ᐅᖅᓱᖅᑑᖅ, ᖃᐅᔨᒪᔭᐅᖕᒥᔪᖅ Gjoa Haven, ᓂᒋᑉᐸᓯᖓᓃᑦᑐᖅ ᑰᒑᓗᒃ ᕿᑭᖅᑕᖓᓂ, ᐱᒻᒪᕆᐅᓪᓗᓂ ᐃᓂᒋᔭᐅᓚᐅᖅᑐᖅ ᕿᓂᖅᑎᓪᓗᒋᑦ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᓂ, ᐊᒻᒪᓗ ᐊᑦᑎᖅᑕᐅᓯᒪᔪᖅ ᖃᓪᓗᓈᑎᑐᑦ ᖃᐅᔨᓇᓱᐊᖅᑎᒧᑦ ᕈᐊᓪᑦ ᐊᒪᓐᓴᓐ ᐅᒥᐊᖓᓄᑦ. ᓄᓇᓕᖕᒧᑦ ᑎᑭᑦᑐᖃᓲᖅ ᐊᒥᓱᓂᑦ ᐃᒻᒪᓕᓴᕐᓂᒃ ᐱᓕᕆᒍᒪᓲᓂᑦ ᐊᒻᒪᓗ ᐃᓂᒋᔭᐅᔪᖅ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᓄᑦ ᒥᕐᖑᐃᖅᓯᕐᕕᒃ ᐊᒻᒪᓗ ᓄᓇᕗᒻᒥ ᐊᖅᑯᑎ. ᐃᓄᒃᑎᑐᑦ, ᓄᓇᓕᐅᔪᖅ ᑕᐃᒎᓯᓕᒃ ᐅᖅᓱᖅᑑᖅ, ᐅᕝᕙᓘᓐᓃᑦ “ᐃᓂᒋᔭᐅᔪᖅ ᐅᖅᓱᓕᒻᒪᕆᒃ,” ᑐᑭᖃᖅᐳᖅ ᐅᓄᕐᓂᖏᓐᓄᑦ ᐳᐃᔩᑦ ᖃᓂᒋᔭᖓᓂ.
ᐅᖅᓱᖅᑑᖅ ᖃᐅᔨᒪᔭᐅᑦᑎᐊᖅᑐᖅ ᕿᒧᒃᓯᕐᓂᕐᒧᑦ, ᖁᙱᐊᕐᓂᕐᒧᓪᓗ ᐊᔾᔨᒌᙱᑦᑐᓂᑦ ᐆᒪᔪᓂᑦ ᐃᓚᒋᓗᓂᒋᑦ ᑐᒃᑐᐃᑦ, ᐅᒥᖕᒪᐃᑦ, ᓇᓄᐃᑦ, ᓂᕐᓖᑦ, ᖁᒡᔪᐃᑦ, ᑭᒡᒐᕕᐊᕐᔪᐃᑦ, ᐊᒻᒪᓗ ᒥᑏᑦ.
ᐱᑕᖃᑐᐃᓐᓇᕆᐊᓖᑦ ᐊᑐᒃᑲᓐᓂᒐᒃᓴᐅᙱᑦᑐᑦ ᑕᐅᕙᓃᑦᑐᑦ ᐃᓚᖃᖅᑐᖅ: ᒎᓗ ᐊᒻᒪᓗ ᐅᔭᖅᑲᓂᒃ ᑎᓯᓂᖅᐹᑦ.
ᓄᓇᒥᒃ ᐊᑐᕐᓂᕐᒧᑦ ᐸᕐᓇᐃᓂᖅ
ᐊᖏᖅᑕᐅᔪᖅ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎ
ᓄᓇᓕᐅᔪᖅ ᐅᖅᓱᖅᑑᖅ ᐱᖃᙱᑦᑐᖅ ᓱᓕ ᐊᖏᖅᑕᐅᓯᒪᔪᒥᑦ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᒥᑦ.
ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕗᒻᒥ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎ
ᐊᑯᓐᓂᖏᓐᓂ 2004 ᐊᒻᒪ 2011, ᓄᓇᕗᒻᒥ ᐸᕐᓇᐃᔩᑦ ᐳᓚᕋᓚᐅᖅᑐᑦ ᐊᑕᖏᖅᖢᑎᒃ ᓄᓇᕗᒻᒥ ᓄᓇᓕᖏᓐᓄᑦ ᐃᓛᒃᑰᖓᔪᓂᑦ “ᐊᑐᖅᑕᐅᓂᕐᒧᑦ ᐊᒻᒪ ᐃᓄᖃᕐᓂᖓᓄᑦ ᓄᓇᙳᐊᓕᐅᕐᓂᕐᒥᑦ” ᐊᐱᖅᓱᖅᖢᑎᒃ ᓄᐊᑦᑎᓂᕐᒧᑦ ᑐᑭᓯᒋᐊᕈᑎᒃᓴᓂᑦ ᐱᖅᑯᓯᑐᖃᖅᑎᒍᑦ ᓄᓇᐅᑉ ᐊᑐᖅᑕᐅᖓᓄᑦ ᖃᓄᐃᓕᐅᕈᑎᓂᑦ “ᐃᓅᓂᕐᒥᓂ ᐃᖅᑲᐅᒪᔭᒥᓂ.” ᑖᓐᓇ ᓄᓇᓕᖕᒧᑦ ᓄᓇᒥᒃ ᐊᑐᕐᓂᕐᒧᑦ ᑐᑭᓯᒋᐊᕈᑎᒃᓴᑦ ᐃᓚᓕᐅᑎᓯᒪᔪᑦ ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎᒥᑦ ᐊᒻᒪ ᐊᑐᖅᑕᐅᓯᒪᔪᖅ ᐃᑲᔪᖅᓱᐃᓂᕐᒥᑦ ᐃᓱᒪᓕᐅᕆᓂᕐᒥᑦ.
ᑲᒥᓴᒃᑯᑦ ᐳᓚᕋᓚᐅᕐᒥᔪᑦ ᓄᓇᓕᐅᔪᒥᑦ ᒫᔾᔨ 24, 2014, ᓄᓇᓕᖕᓂ ᐃᓚᐅᑎᑦᑎᓂᕐᒥᑦ ᑲᑎᒪᓂᕐᒧᑦ ᑎᑎᕋᖅᑕᐅᕐᖓᖅᓯᒪᔪᒧᑦ ᐸᕐᓇᐅᑎᒧᑦ.
ᑐᑭᓯᒋᐊᕈᑎᒃᓴᑦ ᓴᖅᑮᓚᐅᖅᑐᑦ ᐊᒻᒪᓗ ᑐᓂᔭᐅᓪᓗᑎᒃ ᐱᖃᑕᐅᔪᓂᑦ ᐅᖅᓱᖅᑑᒥ ᒪᓕᑦᑎᐊᖅᖢᑎᒃ ᓄᓇᕗᒻᒥ ᐸᕐᓇᐃᔩᑦ ᐃᓚᐅᑎᑦᑎᓂᒃᑯᑦ ᐸᕐᓇᐅᑎᖓᓂ. ᓇᐃᓈᖅᓯᒪᔪᖅ ᐅᓂᒃᑳᓕᐊᑦ ᓄᓇᓕᖕᓂ ᑲᑎᒪᓂᕐᒧᑦ ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕗᒻᒥ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᒧᑦ ᒫᔾᔨ 24, 2014 ᐅᖅᓱᖅᑑᕐᒥ ᑕᑯᔭᐅᒍᓐᓇᖅᑐᑦ ᐊᑖᓂ.
ᓄᓇᓕᐅᑉ ᑕᑯᓐᓈᖅᑕᖏᑦ ᐊᒻᒪ ᐅᖃᐅᓯᒃᓴᖏᑦ ᐃᑲᔪᕐᔪᐊᖅᓯᒪᔪᑦ ᑲᔪᓯᔪᒥᑦ ᐱᓕᕆᓂᐅᔪᒥᑦ ᐱᕙᓪᓕᐊᑎᑦᑎᓂᕐᒥᑦ ᐊᒻᒪ ᐋᖅᑭᒋᐊᖅᓯᓂᕐᒥᑦ ᑎᑎᕋᖅᑕᐅᕐᖓᖅᓯᒪᔪᖅ ᓄᓇᕗᒻᒥ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᒥᑦ. ᐱᓗᐊᙳᐊᖅᑐᒥᑦ, ᐃᓂᓕᒫᖏᑦ ᐱᒻᒪᕆᐅᒋᔭᐅᔪᑦ ᓇᓗᓇᐃᖅᑕᐅᔪᑦ ᓄᓇᓕᖕᒧᑦ ᐃᓚᓕᐅᑎᓯᒪᔪᑦ ᑎᑎᕋᖅᑕᐅᕐᖓᖅᓯᒪᔪᖅ ᐸᕐᓇᐅᑎᒥᑦ “ᓄᓇᓕᐅᑉ ᓯᕗᓪᓕᐅᔾᔨᖁᔭᖏᑦ ᐊᒻᒪ ᐱᒻᒪᕆᐅᒋᔭᖏᑦ.”