ᓴᓂᑭᓗᐊᖅ ᑖᕙᓃᑦᑐᖅ ᓴᓂᑭᓗᐊᑉ ᕿᑭᖅᑕᖏᓐᓂᒃ ᑲᖏᖅᓱᐊᓘᑉ ᐃᓗᐊᓂ ᐊᒻᒪᓗ ᓂᒋᐊᓃᓐᓂᖅᐹᖑᔪᖅ ᓄᓇᓕᐅᔪᓂᑦ ᓄᓇᕗᒻᒥ. ᓴᓂᑭᓗᐊᑉ ᕿᑭᖅᑕᖏᑦ ᐊᒥᓱᓂᑦ ᕿᑭᖅᑕᐅᖃᑕᐅᔪᑦ ᑕᒫᓂᐸᓗᒃ 1,500 ᕿᑭᑕᓂᑦ ᐆᒪᔪᖃᕐᕕᐅᔪᑦ ᐱᒻᒪᕆᐅᓪᓗᑎᒃ ᐊᒥᓱᓂᑦ ᐆᒪᔪᓄᑦ ᒥᑎᕐᓄᑦ ᐊᒻᒪᓗ ᓂᕐᓕᓄᑦ.
ᓴᓂᑭᓗᐊᖅ ᐊᑐᐃᓐᓇᐅᑎᑦᑎᓲᖅ ᐊᔾᔨᒌᙱᑦᑐᓂᑦ ᓯᓚᒥᑦ ᖃᓄᐃᓕᐅᕈᑎᓂᑦ ᓲᕐᓗ ᑕᕆᐅᕐᒥᑦ ᖃᔭᖅᑐᕐᓂᕐᒥᑦ, ᑲᓅᓂᕐᒥᑦ, ᐳᓱᔪᖕᓂᕐᒥᑦ, ᓯᐊᕐᕈᔭᐅᑎᑯᑖᒃᑯᑦ ᓄᓇᒃᑰᕐᓂᕐᒥᑦ, ᐊᖑᓇᓱᖕᓂᕐᒥᑦ, ᐊᒻᒪᓗ ᐃᖃᓗᒐᓱᖕᓂᕐᒥᑦ. ᑎᖕᒥᐊᓂᑦ ᑕᑯᔭᖅᑐᑎᑕᐃᒐᔪᓲᑦ ᐊᒻᒪ ᓄᓇᓕᖕᒥᑦ ᐊᐅᓪᓚᕈᔾᔨᔩᑦ ᓱᓇᒃᑯᑖᖃᑦᑎᐊᖅᑐᑦ ᐅᒥᐊᒃᑯᑦ, ᖃᔭᒃᑯᑦ, ᐊᒻᒪ ᖃᒧᑕᐅᔭᒃᑯᑦ ᐊᐅᓚᕐᓂᕐᒧᑦ, ᐊᕐᕌᒍᓕᒫᒥᓪᓗ ᓯᓂᑦᑕᕆᐊᕐᓂᕐᒧᑦ ᑐᐱᕐᓂᒃ ᐅᕝᕙᓘᓐᓃᑦ ᐃᒡᓗᕕᒐᕐᓂᒃ.
ᓄᓇᓕᐅᔪᖅ ᖃᐅᔨᒪᔭᐅᔪᖅ ᓴᓇᖃᑦᑕᕐᓂᖏᓐᓂᒃ ᐴᖃᐅᑎᓂᑦ ᐊᒻᒪᓗ ᓴᓇᙳᐊᒐᕐᓂᒃ ᓴᓂᑭᓗᐊᕐᒥᑦ ᓄᓇᕐᔪᐊᕐᒥᑦ ᖃᐅᔨᒪᔭᐅᔪᑦ ᐊᔾᔨᐅᙱᑦᑐᓂᑦ ᓴᓇᙳᐊᒐᖏᓐᓄᑦ ᓄᓇᓕᖕᒥᑦ ᓴᓇᙳᐊᒐᒃᓴᓂᑦ.
ᓄᓇᒥᒃ ᐊᑐᕐᓂᕐᒧᑦ ᐸᕐᓇᐃᓂᖅ
ᐊᖏᖅᑕᐅᔪᖅ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎ
ᓄᓇᓕᐅᔪᖅ ᐸᓐᓂᖅᑑᖅ ᐱᖃᙱᑦᑐᖅ ᓱᓕ ᐊᖏᖅᑕᐅᓯᒪᔪᒥᑦ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᒥᑦ.
ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕗᒻᒥ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎ
ᐊᑯᓐᓂᖏᓐᓂ 2004 ᐊᒻᒪ 2011, ᓄᓇᕗᒻᒥ ᐸᕐᓇᐃᔩᑦ ᐳᓚᕋᓚᐅᖅᑐᑦ ᐊᑕᖏᖅᖢᑎᒃ ᓄᓇᕗᒻᒥ ᓄᓇᓕᖏᓐᓄᑦ ᐃᓛᒃᑰᖓᔪᓂᑦ “ᐊᑐᖅᑕᐅᓂᕐᒧᑦ ᐊᒻᒪ ᐃᓄᖃᕐᓂᖓᓄᑦ ᓄᓇᙳᐊᓕᐅᕐᓂᕐᒥᑦ” ᐊᐱᖅᓱᖅᖢᑎᒃ ᓄᐊᑦᑎᓂᕐᒧᑦ ᑐᑭᓯᒋᐊᕈᑎᒃᓴᓂᑦ ᐱᖅᑯᓯᑐᖃᖅᑎᒍᑦ ᓄᓇᐅᑉ ᐊᑐᖅᑕᐅᖓᓄᑦ ᖃᓄᐃᓕᐅᕈᑎᓂᑦ “ᐃᓅᓂᕐᒥᓂ ᐃᖅᑲᐅᒪᔭᒥᓂ.” ᑖᓐᓇ ᓄᓇᓕᖕᒧᑦ ᓄᓇᒥᒃ ᐊᑐᕐᓂᕐᒧᑦ ᑐᑭᓯᒋᐊᕈᑎᒃᓴᑦ ᐃᓚᓕᐅᑎᓯᒪᔪᑦ ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎᒥᑦ ᐊᒻᒪ ᐊᑐᖅᑕᐅᓯᒪᔪᖅ ᐃᑲᔪᖅᓱᐃᓂᕐᒥᑦ ᐃᓱᒪᓕᐅᕆᓂᕐᒥᑦ.
ᑲᒥᓴᒃᑯᑦ ᐳᓚᕋᓚᐅᕐᒥᔪᑦ ᓄᓇᓕᐅᔪᒥᑦ ᒪᐃ 7-8, 2013, ᓄᓇᓕᖕᓂ ᐃᓚᐅᑎᑦᑎᓂᕐᒥᑦ ᑲᑎᒪᓂᕐᒧᑦ ᑎᑎᕋᖅᑕᐅᕐᖓᖅᓯᒪᔪᒧᑦ ᐸᕐᓇᐅᑎᒧᑦ.
ᑐᑭᓯᒋᐊᕈᑎᒃᓴᑦ ᓴᖅᑮᓚᐅᖅᑐᑦ ᐊᒻᒪᓗ ᑐᓂᔭᐅᓪᓗᑎᒃ ᐱᖃᑕᐅᔪᓂᑦ ᓴᓂᑭᓗᐊᕐᒥᑦ ᒪᓕᑦᑎᐊᖅᖢᑎᒃ ᓄᓇᕗᒻᒥ ᐸᕐᓇᐃᔩᑦ ᐃᓚᐅᑎᑦᑎᓂᒃᑯᑦ ᐸᕐᓇᐅᑎᖓᓂ. ᓇᐃᓈᖅᓯᒪᔪᖅ ᐅᓂᒃᑳᓕᐊᑦ ᓄᓇᓕᖕᓂ ᑲᑎᒪᓂᕐᒧᑦ ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕗᒻᒥ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᒧᑦ ᒪᐃ 7-8, 2013 ᓴᓂᑭᓗᐊᕐᒥ ᑕᑯᔭᐅᒍᓐᓇᖅᑐᑦ ᐊᑖᓂ.
ᓄᓇᓕᐅᑉ ᑕᑯᓐᓈᖅᑕᖏᑦ ᐊᒻᒪ ᐅᖃᐅᓯᒃᓴᖏᑦ ᐃᑲᔪᕐᔪᐊᖅᓯᒪᔪᑦ ᑲᔪᓯᔪᒥᑦ ᐱᓕᕆᓂᐅᔪᒥᑦ ᐱᕙᓪᓕᐊᑎᑦᑎᓂᕐᒥᑦ ᐊᒻᒪ ᐋᖅᑭᒋᐊᖅᓯᓂᕐᒥᑦ ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕗᒻᒥ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᒥᑦ. ᐱᓗᐊᙳᐊᖅᑐᒥᑦ, ᐃᓂᓕᒫᖏᑦ ᐱᒻᒪᕆᐅᒋᔭᐅᔪᑦ ᓇᓗᓇᐃᖅᑕᐅᔪᑦ ᓄᓇᓕᖕᒧᑦ ᐃᓚᓕᐅᑎᓯᒪᔪᑦ ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎᒥᑦ “ᓄᓇᓕᐅᑉ ᓯᕗᓪᓕᐅᔾᔨᖁᔭᖏᑦ ᐊᒻᒪ ᐱᒻᒪᕆᐅᒋᔭᖏᑦ.”