ ᐃᓄᐃᑦ ᐊᒻᒪ ᒐᕙᒪᒃᑯᑦ ᒪᓕᑦᑎᐊᕆᐊᓖᑦ ᐱᓪᓚᑦᑖᖑᒐᓗᐊᕐᒪᖔᑦ ᐊᒻᒪ ᓈᒻᒪᒃᑲᓗᐊᕐᒪᖔᑦ.
ᓄᓇᒥ ᐊᑐᕐᓂᕐᒧᑦ ᐸᕐᓇᐅᑏᑦ ᐊᑐᓕᖅᑎᑕᐅᓲᑦ ᑐᙵᕕᖃᖅᖢᑎᒃ ᒪᓕᒐᕐᓂᒃ ᐊᐅᓚᑕᐅᔪᓐᓇᖅᑐᓄᑦ ᐱᔭᒃᓴᕆᔭᐅᔪᓂᑦ. ᑕᒪᐃᓐᓂᒃ ᒐᕙᒪᑐᖃᒃᑯᑦ ᐊᒻᒪ ᐅᑭᐅᖅᑕᖅᑐᒥᑦ ᒐᕙᒪᒃᑯᑦ ᐱᓕᕆᕝᕕᖏᑦ ᑐᑦᑕᕐᕕᖏᓪᓗ ᐱᓕᕆᐊᖃᓲᑦ ᖃᓄᐃᓕᐅᕈᑎᒃᓴᖏᓐᓂᒃ ᒪᓕᑦᑎᐊᖅᖢᑎᒃ ᐊᖏᖅᑕᐅᓯᒪᔪᓂᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂᑦ. ᐊᑐᓕᖅᑎᑦᑎᓂᕐᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒥᑦ ᑎᑭᐅᒪᔭᐅᓲᖑᖕᒥᔪᖅ ᑖᒃᑯᓄᖓ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᓐᓄᑦ (NPC), ᕿᒥᕐᕈᓲᑦ ᑐᒃᓯᕋᐅᑎᓕᒫᓂᑦ ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᓂᑦ ᓇᓗᓇᐃᖅᓯᓂᕐᒥᑦ ᒪᓕᑦᑎᐊᕋᓗᐊᕐᒪᖔᑦ ᐸᕐᓇᐅᑎᓂᑦ. ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᑦ ᒪᓕᑦᑎᐊᙱᑦᑐᑦ ᐸᕐᓇᐅᑎᓂᑦ ᐱᕙᓪᓕᐊᑎᑕᐅᔾᔮᙱᑦᑐᑦ ᒪᓕᒐᓕᕆᓂᕐᒧᑦ ᐋᖅᑭᒃᓱᖅᓯᒪᔪᒥᑦ ᑭᓯᐊᓂ ᒥᓂᔅᑕ ᑭᑭᑦᑎᒍᓂ ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᒥᑦ ᒪᓕᑦᑎᐊᕆᐊᖃᕐᓂᕐᒥᑦ ᐊᖏᖅᑕᐅᓯᒪᔪᒥᑦ ᐸᕐᓇᐅᑎᒥᑦ. ᐱᓕᕆᐊᒃᓴᓄᑦ ᑐᒃᓯᕌᖑᓯᒪᔪᑦ ᒪᓕᑦᑎᐊᖅᑎᓪᓗᒋᑦ ᐸᕐᓇᐅᑎᓂᑦ, ᑐᒃᓯᕌᖑᓯᒪᔪᖅ (ᑖᒃᑯᐊᓗ ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᒪᓕᑦᑎᐊᕐᓂᕐᒧᑦ ᓇᓗᓇᐃᖅᓯᓂᖏᑦ ᐊᒻᒪ ᐊᑐᓕᖁᔭᖏᓐᓂᒃ) ᑲᔪᓯᑎᑕᐅᓲᖅ ᑭᖑᓪᓕᕐᒧᑦ ᖁᑦᑎᖕᓂᖅᓴᒧᑦ ᒪᓕᒐᓕᕆᓂᕐᒧᑦ ᐋᖅᑭᒃᓱᖅᓯᒪᔪᒥᑦ.
