ᓄᓇᕗᒻᒥ ᐸᕐᓇᐃᔩᑦ ᑲᒥᓴᖓᑦ ᐅᖃᖃᑎᖃᖅᓯᒪᔪᑦ ᐸᕐᓇᐃᓂᕐᒧᑦ ᑲᑐᔾᔨᖃᑎᒌᔭᐅᔪᓂᑦ ᑕᐃᒪᙵᓂ 2007-ᒥᑦ ᐱᕙᓪᓕᐊᑎᑦᑎᓂᕐᒥᑦ ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕗᒻᒥ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒥᑦ. ᑎᑭᖦᖢᒍ 2017 ᖃᕆᑕᐅᔭᒃᑯᑦ ᐅᖃᖃᑎᒌᖕᓂᕐᒧᑦ ᑎᑎᕋᖅᓯᒪᔪᒥᑦ ᐱᓯᒪᑦᑎᓚᐅᖅᑐᑦ ᑖᔅᓱᒧᖓ ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕗᒻᒥ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ ᐱᓕᕆᔾᔪᓯᐊᓄᑦ. ᐱᔾᔪᑎᒋᓪᓗᒍ ᐃᓚᖓ 201 (1) ᑕᐃᑲᙵᑦ ᓄᓇᕗᒻᒥ ᐸᕐᓇᐃᓂᕐᒧᑦ ᐊᒻᒪ ᐱᓕᕆᐊᒃᓴᓂᑦ ᖃᐅᔨᓴᕐᓂᕐᒧᑦ ᐱᖁᔭᖅ, ᑲᒥᓴᒃᑯᑦ ᐱᓇᓱᐊᒐᖃᖅᑐᑦ ᐃᓄᓕᒫᓄᑦ ᐊᑎᓕᐅᕐᕕᖃᕐᓂᕐᒥᑦ, ᐊᑐᐃᓐᓇᐅᓗᓂ ᐃᓄᓕᒫᓄᑦ ᑐᕌᖓᔪᓕᒫᑦ ᑎᑎᖅᑲᑦ, ᑕᐃᒃᑯᐊᓗ ᑐᕌᖓᔪᑦ ᓄᓇᕗᒻᒥ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒧᑦ. ᑲᒥᓴᒃᑯᑦ ᐃᓄᓕᒫᓄᑦ ᐊᑎᓕᐅᕐᕕᖓ ᐃᓇᖏᖅᓯᓯᒪᔪᖅ ᐅᖃᖃᑎᒌᖕᓂᕐᒧᑦ ᑎᑎᖅᑲᕐᒥᑦ; ᑭᓯᐊᓂ, ᑐᖅᑯᖅᑕᐅᓯᒪᔪᖃᖅᑐᖅ ᑖᒃᑯᓄᖓ 2007-2017. ᐅᖃᖃᑎᒌᖕᓂᕐᒧᑦ ᑎᑎᕋᖅᓯᒪᔪᑦ ᑕᑯᔭᐅᒍᓐᓇᖅᑐᖅ ᐊᑖᓂ ᑎᑎᕋᑯᑖᖅᓯᒪᓪᓗᓂ. ᓱᓇᒃᑯᑖᓕᒫᑦ ᑐᕌᖓᔪᑦ ᐱᕙᓪᓕᐊᑎᑦᑎᓂᕐᒥᑦ ᓄᓇᕗᒻᒥ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᒥᑦ ᒫᓐᓇᐅᔪᖅ ᐊᑐᐃᓐᓇᐅᓕᖅᑐᑦ ᐃᓄᓕᒫᓄᑦ ᐊᑎᓕᐅᕐᕕᖕᒥᑦ.
ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕗᒻᒥ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ ᖃᖓᒃᑰᕐᓂᖓ: ᑭᓱᓂᑦ ᐊᓂᒍᐃᓯᒪᑦᑎᐊᖃᑎᒌᖕᒪᖔᑦᑕ ᐅᓪᓗᒥᒧᑦ:
2006-2007
ᐱᕙᓪᓕᐊᑎᑦᑎᓂᕐᒥᑦ ᐊᖏᓂᖅᓴᒥᑦ ᐸᕐᓇᐃᓂᕐᒧᑦ ᐊᑐᐊᒐᕐᓂᒃ, ᐱᓕᕆᔭᐅᔪᒪᔪᑦ ᐊᒻᒪ ᑐᕌᖅᑕᐅᔪᑦ ᑖᔅᓱᒧᖓ ᐸᕐᓇᐅᑎᒧᑦ ᑕᐃᒪᐃᒋᐊᖃᖅᓯᒪᖕᒪᑦ ᐊᖏᖃᑎᒌᒃᑯᑦ ᑎᑎᕋᖅᓯᒪᔪᖅ 11.4.1(a) ᑲᑐᔾᔨᖃᑎᖃᕐᓗᑎᒃ ᑲᓇᑕᒥ, ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᓄᓇᕗᑦ ᑐᙵᕕᒃᑯᓐᓂ. ᐊᖏᖅᑕᐅᔪᖅ ᓄᕕᐱᕆ 2007.
ᔪᓚᐃ 2007 – ᔮᓄᐊᕆ 2008
ᑲᒥᓴᒃᑯᑦ ᐱᓕᕆᖃᑎᖃᓚᐅᖅᑐᑦ ᓄᓇᓕᖕᓂᑦ, ᐱᓕᕆᕝᕕᖕᓂᑦ ᐃᓄᓕᒫᓄᑦ ᒐᕙᒪᓂᑦ, ᑎᒃᑭᐊᖅᑕᐅᓯᒪᔪᓂᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᒐᕙᒪᓂᑦ ᐊᒻᒪ ᓴᓇᔪᓕᕆᔩᑦ ᓇᓗᓇᐃᖅᓯᓂᕐᒥᑦ ᑕᑯᓐᓇᖅᑕᐅᔪᒥᑦ, ᑐᕌᒐᕆᔭᐅᔪᓂᑦ ᐊᒻᒪᓗ ᓯᕗᓪᓕᐅᔾᔭᐅᔭᕆᐊᓕᖕᓂᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓄᑦ ᐊᑲᐅᙱᓕᐅᕈᑕᐅᔪᓂᑦ ᑲᒪᒋᔭᐅᔭᕆᐊᓕᖕᓂᑦ ᐸᕐᓇᐃᓂᕐᒧᑦ ᐱᓕᕆᓂᒃᑯᑦ.
2008
ᑲᒥᓴᒃᑯᑦ ᐱᓕᕆᓚᐅᖅᑐᑦ ᐊᑐᖅᑕᐅᓂᑰᔪᓂᑦ ᖃᐅᔨᓴᕐᓂᕐᒥᑦ ᐃᓚᖃᖅᖢᓂ ᐱᕙᒌᔭᐃᓂᕐᒥᑦ ᐆᒪᔪᖃᕐᕕᖕᒧᑦ, ᐃᓅᓯᕐᒧᑦ ᖃᓄᐃᑦᑑᓂᖏᓐᓄᑦ ᐊᒻᒪ ᑮᓇᐅᔾᔭᒃᓴᕐᓂᕐᒧᑦ ᖃᐅᔨᓴᕐᓂᕐᒧᑦ ᐅᓂᒃᑳᓕᐊᓂᑦ.
ᔮᓐᓄᐊᕆ 2009 – ᒫᑦᓯ 2010
ᑲᒥᓴᒃᑯᑦ ᓇᓗᓇᐃᖅᓯᓚᐅᖅᑐᑦ ᐊᑲᐅᙱᓕᐅᕈᑕᐅᔪᓂᑦ ᐊᒻᒪ ᓯᕗᓪᓕᐅᔾᔭᐅᔭᕆᐊᓕᖕᓂᑦ ᐸᕐᓇᐃᓂᕐᒧᑦ ᑲᑐᔾᔨᖃᑎᒌᔭᐅᔪᓂᑦ ᓇᓗᓇᐃᖅᓯᓂᕐᒥᑦ ᐅᖃᐅᓯᒃᓴᓂᑦ ᓯᕗᓪᓕᖅᐹᖅᓯᐅᑎᒧᑦ ᐸᕐᓇᐅᑎᒧᑦ.
ᒫᑦᓯ 2010 – ᒪᐃ 2010
ᑲᒥᓴᒃᑯᑦ ᐱᔭᕆᐊᑐᓂᖓᓄᑦ ᑲᑎᒪᑎᑦᑎᓚᐅᖅᑐᑦ ᐅᖃᐅᓯᖃᕐᓂᕐᒧᑦ ᐃᓗᓕᖏᓐᓄᑦ ᑎᑎᕋᖅᑕᐅᕐᖓᖅᓯᒪᔪᒧᑦ ᐸᕐᓇᐅᑎᒧᑦ.
ᒫᑦᓯ 2010 – ᔪᓚᐃ 2010
ᑲᒥᓴᒃᑯᑦ ᑐᓐᓂᖅᓴᐅᓚᐅᖅᑐᑦ ᓯᕗᓪᓕᐅᔾᔭᐅᔭᕆᐊᓕᖕᓂᑦ ᐃᓂᒋᔭᐅᔪᓂᑦ ᓄᓇᙳᐊᕐᓂᑦ ᐃᒡᓗᖃᖅᑎᑕᐅᔪᓕᒫᓄᑦ ᓄᓇᕗᒻᒥ ᑐᓴᕐᕕᐅᔪᒪᓪᓗᑎᒃ ᐃᓂᐅᔪᓂᑦ ᓇᓗᓇᐃᖅᑕᐅᓯᒪᔪᓂᑦ ᐃᓱᒪᒋᔭᐅᖃᓯᐅᑎᒋᐊᖃᖅᑐᓂᑦ ᑖᔅᓱᒧᖓ ᐸᕐᓇᐅᑎᒧᑦ.
ᒫᑦᓯ 2010 – ᓯᑎᐱᕆ 2011
ᑲᒥᓴᒃᑯᑦ ᑲᔪᓯᓚᐅᖅᑐᑦ ᑐᕌᒐᖃᕐᓂᕐᒥᑦ ᐊᔾᔨᒌᙱᑦᑐᓂᑦ ᐃᓗᓕᖏᓐᓂᑦ ᐱᓕᕆᐊᖑᕙᓪᓕᐊᔪᒥᑦ ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎᒥᑦ.
ᓯᑎᐱᕆ 2011 – ᔫᓂ 2012
ᐃᓛᒃᑰᖓᔪᖅ ᐱᖓᔪᖓᓂᙶᖅᑐᖅ ᐱᓕᕆᔩᑦ ᕿᒥᕐᕈᓂᖓ ᐸᕐᓇᐃᓂᕐᒧᑦ ᐱᓕᕆᓂᒃᑯᑦ ᑲᒪᒋᔭᐅᓗᓂ ᑲᓇᑕᒧᑦ, ᓄᓇᕗᑦ ᒐᕙᒪᒃᑯᑦ ᐊᒻᒪᓗ ᓄᓇᕗᑦ ᑐᙵᕕᒃᑯᓐᓄᑦ ᑲᔪᓯᑎᑕᐅᓚᐅᖅᑐᖅ.
ᓯᑎᐱᕆ 2012
2012 ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎ ᐊᒻᒪ 2012 ᓇᓖᕋᕈᑎᒃᓴᑦ ᐊᒻᒪ ᐊᑐᓕᖁᔭᐅᔪᑦ ᓴᖅᑭᑕᐅᔪᑦ.