ᐱᑕᖃᖅᐸᒌᖅᑐᑦ ᐊᕕᒃᑐᖅᓯᒪᔪᓂᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑏᑦ
ᒪᕐᕉᖕᓂᒃ ᐊᕕᒃᑐᖅᓯᒪᔫᖕᓂᒃ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᑕᖃᖅᑐᖅ ᒫᓐᓇᐅᔪᖅ ᐊᑐᖅᑐᓂᑦ: ᕿᑭᖅᑕᓂ ᐅᐊᖕᓇᖓᓂ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ (NBRLUP) ᐊᒻᒪ ᑭᕙᓪᓕᕐᒥ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ (KRLUP). ᑖᒃᑯᐊ ᐊᖏᖅᑕᐅᓯᒪᔪᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑏᑦ ᐃᑲᔫᑕᐅᓲᑦ ᐊᒻᒪ ᑐᑭᒧᐊᕈᑕᐅᓲᑦ ᐸᐸᑦᑎᑦᑎᐊᕐᓂᕐᒧᑦ, ᐱᕙᓪᓕᐊᑎᑦᑎᓂᕐᒥᑦ ᐊᒻᒪ ᐊᑐᑦᑎᐊᕐᓂᕐᒥᑦ ᓄᓇᒥ ᐸᕐᓇᐃᓂᕐᒧᑦ ᐊᕕᒃᑐᖅᓯᒪᔪᓂᑦ.
ᑕᒪᒃᑮᒃ ᑭᕙᓪᓕᕐᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ ᐊᒻᒪ ᕿᑭᖅᑕᓂ ᐅᐊᖕᓇᖓᓂ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ ᐊᑐᐃᓐᓇᐅᑎᑦᑎᔫᒃ ᐋᖅᑭᒃᓱᖅᓯᒪᔪᒥᑦ ᐃᑲᔪᖅᓱᖅᑐᒥᑦ ᖃᓄᐃᙱᑦᑎᐊᕐᓂᕆᔭᖏᓐᓂᒃ ᐃᓄᖁᑎᖏᓐᓂᒃ, ᐊᒻᒪ ᐊᕙᑎᖓᓂ. ᐃᓚᖃᖅᐳᑦ ᖃᓄᐃᓕᐅᕈᑎᓂᑦ, ᐊᑐᓕᖁᔭᐅᔪᓂᑦ ᐊᒻᒪ ᒪᓕᒋᐊᓕᖕᓂᑦ ᑐᑭᒧᐊᕈᑕᐅᔪᓂᑦ ᓄᓇᒥ ᐊᒻᒪ ᓄᓇᒥᙶᖅᑐᓂᑦ ᐊᑐᕐᓂᕐᒥᑦ ᐊᕕᒃᑐᖅᓯᒪᔪᒥᑦ ᒪᓕᓪᓗᒋᑦ ᑐᙵᕕᐅᔪᑦ ᓄᓇᕗᒻᒥ ᐊᖏᕈᑎᖓᓂ.
ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕘᓕᒫᒧᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ
ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᐱᕙᓪᓕᐊᑎᑦᑎᕙᓪᓕᐊᔪᑦ ᓄᓇᕘᓕᒫᒧᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒥᑦ. ᐊᖏᖅᑕᐅᓯᒪᓕᖅᐸᑦ, ᐃᓇᖏᖅᓯᓂᐊᖅᑐᖅ ᕿᑭᖅᑖᓗᒃ ᐅᐊᖕᓇᖓᓂ ᐊᒻᒪ ᑭᕙᓪᓕᕐᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂᑦ ᐊᒻᒪ ᑐᑭᒧᐊᕈᑕᐅᓗᓂ ᐃᑲᔫᑎᒃᓴᓂᑦ ᐊᑐᕐᓂᕐᒧᑦ ᐊᒻᒪ ᐱᕙᓪᓕᐊᑎᑦᑎᓂᕐᒥᑦ ᓄᓇᕗᒻᒥ.