ᐅᑐᐱᕆ 2012 – ᐄᐳᓗ 2014
ᑲᒥᓴᒃᑯᑦ ᑐᓴᕈᒪᓚᐅᖅᑐᑦ 2012 ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎᒥᑦ ᑎᑎᕋᖅᓯᒪᔪᓂᑦ ᑐᓂᔭᐅᓂᒃᑯᑦ ᐊᒻᒪ ᐃᓄᐃᑦ ᐅᐸᒍᑎᓗᑎ ᓄᓇᓕᖕᓂᑦ ᑲᑎᒪᑎᑦᑎᓂᒃᑯᑦ ᓄᓇᕗᑦ ᓄᓇᓕᓕᒫᖏᓐᓂᒃ ᐊᒻᒪ ᐊᑦᑐᖅᑕᐅᓯᒪᔪᓂᑦ ᓄᓇᕕᖕᒥᑦ ᐊᒻᒪ ᑕᓇᐃ ᓄᓇᓕᖏᓐᓂᑦ. ᐸᕐᓇᑕᐅᓯᒪᔪᑦ ᐃᓄᓕᒫᓂᑦ ᓈᓚᖕᓂᖃᖅᑎᑦᑎᓂᕐᒥᑦ ᑭᖑᕙᖓᓚᐅᖅᑐᑦ ᐊᑐᓕᖁᔭᐅᔪᓂᑦ ᑲᓇᑕᒥ, ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᓄᓇᕗᑦ ᑐᙵᕕᒃᑯᓐᓂ ᑖᓐᓇ 2012 ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎ ᐋᖅᑭᒋᐊᖅᑕᐅᖅᑳᕐᓗᓂ, ᑐᙵᕕᖃᕐᓗᑎᒃ ᑐᓴᕐᕕᒋᓯᒪᔭᖏᓐᓂᒃ ᐅᓪᓗᒥᒧᑦ.
ᔫᓂ 2014
2014 ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎ ᐊᒻᒪ 2014 ᓇᓖᕋᕈᑎᒃᓴᑦ ᐊᒻᒪ ᐊᑐᓕᖁᔭᐅᔪᑦ ᓴᖅᑭᑕᐅᔪᑦ.
ᐋᒡᒌᓯ 2014 – ᒪᐃ 2016
ᑲᒥᓴᒃᑯᑦ ᑐᓴᕈᒪᓚᐅᖅᑐᑦ 2014 ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎᒥᑦ ᑎᑎᕋᖅᓯᒪᔪᓂᑦ ᑐᓂᔭᐅᓂᒃᑯᑦ ᐊᒻᒪ ᑎᓴᒪᓂᑦ ᐃᓄᐃᑦ ᐅᐸᒍᑎᓗᑎ ᐱᔭᕆᐊᑐᓂᖓᓄᑦ ᑲᑎᒪᓂᐅᔪᓂᑦ. ᑲᒥᓴᒃᑯᑦ ᐸᕐᓇᓯᒪᔪᒃᑯᑦ ᐃᓄᓕᒫᓂᑦ ᓈᓚᖕᓂᖃᖅᑎᑦᑎᓂᕐᒥᑦ ᐅᖓᕝᕙᕆᐊᖅᑕᐅᓚᐅᖅᑐᑦ ᐱᔾᔪᑎᖃᖅᖢᑎᒃ ᐊᑐᓕᖁᔭᐅᔪᓂᑦ ᑲᓇᑕᒥ, ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᓄᓇᕗᑦ ᑐᙵᕕᒃᑯᓐᓂ ᑖᓐᓇ 2014 ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎ ᐋᖅᑭᒋᐊᖅᑕᐅᖅᑳᕐᓗᓂ, ᑐᙵᕕᖃᕐᓗᑎᒃ ᑐᓴᕐᕕᒋᓯᒪᔭᖏᓐᓂᒃ ᐅᓪᓗᒥᒧᑦ.
ᔫᓂ 2016
2016 ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎ ᐊᒻᒪ 2016 ᓇᓖᕋᕈᑎᒃᓴᑦ ᐊᒻᒪ ᐊᑐᓕᖁᔭᐅᔪᑦ ᓴᖅᑭᑕᐅᔪᑦ.
ᔪᓚᐃ 2016 – ᕕᕗᐊᓕ 2017
ᑲᒥᓴᒃᑯᑦ ᑐᓴᕈᒪᓚᐅᖅᑐᑦ 2016 ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎᒥᑦ ᑎᑎᕋᖅᓯᒪᔪᓂᑦ ᑐᓂᔭᐅᓂᒃᑯᑦ ᐊᒻᒪ ᐃᓄᐃᑦ ᐅᐸᒍᑎᓗᑎ ᓄᓇᓕᖕᓂᑦ ᑲᑎᒪᓂᐅᔪᓂᑦ.
ᓯᑎᐱᕆ 2016 – ᓄᕕᐱᕆ 2016
ᑲᒥᓴᒃᑯᑦ ᐱᕙᒌᔭᐃᓚᐅᖅᑐᑦ ᐃᓄᓕᒫᓄᑦ ᓈᓚᖕᓂᐅᔪᓄᑦ 2016 ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎᒧᑦ ᐱᓚᒋᓗᓂᐅᒃ ᐊᑕᐅᓯᕐᒥᑦ ᓈᓚᖕᓂᖃᓚᐅᙱᑎᓪᓗᒋᑦ ᑲᑎᒪᓂᕐᒥᑦ ᐃᖃᓗᖕᓂᑦ ᐱᖃᑕᐅᔪᓕᒫᓄᑦ, ᐊᒻᒪ ᐱᖓᓲᔪᖅᑐᓄᑦ ᐊᕕᒃᑐᖅᓯᒪᔪᓂᑦ ᓈᓚᖕᓂᖃᓚᐅᙱᑎᓪᓗᒋᑦ ᑲᑎᒪᓂᐅᔪᓂᑦ ᑐᕌᒐᖃᖅᖢᑎᒃ ᑎᓕᔭᐅᔪᓂᑦ ᓄᓇᓕᖕᓂᑦ ᐱᖃᑕᐅᓂᐊᖅᑐᓂᑦ.
ᒫᑦᓯ 2017
ᑲᒥᓴᒃᑯᑦ ᕿᑭᖅᑕᓂ ᐃᓄᓕᒫᓂᑦ ᓈᓚᖕᓂᖃᖅᑎᑦᑎᓚᐅᖅᑐᑦ ᐃᖃᓗᖕᓂᑦ ᕿᑭᖅᑕᓂᕐᒥᐅᑕᕐᓄᑦ ᐊᒻᒪ ᓄᓇᕕᖕᒥᐅᑕᕐᓄᑦ.
ᒪᐃ 2017 – ᔫᓂ 2018
ᑲᒥᓴᒃᑯᑦ ᐅᖓᕝᕙᕆᐊᖅᑎᑦᑎᓚᐅᖅᑐᑦ ᐊᒥᐊᒃᑯᖓᓂ ᐊᕕᒃᑐᖅᓯᒪᔪᓂᑦ ᐃᓄᓕᒫᓂᑦ ᓈᓚᖕᓂᐅᔪᓂᑦ ᐱᓕᕆᓂᕐᒧᑦ ᐅᖃᖃᑎᖃᓚᐅᙱᑎᓪᓗᒋᑦ ᑲᓇᑕᒥ, ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᓄᓇᕗᑦ ᑐᙵᕕᒃᑯᓐᓂ ᐱᔾᔪᑎᒋᓪᓗᒋᑦ ᑭᖑᓪᓕᕐᒥᑦ ᐊᓪᓗᕆᐊᖅᑕᐅᓂᐊᖅᑐᓂᑦ.
ᔪᓚᐃ 2018 – ᒫᑦᓯ 2019
ᑲᒥᓴᒃᑯᑦ ᑐᙵᓴᐃᓚᐅᖅᑐᑦ ᖄᒃᑲᓐᓂᐊᒍᑦ ᑎᑎᕋᖅᓯᒪᔪᓂᑦ ᐅᖃᐅᓯᒃᓴᓂᑦ 2016 ᑎᑎᕋᖅᑕᐅᕐᖓᖅᓯᒪᔪᒧᑦ ᐸᕐᓇᐅᑎᒧᑦ.
ᓄᕕᐱᕆ 2019 – ᔮᓄᐊᕆ 2020
ᑲᒥᓴᒃᑯᑦ ᐅᐸᒍᑎᓯᒪᓪᓗᑎᒃ ᓄᓇᓕᖕᒥᑦ ᑐᑭᓯᒋᐊᕈᑎᒃᓴᓄᑦ ᑲᑎᒪᑎᑦᑎᓚᐅᖅᑐᑦ ᕿᑎᕐᒥᐅᓂ ᐊᒻᒪ ᑭᕙᓪᓕᕐᒥ ᑐᓴᖅᑎᑕᐅᔪᒪᓪᓗᑎᒃ ᑖᔅᓱᒧᖓ 2016 ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎᒧᑦ.